ដោយ សូរ្យសែង៖
កាលពីម្សិលមិញ (៨ ឧសភា) ទីភ្នាក់ងារព័ត៌មានរ៉យទ័ររាយការណ៍ថា ប្រធានាធិបតីឥណ្ឌូនេស៊ី ចូកូ វីដូដូ ប្រធានអាស៊ានក្នុងឆ្នាំ ២០២៣ នេះ បានថ្កោលទោសការវាយប្រហារក្បួនរថយន្តអ្នកការទូតរបស់អាស៊ាន ក្នុងពេលនាំជំនួយមនុស្សធម៌ទៅជួយប្រទេសមីយ៉ាន់ម៉ា (ភូមា) ត្រូវកងកម្លាំងប្រដាប់អាវុធមិនស្គាល់ភាគីខាងណាវាយប្រហារ ។
ប្រធានាធិបតី វីដូដូ វាមិនបានផ្តល់ព័ត៌មានលម្អិតអំពីការវាយប្រហារនេះទេ តែបានអំពាវនាវឱ្យបញ្ចប់អំពើហិង្សា ហើយបានបញ្ជាក់ថា ឥណ្ឌូនេស៊ី និងក្រុមប្រទេសអាស៊ាន នឹងមិនបញ្ឈប់ការព្យាយាមជំរុញឱ្យមានសន្តិភាពនៅក្នុងប្រទេសមីយ៉ាន់ម៉ានោះទេ ។
«សូមបញ្ឈប់ការប្រើកម្លាំង អំពើហឹង្សា ព្រោះប្រជាជនទេដែលជាអ្នករងគ្រោះ ការធ្វើបែបនេះនឹងមិនធ្វើឱ្យអ្នកណាម្នាក់ជាអ្នកឈ្នះនោះទេ» លោក វីដូដូ និយាយ។ ឥណ្ឌូនេស៊ីបានលើកទឹកចិត្តអ្នកពាក់ព័ន្ធទាំងអស់ក្នុងវិបត្តិមីយ៉ាន់ម៉ា ឱ្យងាកទៅរកការសន្ទនា និងស្វែងរកដំណោះស្រាយជម្លោះ។
យោងតាមទីភ្នាក់ងារសារព័ត៌មាន AFP អ្នកការទូតបរទេសនៅទីក្រុងយ៉ាំងហ្គោន បាននិយាយថា ក្បួនរថយន្តនេះត្រូវបានអមដោយអ្នកការទូតមកពីអាស៊ាន មាន ឥណ្ឌូនេស៊ី សិង្ហបុរី និងមន្ត្រីទំនាក់ទំនងមនុស្សធម៌មកអាស៊ាន ត្រូវបានវាយប្រហារដោយកម្លាំងមិនស្គាល់ ពេលកំពុងធ្វើដំណើរនៅទីក្រុង តូនយី រដ្ឋសាន កាលពីព្រឹកថ្ងៃអាទិត្យ ទី៧ ខែឧសភា ប៉ុន្តែគ្មាននរណាម្នាក់បាត់បង់ជីវិតទេ ៕