អត្ថបទ សូរ្យរិទ្ធ៖
រឿងចាប់សត្វក្ងោក ជារឿងកក្រើកពេញបណ្តាញសង្គមសម្បើមណាស់នាដើមឆ្នាំ ២០២៣ ។ ដេកមើល Tik Tok បើកពេលណាក៏មិនល្អភ្នែក មិនស្រួលត្រចៀក ឃើញតែសាធារណជន រិះគន់មន្ត្រីអភិរក្សសត្វ រហូតដៀលទៅដល់រដ្ឋាភិបាលទៅទៀត ថាមិនគួរបណ្តោយឲ្យទៅចាប់សត្វក្ងោករបស់ប្រជាពលរដ្ឋចិញ្ចឹមដោយមិនដឹងខ្លួនសោះអ៊ីចឹង ហើយរហូតមានទារប្រាក់ ៩ លានរៀល និងគំរាមមានទោសទៅទៀត ។
មើលហើយ Admin ក៏នឹកឆ្ងល់ដែរថា អ្នកធ្វើកិច្ចការនឹង ធ្វើទាំងងើលឬទាំងងងុល? មានសមត្ថភាព ឬអសមត្ថភាព? បើមានសមត្ថភាព មិនអាចធ្វើទាំងគ្មានខួរបែបនេះទេ ហើយត្រូវឈ្វេងយល់ពីច្បាប់ តើងវាយ៉ាងម៉េចៗជាមុនសិន មុនហាមាត់និយាយ មុនលាដៃទៅចាប់ អត់ដឹងថាខ្លួនធ្វើខុសទាំង«ភ្លើ»ដុំៗ !អត្ថបទ សូរ្យសែង៖
មានការកោះហៅមួយរបស់លោក កែវ អូម៉ាលីស្ស ប្រធានរដ្ឋបាលព្រៃឈើនៃក្រសួងកសិកម្ម កោះហៅលោក យឹម សំអឿន ជាម្ចាស់សត្វក្ងោកទៅបំភ្លឺ ហើយជាការបន្តនីតិវិធីបញ្ចប់សំណុំរឿងបទល្មើសសត្វព្រៃ ទាក់ទងនឹង«ការយកធ្វើជាកម្មសិទ្ធិ ចិញ្ចឹម បង្កាត់ពូជសត្វព្រៃ ដោយគ្មានការអនុញ្ញាត»។
នៅប្រទេសគេ គេលើកទឹកចិត្តឲ្យពលរដ្ឋចិញ្ចឹមសត្វយ៉ាងពពាក់ពពូន ដើម្បីបង្កើនពូជសត្វកម្រឲ្យវាសម្បូរឡើងវិញ ម្យ៉ាងទៀត ជួយបង្កើនការទាក់ទាញនៅតំបន់ទេសចរណ៍ផងដែរ ។
បើនិយាយពីសត្វក្ងោក គេចាត់ទុកវាជាសត្វមានសម្រស់ដ៏ស្រស់ស្អាត រោមវាមានពណ៌ចម្រុះ នៅពេលវាបើកស្លាបម្តងៗ បើបានថតរូបជាមួយវាពិតជាលើកសម្រស់រូបថត និងទាក់ទាញខ្លាំងណាស់ ។
នៅស្រុកខ្មែរក៏មានរបាំក្ងោក ដែលជារបាំមួយប្រភេទជារបស់ជនជាតិកូឡា ជាជនចំណាកស្រុកមកពីប្រទេសភូមា ហើយបានមកសាងជីវិតរស់នៅក្នុងប្រទេសខ្មែរ តាមតំបន់ជួរភ្នំយ៉ាត ក្រុងប៉ៃលិន (តាមឯកសារស្រាវជ្រាវរបស់នាយកដ្ឋានស្រាវជ្រាវនៃក្រសួងវប្បធម៌ និងវិចិត្រ សិល្បៈ ក្នុងអំឡុងទសវត្សរ៍ឆ្នាំ៦០)។ ភាពស្រស់ស្អាតនៃសម្លៀកបំពាក់របស់ជនជាតិកូឡា ជាមួយនឹងភាពប៉ិនប្រសប់ក្នុងការរាំរបស់សត្វក្ងោក ព្រមទាំងមានការអត្ថាធិប្បាយពីប្រវត្តិខ្លះៗផងនោះ បានទាក់ចិត្តអ្នកទស្សនាឲ្យកាន់តែចាប់អារម្មណ៍ថែមទៀត។
