ក្រមាខ្មែរ ត្រៀមចុះបញ្ជីបេតិកភណ្ឌវប្បធម៌ពិភពលោក

ព័ត៌មានសង្គមថ្ងៃព្រហស្បត្តិ៍ ទី09 ខែមិីនា ឆ្នាំ2023 ម៉ោង 7:24 នាទី ល្ងាច

ដោយ សូរ្យរិទ្ធ៖

កម្ពុជាត្រៀមយក «ក្រមា (Kroma)» ជាក្រមាត្បាញដោយដៃដ៏ពិសេសទៅអង្គការ UNESCO ដើម្បីស្នើសុំចុះបញ្ជីបេតិកភណ្ឌវប្បធម៌អរូបី ។ នេះបើតាមមន្ត្រីកម្ពុជាលើកឡើងថា នឹងបញ្ជូននៅចុងខែនេះ។

មន្ត្រីក្រសួងវប្បធម៌ និងវិចិត្រសិល្បៈបានមានប្រសាសន៍ថា ក្នុងរយៈពេល ២ ឆ្នាំកន្លងមក គណៈកម្មការជំនាញ បានចងក្រងឯកសារសម្រាប់ស្នើសុំចុះបញ្ជីបេតិកភណ្ឌពិភពលោក ។

«នៅថ្ងៃទី១៧ ខែមីនា ឆ្នាំ ២០២៣ ក្រសួងវប្បធម៌នឹងបើកសិក្ខាសាលាមួយ ដើម្បីពិនិត្យលើសេចក្តីព្រាងសំណើនេះ ។ សិក្ខាសាលានេះនឹងមានការចូលរួមពីអ្នកតម្បាញ អ្នកស្រាវជ្រាវ និងគំរូប្រជាជនខេត្តសៀមរាប វាជាឱកាសចុងក្រោយក្នុងការពិនិត្យឯកសារមុនពេលដាក់ជូននៅថ្ងៃទី ២១ ខែមីនា»។

មន្ត្រីដដែលបានកត់សម្គាល់ដែរថា នៅថ្ងៃទី២៨ ខែកុម្ភៈ ឆ្នាំ ២០២៣ ប្រទេសថៃបានប្រកាសពីបំណងដាក់ក្រណាត់«ខៅម៉ា» សម្រាប់ការចុះបញ្ជីបេតិកភណ្ឌវប្បធម៌អរូបីផងដែរ ហើយបើទោះបីជាសំណើនោះជាវត្ថុបំណងដូចគ្នាក៏ដោយ ប៉ុន្តែកម្ពុជាសុខចិត្តសុំចុះឈ្មោះ ព្រោះអង្គការយូណេស្កូមិនដាក់កំហិតការចុះបញ្ជី និងគាំទ្រឲ្យមានការចុះបញ្ជីរួមគ្នាជាបេតិកភណ្ឌវប្បធម៌ទាំងអស់ ដើម្បីអាចរួមគ្នាការពារវប្បធម៌ទាំងនោះ ។

«បេតិកភណ្ឌវប្បធម៌អរូបីមិនអាចជាកម្មសិទ្ធិរបស់ប្រទេសតែមួយបានទេ អង្គការយូណេស្កូលើកទឹកចិត្តឱ្យប្រទេសនានាចុះឈ្មោះតាមភាពសមស្រប ប្រទេសជាច្រើនមានឥទ្ធិពលលើគ្នាទៅវិញទៅមក» ៕