ប្រទេសពីរបានទិញសិទ្ធិផ្សាយបន្តផ្ទាល់កីឡាស៊ីហ្គេមលើកទី ៣២

កីឡាថ្ងៃអាទិត្យ ទី26 ខែកុម្ភៈ ឆ្នាំ2023 ម៉ោង 6:00 នាទី ល្ងាច

អត្ថបទ សូរ្យរិទ្ធ៖

ការប្រកួតកីឡាស៊ីហ្គេមលើកទី៣២ នៅរាជធានីភ្នំពេញ ព្រះរាជាណាចក្រកម្ពុជា ត្រូវបានគេចាត់ទុកថាជាព្រឹត្តិការណ៍កីឡាដ៏ធំបំផុតរបស់កម្ពុជាក្នុងរយៈពេលជិត ៧០ឆ្នាំមកនេះ ។

គណៈកម្មការរៀបចំការប្រកួតកីឡាស៊ីហ្គេមលើកទី៣២ បានប្រកាសថា នឹងប្រមូលថវិកាពីការលក់សិទ្ធិផ្សាយបន្តផ្ទាល់ពីការប្រកួតកីឡាលើកនេះចំនួន ៨០០.០០០ ដុល្លារសហរដ្ឋអាមេរិក (៣.២៨០.០០០.០០០រៀល) ។

វេបសាយ sanook របស់ថៃផ្សាយនៅថ្ងៃទី ២៦ ខែកុម្ភៈ ឆ្នាំ ២០២៣ថា កាលពីស៊ីហ្គេមលើកទី៣១ នៅប្រទេសវៀតណាម គ្មានសួយសារអាករនឹងត្រូវបានគិតប្រាក់តាមមធ្យោបាយណាមួយឡើយ វានឹងបើកឱ្យទស្សនាដោយឥតគិតថ្លៃ ឬគ្រាន់ តែបង់ថ្លៃសម្រាប់អំណោយផលក្នុងការបញ្ជូនសញ្ញាតែប៉ុណ្ណោះ ការដែលចេញមកប្រមូលសួយសារអាករនៅកម្ពុជាលើកនេះ ចាត់ទុកថាជាការហែកចោលប្រពៃណីដែលគ្រប់ជាតិសាសន៍ក្នុងអាស៊ានបានប្រតិបត្តិកន្លងមក ។

វេបសាយដដែលនេះសរសេរថា លោក វ៉ាត់ ចំរើន អគ្គលេខាធិការគណៈកម្មាធិការរៀបចំកីឡាស៊ីហ្គេម 2023 (CAMSOC) បាននិយាយថា «យើងបានសម្រេចជាថ្មីនូវការផ្លាស់ប្តូរទម្លាប់ចាស់ នៃស៊ីហ្គេមដោយប្រាជ្ញា និងការណែនាំដោយផ្ទាល់របស់លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍កម្ពុជា ដែលចង់បើកទ្វារឆ្ពោះទៅស៊ីហ្គេម»។

«ដោយសារការលក់កម្មសិទ្ធិ នឹងធ្វើឱ្យយើងបានប្រាក់ចំណេញ ប៉ុន្តែកន្លងមក វានឹងមិនមានការគិតថ្លៃចំណាយ ដែលនាំឱ្យបាត់បង់តម្លៃនោះទេ រឿងនេះចាត់ទុកថា កម្ពុជាមានគំនិតផ្ដួចផ្ដើមជោគជ័យមួយក្នុងការលក់សិទ្ធិផ្សាយបន្តផ្ទាល់ ដែលយើងមានសិទ្ធិពេញលេញក្នុងការលក់លើកនេះ»។

ជាមួយគ្នានេះ កម្ពុជានៅតែប្រកាន់ជំហរថា បើប្រទេសណាមិនបង់ថ្លៃសួយសារអាករទេ គឺមិនអាចផ្សាយផ្ទាល់ទៅកាន់ប្រទេសរបស់ខ្លួនបានឡើយ ។ មកទល់នឹងពេលនេះ ប្រទេសពីរដែលបានព្រមព្រៀងទិញសិទ្ធិផ្សាយគឺ វៀតណាម និងម៉ាឡេស៊ី បានចុះកិច្ចសន្យារួចហើយ ។

សម្រាប់ការប្រកួតកីឡាស៊ីហ្គេមលើកទី៣២ នៅរាជធានីភ្នំពេញ ប្រទេសកម្ពុជានេះ ការប្រកួតចាប់ពីចន្លោះថ្ងៃទី ៥-១៧ ខែឧសភា ឆ្នាំ ២០២៣ បើតាមការប្រកាសជាបឋមលើកនេះ នឹងមានកីឡាសរុបចំនួន ៣៦ ប្រភេទ និងប្រកួតប្រជែងដណ្តើមមេដាយមាសចំនួន ៦០៨ ដែលចាត់ទុកថាជាកីឡាច្រើនជាងគេក្នុងប្រវត្តិសាស្ត្រអាស៊ាន ៕