ឥឡូវសម្តេចតេជោ ហ៊ុន សែន ចេញបទបញ្ជាបន្ទាន់ហើយ ឲ្យយកសត្វក្ងោកជូនទៅម្ចាស់វិញដល់ផ្ទះនៅខេត្តកំពង់ឆ្នាំង នៅថ្ងៃទី២៨ ខែកុម្ភៈ ឆ្នាំ២០២៣ នេះជាកំហិត ។ បទបញ្ជានេះ បញ្ជាជាបន្ទាន់ឲ្យមន្ដ្រីដែលទទួលខុសត្រូវរបស់ក្រសួងកសិកម្ម រុក្ខាប្រមាញ់ និងនេសាទ ដែលបានចុះទៅចាប់សត្វក្ងោកនៅផ្ទះប្រជាពលរដ្ឋ ក្នុងស្រុកបរិបូរណ៍ ខេត្តកំពង់ឆ្នាំង យកទៅប្រគល់ជូនដល់ម្ចាស់គេវិញដល់ផ្ទះក្នុងថ្ងៃនេះតែម្ដង ។
«ខ្ញុំសូមចេញបទបញ្ជាបន្ទាន់ សូមឲ្យអ្នកទទួលខុសត្រូវ ដែលបានយកសត្វក្ងោកចេញពីផ្ទះរបស់ក្រុមគ្រួសារដែលចិញ្ចឹមសត្វនេះ យកទៅជូនដល់ផ្ទះវិញតែម្ដង។ ខ្ញុំមិនយល់ស្របនឹងទង្វើបែបនេះទេ យើងគួរតែលើកទឹកចិត្តឲ្យប្រជាជនចិញ្ចឹមសត្វដែលជិតផុតពូជ ប្រសើរជាងទៅចាប់សត្វដែលប្រជាជនខំចិញ្ចឹមយកមកទុកនៅទីកន្លែងមួយ ដែលមិនយូរប៉ុន្មានសត្វនេះនឹងស្លាប់ ប្រសិនបើខ្វះការថែទាំ ខ្វះការយកចិត្តទុកដាក់»។ ប្រសាសន៍សម្តេចតេជោ ។
គេគ្រប់គ្នាខំចែវទូកចង់ងាប់ បែរជាបុគ្គលខ្លះ យកជើងរាទឹក កូរកកាយតាមអំពើចិត្ត ហើយយកភ្លើងទៅដុតកម្លោចនូវការខិតខំទាំងញើសឈាមរបស់សមាជិកគណបក្សប្រជាជនឯទៀតៗ ដែលយកឈ្នះក្នុងការបោះឆ្នោត ។ រឿងនេះបើសម្តេចតេជោ មិនអន្តរាគមន៍បែបនេះទេ ខ្ញុំជឿជាក់ថា ពួកនេះវាបំផ្លាញសន្លឹកឆ្នោតធំធេងណាស់ ពីព្រោះចំនួនអ្នកមិនគាំទ្រពីទង្វើចាប់សត្វក្ងោកនេះមាន ៩៩,៩៩៩៩% ឯណោះ ។
ដូច្នេះបើមានទង្វើល្ងិតល្ងង់នៅថ្ងៃក្រោយទៀត សូមសម្តេចយកទៅ«វះកាត់»តាមអភិក្រម... បើត្រីមួយ-ពីរស្អុយ គួរយកវាចេញ កុំឲ្យវាស្អុយទាំងកញ្ឆេ... ៕