ដោយ ម៉ារ៉ា៖
កម្ពុជាមានមោទកភាព ជាមួយនឹងសេចក្តីសោមនស្សរីករាយនឹងកំណើនប្រាក់ចំណូលទេសចរណ៍ដ៏ច្រើននៅឆ្នាំ២០២២ ប្រមាណ ១,៤១ ពាន់លានដុល្លារ ហើយនឹងមានបំណងទាក់ទាញភ្ញៀវទេសចរបរទេសមកកម្ពុជាចំនួន ៤លាននាក់នៅឆ្នាំ២០២៣។
ក្រសួងទេសចរណ៍កម្ពុជា បានបង្ហាញកាលពីថ្ងៃទី១០ ខែមីនា ឆ្នាំ២០២៣ ថា វិស័យទេសចរណ៍កម្ពុជាទទួលបានចំណូលសរុបចំនួន ១,៤១ ពាន់លានដុល្លារអាមេរិក ក្នុងឆ្នាំ ២០២២ កើនឡើង ៦៦៩ ភាគរយបើធៀបនឹងឆ្នាំមុន និងបានស្វាគមន៍ភ្ញៀវទេសចរបរទេសចំនួន ២,២៨ លាននាក់ កើនឡើង ១.០៥៨ ភាគរយធៀបនឹងឆ្នាំ ២០២១។
របាយការណ៍បញ្ជាក់ថា ឧស្សាហកម្មទេសចរណ៍បានរួមចំណែក ៣,៦% ដល់ផលិតផលក្នុងស្រុកសរុប (GDP) របស់កម្ពុជាក្នុងឆ្នាំ ២០២២ ជាមធ្យមក្នុងម្នាក់ស្នាក់នៅ ២ យប់ ៣ ថ្ងៃ ។
លោក ថោង ខុន រដ្ឋមន្ត្រីក្រសួងទេសចរណ៍កម្ពុជារំពឹងថា នឹងទាក់ទាញភ្ញៀវទេសចរបរទេសចំនួន ៤ លាននាក់នៅឆ្នាំ ២០២៣ ហើយសង្ឃឹមថានឹងទាក់ទាញភ្ញៀវទេសចរចិនក្នុងចន្លោះពី ៨០០.០០០ ទៅ ១ លាននាក់។
ឧស្សាហកម្មទេសចរណ៍គឺជាសសរស្តម្ភមួយក្នុងចំណោមសសរស្តម្ភទាំងបួនដែលគាំទ្រសេដ្ឋកិច្ចកម្ពុជា ។ ប្រទេសកម្ពុជាមានភាពល្បីល្បាញដោយសារតំបន់បេតិកភណ្ឌពិភពលោកចំនួនបីគឺ ឧទ្យានបុរាណអង្គរ ឬប្រាសាទអង្គរវត្តក្នុងខេត្តសៀមរាប ប្រាសាទព្រះវិហារ ខេត្តព្រះវិហារ និងទីបុរាណប្រាសាទសម្បូរព្រៃគុហ៍ ក្នុងខេត្តកំពង់ធំ រួមទាំងការកម្សាន្តនៅឆ្នេរសមុទ្រដ៏ស្រស់ស្អាតប្រវែង ៤៥០ គីឡូម៉ែត្រ ដែលលាតសន្ធឹងកាត់ខេត្តភាគនិរតីចំនួន ៤ គឺខេត្តព្រះសីហនុ កំពត កែប និងកោះកុងផងដែរ ។
ប្រភព Xinhua
Photo expedia