ដោយ សូរ្យសែង៖
«កាស៊ី (Cassie) » ឬ Cassandra Nicole Tubs អត្តពលិកតេក្វាន់ដូអាមេរិកកាត់ខ្មែរ ទម្ងន់មិនលើសពី ៦២គីឡូក្រាម ត្រៀមយកមេដាយមាសស៊ីហ្គេមឆ្នាំ ២០២៣ ។
តាមរយៈការប្រកួតកីឡាស៊ីហ្គេមលើកនេះ ជាលើកទីបួនរបស់ Cassie ដែលបម្រើប្រទេស បន្ទាប់ពីទទួលបានមេដាយសំរឹទ្ធពីរ (២០១៧, ២០២២) និងមេដាយប្រាក់១ (ឆ្នាំ២០១៩) ស៊ីហ្គេមនេះ នាងសង្ឃឹមថា នឹងអាចវាយយកមេដាយមាសជូនជាតិខ្មែរ ។
លោក ក្រេក ធុបស៍ (Greg Tubs) ឪពុករបស់ កាស៊ី បាននិយាយថា «ស៊ីហ្គេមលើកនេះ នាងត្រៀមខ្លួនជាស្រេច ឯការហ្វឹកហាត់របស់នាងគឺលូតលាស់ល្អណាស់ ខ្ញុំចង់អរគុណកម្ពុជាដែលតែងតែផ្តល់ឱកាសឱ្យកូនស្រីរបស់ខ្ញុំចូលរួមក្នុងស៊ីហ្គេម ហើយសង្ឃឹមថា កាស៊ី (Cassie) ឈ្នះមេដាយមាសលើកនេះ» ។
សម្រាប់ កាស៊ី នាងមានអាយុ 24 ឆ្នាំ រូបសម្រស់ស្រស់ស្អាតមិនចាញ់តារាភាពយន្ត មានឪពុកជាជនជាតិអាមេរិក ម្តាយជាខ្មែរ នាងត្រូវបានគេចាត់ទុកថាជាអត្តពលិកសំណព្វចិត្តរបស់កម្ពុជា ។
កីឡាតេក្វាន់ដូស៊ីហ្គេមលើកទី៣២ ប្រកួតរវាងថ្ងៃទី១២-១៦ ឧសភា មានតែ ៨ប្រភេទទម្ងន់ សរុប១៦នាក់ ទាំងបុរស និងនារី ៕