បកប្រែពី MGRonline :
ដោយ ម៉រ៉ា
ការវាយប្រហារកាលពីថ្ងៃទី ១១ មេសា បានកំណត់គោលដៅភូមិមួយក្នុងសាកូង នៅភាគពាយ័ព្យនៃប្រទេសមីយ៉ាន់ម៉ា (ភូមា) ដែលជាកន្លែងក្រុមប្រឆាំងរដ្ឋាភិបាលនៅទីនោះ ។ សហគមន៍ជាច្រើនក្នុងតំបន់នេះបានរួមគ្នាប្រឆាំងយ៉ាងខ្លាំងរបបយោធាមីយ៉ាន់ម៉ា ដោយបង្កើតកងកម្លាំងប្រដាប់អាវុធរបស់ខ្លួន បើកសាលារៀន និងមន្ទីរពេទ្យផងដែរ ។
កងទ័ពមីយ៉ាន់ម៉ាបានចាប់ផ្តើមវាយប្រហារផ្លូវអាកាសកាន់តែខ្លាំងឡើងប្រឆាំងនឹងក្រុមឧទ្ទាម តាំងពីឡើងកាន់អំណាចក្នុងខែកុម្ភៈ ឆ្នាំ២០២១ មក ។ អ្នកភូមិម្នាក់បានប្រាប់ BBC យ៉ាងដូច្នេះថា យន្តហោះយោធាមួយគ្រឿងបានហោះពីលើកាលពីព្រឹកម្សិលមិញ បន្ទាប់មកបានទម្លាក់គ្រាប់បែក អមដោយឧទ្ធម្ភាគចក្រវាយប្រហារ ដេញបាញ់អ្នកភូមិអស់រយៈពេល ២០នាទី ។ បើតាមព័ត៌មានក្រៅផ្លូវការថា មានអ្នកបាត់បង់ជីវិតប្រមាណ ១០០នាក់ ។
ហេតុការណ៍នេះកើតឡើងក្នុងពេលអ្នកភូមិ រួមទាំងសហគមន៍ជិតខាង បានចូលរួមពិធីសម្ពោធទីបញ្ជាការកងកម្លាំងការពារប្រជាជនថ្មី ដែលជាការប្រមូលផ្តុំក្រុមប្រដាប់អាវុធស្ម័គ្រចិត្តប្រឆាំងនឹងរដ្ឋប្រហារ ដែលបានពង្រាយកម្លាំងរបស់ខ្លួនក្នុងតំបន់ជាច្រើននៃប្រទេសមីយ៉ាន់ម៉ា ។
ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស មានការភ្ញាក់ផ្អើលចំពោះហេតុការណ៍នេះ ចាត់ទុកថាជាការបំពានច្បាប់អន្តរជាតិ ពីការរំលោភសិទ្ធិមនុស្ស រហូតដល់ការបៀតបៀន ក្នុងករណីខ្លះ វាអាចចាត់ទុកថាជាឧក្រិដ្ឋកម្មប្រឆាំងមនុស្សជាតិ និងសូម្បីតែឧក្រិដ្ឋកម្មសង្គ្រាម ចាប់តាំងពីយោធាបានដណ្តើមអំណាចនៅមីយ៉ាន់ម៉ានៅថ្ងៃទី១ ខែកុម្ភៈ ឆ្នាំ២០២១។
សង្គ្រាមស៊ីវិលនៅមីយ៉ាន់ម៉ា មនុស្សរាប់ពាន់នាក់បានស្លាប់ និង 1.4 លាននាក់ផ្សេងទៀតគ្មានផ្ទះសម្បែង ជិតមួយភាគបីនៃចំនួនប្រជាជនរបស់ប្រទេសនេះកំពុងត្រូវការជំនួយមនុស្សធម៌។ នេះបើតាមរបាយការណ៍របស់អង្គការសហប្រជាជាតិ ។
រដ្ឋាភិបាលយោធាមីយ៉ាន់ម៉ា នៅតែប្រើយន្តហោះមកពីរុស្ស៊ី និងចិន ទម្លាក់គ្រាប់បែកដាក់អ្នកភូមិរបស់កងកម្លាំងតស៊ូ ។ ការប្រើប្រាស់ប្រតិបត្តិការវាយប្រហារតាមអាកាស នឹងបង្កឱ្យមានអ្នកស្លាប់និងរបួសបន្ថែមទៀត រួមទាំងមនុស្សសាមញ្ញដែលមិនដឹងពីបញ្ហានេះដែរ។
យោងតាមការវិភាគរបស់ BBC បានឱ្យដឹងថា កងទ័ពមីយ៉ាន់ម៉ាបានធ្វើការវាយប្រហារតាមអាកាសយ៉ាងហោចណាស់ចំនួន 600 នៅចន្លោះខែកុម្ភៈ ឆ្នាំ 2021 ដល់ខែមករា ឆ្នាំ 2023 ៕