ដោយ សូរ្យសែង៖
វេបសាយ sanook របស់ថៃបានចេញផ្សាយថ្ងៃទី ២៧ មីនាម្សិលមិញ ថា ស៊ីហ្គេមដែលកម្ពុជាធ្វើម្ចាស់ផ្ទះមានរឿងប្លែកៗដែលមិនធ្លាប់កើតមានពីមុន ។
កាសែតនោះនិយាថា ថ្មីៗនេះ មានបញ្ហាកាន់តែច្រើន នៅពេលដែលអ្នករៀបចំការប្រកួតមិនមានថវិកាសម្រាប់ចំណាយលើការជួលអាជ្ញាកណ្តាលនៃសហព័ន្ធកីឡានីមួយៗ រួមទាំងគ្មានកន្លែងស្នាក់នៅសម្រាប់ទទួលចៅក្រមអន្តរជាតិទាំងនោះដែលនឹងធ្វើដំណើរទៅវិនិច្ឆ័យ ។
រឿងនេះលោក ថាណា ឆៃប្រាសិត ប្រធានក្រុមកីឡាថៃ បានបង្ហាញឱ្យឃើញថា «បញ្ហាមួយទៀតដែលកំពុងប្រឈមនៅពេលនេះ គឺម្ចាស់ផ្ទះផ្ញើលិខិតអញ្ជើញទៅអាជ្ញាកណ្តាលនៃសហព័ន្ធកីឡានីមួយៗ ប៉ុន្តែមិនមានប្រាក់ឧបត្ថម្ភ ឬឲ្យកន្លែងស្នាក់នៅឡើយ»។
«ជាលទ្ធផល សហព័ន្ធកីឡាជាច្រើនឥឡូវបានស្ទាក់ស្ទើរក្នុងការចំណាយផ្ទាល់ខ្លួនក្នុងការបញ្ជូនអាជ្ញាកណ្តាលមកវិនិច្ឆ័យស៊ីហ្គេមនេះ ។ ជាធម្មតា បើគ្មានប្រាក់ឧបត្ថម្ភ យ៉ាងហោចណាស់គួរតែមានកន្លែងស្នាក់នៅ ប៉ុន្តែលើកនេះមិនមានអ្វីត្រូវផ្តល់ជូនទេ»។
«យើងបានសួរអំពីបញ្ហានេះ ខាងកម្ពុជាឆ្លើយថា មិនមានថវិកាក្នុងផ្នែកនេះទេ ប្រសិនបើអាជ្ញាកណ្តាលអន្តរជាតិមកដល់ ពួកគេនឹងចេញថ្លៃចំណាយផ្ទាល់ខ្លួន ហើយប្រសិនបើអាជ្ញាធរអន្តរជាតិមិនយល់ព្រម កម្ពុជានឹងប្រើអាជ្ញាកណ្តាលរបស់ខ្លួនដើម្បីសម្រេចរាល់ការប្រកួតកីឡាស៊ីហ្គេម»។
ចំពោះបញ្ហានេះ ថៃត្រូវពិភាក្សាជាមួយសមាគមកីឡា ដែលអាចត្រូវបានស្នើត្រៀមថវិកាបម្រុងទុកការចំណាយសម្រាប់អាជ្ញាកណ្តាលខ្លួនឯង ឬយ៉ាងហោចណាស់ត្រូវមានការកក់កន្លែងស្នាក់នៅ ប៉ុន្តែអាចនឹងមានបញ្ហាក្នុងការធ្វើដំណើរមួយផ្សេងទៀតព្រោះម្ចាស់ផ្ទះប្រហែលជាមិនបានរៀបចំរថយន្តក្រុងផងដែរ។
សម្រាប់ការប្រកួតកីឡាស៊ីហ្គេមលើកទី៣២ នៅរាជធានីភ្នំពេញ ប្រទេសកម្ពុជា នឹងធ្វើឡើងនៅចន្លោះថ្ងៃទី៥-១៧ ខែឧសភា ដោយមានកីឡាសរុប ៣៦ប្រភេទ ប្រកួតប្រជែងដណ្តើមមេដាយមាសចំនួន ៦០៨ ដែលជាចំនួនច្រើនបំផុតក្នុងប្រវត្តិសាស្ត្រកីឡាអាស៊ាន ៕