ដោយ សូរ្យរិទ្ធ៖
តាំងពីខ្ញុំចេះមើលបាល់ទាត់មក ការប្រកួតពីយប់មិញ (១៦ ឧសភា ២០២៣) រវាងគូ U22 ថៃ និង U22 ឥណ្ឌូនេស៊ី (ដណ្តើមយកមេដាយមាសក្នុងស៊ីហ្គេមលើកទី ៣២) សែនជក់ចិត្ត! ជក់មើលទាត់បាល់ផង ជក់ចិត្តទាំងទាត់មនុស្សផង គេដេញវ៉ៃគ្នាបែបអនាធិបតេយ្យលក្ខណៈទ្រង់ទ្រាយធំ រត់ពេញតារាងបាល់ទាត់ ហាក់បីដូចជាគ្មានច្បាប់ទម្លាប់អ្វីសោះ ។
ខ្ញុំមិនដឹងថា ដើមហេតុបណ្តាលមកពីអ្វីនោះទេ ដឹងត្រឹមតែកាមេរ៉ារេមកចាប់ត្រង់ប្លង់វាយគ្នា អ្នកក្នុងតារាងវាយអ្នកក្រៅ អ្នកខាងក្រៅទាត់អ្នកខាងក្នុង កីឡាករវាយគ្នាផ្សេង គ្រូជំនួយវាយគ្នាផ្សឹង ដេញពេញតារាងយ៉ាងរញ៉េរញ៉ៃ បន្ទាប់ពីក្រុមឥណ្ឌូនេស៊ី ស៊ុតបាន 3-2 ទៅលើក្រុមថៃ ក្នុងពេលថែមម៉ោង ១៥ នាទីពីរដង ។
បើតាំងចិត្តជាកីឡាករ ចាញ់គឺចាញ់ ឈ្នះគឺឈ្នះ ត្រូវទទួលស្គាល់ ប៉ុន្តែមិនទាន់បញ្ចប់ម៉ោងឯណា ទើបចូលម៉ោងបន្ថែម ១៥ នាទីដំបូង ប៉ុន្តែសមរភូមិទាត់បាល់ ក្លាយជាសមរភូមិទាត់មនុស្ស ប្រៀបដូចហ្វូងតោដេញខាំសត្វឈ្លូសជាអាហារ ហើយចេញចរិតជាក្មេងស្ទាវយ៉ាងអនាធិបតេយ្យ ល្អមើលជាងភាពយន្ត ទាល់តែកងកម្លាំងការពារកម្ពុជាចេញមកឃាត់ទើបរឿងបានស្ងប់ស្ងាត់ទៅវិញ តែត្រូវព្រមានកាតក្រហមប្រមាណ ៤ នាក់ (ទាំងកីឡាករ ទាំងគ្រូជំនួយ)។ យើងមិនគាំទ្រនូវចរិតជាកីឡាករធ្វើបែបននេះទេ ។
ចំណែកគ្រូបង្វឹករបស់ក្រុម U22 ឥណ្ឌូនេស៊ីនិយាយថា ក្រុមកីឡាករបាល់ទាត់ថៃ បង្កហឹង្សាមុន ទើបធ្វើឲ្យស្ថានការណ៍ប្រកួតមានភាពច្របូកច្របល់ ។
កីឡាករនៃប្រទេសទាំងពីរ សុទ្ធតែចាស់ចិត្ត ចាស់គំនិតជាងគេនៅក្នុងតំបន់ខាងផ្នែកកីឡា ពិសេសប្រទេសថៃ ដែលធ្លាប់ធ្វើជាម្ចាស់ផ្ទះ ទាំងកីឡាអាស៊ី ទាំងកីឡាអាស៊ាន (ស៊ីហ្គេម) គួរពង្រឹងក្រមសីលធម៌ និងវិន័យកីឡារបស់ខ្លួនមុនមកប្រកួតស៊ីហ្គេម ឬការប្រកួតកីឡាផ្សេងៗ ដែលមិនគួរឲ្យកើតមានរឿងបែបនេះនៅក្នុងស៊ីហ្គេមលើកទី ៣២ ដែលកម្ពុជាធ្វើជាម្ចាស់ផ្ទះ ។ ប្រវត្តិសាស្ត្រនឹងចារឹកទុក មិនរលុបទេនូវការប៉ះទង្គិចជាជម្លោះជាតសាសន៍កីឡាទាំងពីរប្រទេសនេះ ។
ប៉ុណ្ណឹងហើយមិនទាន់គ្រប់គ្រាន់ មានកីឡាករបាល់ទាត់ថៃម្នាក់បានលូកយកតុក្កតា មុនគណៈកម្មការហុចឲ្យ ហើយបានគ្រវាត់រូបតុក្កតាតំណាងកីឡាស៊ីហ្គេម និងមេដាយប្រាក់ ទៅកាន់អ្នកគាំទ្រ ដែលនេះជាចរិតព្រហើនមួយបង្ហាញថាមិនមែនជាអ្នកកីឡានៃប្រទេសស៊ីវិល័យទេ ។ ដែនដីពិភពលោក មិនមែនមានតែកីឡាករថៃមួយក្រុម ឬម្នាក់នេះទេដែលខ្លាំង ។ កីឡាករណាក៏ដោយ កុំមានអំណួត កុំអាងថាខ្លួនខ្លាំង កុំតាំងចិត្តជាបងធំខាងកីឡា មានស៊ី មានសង ពិភពលោក ពិសេសស្ថាប័នកីឡាផ្សេងៗ មិនពេញចិត្តនឹងទង្វើបែបនេះទេ ពិសេសកម្ពុជាជាម្ចាស់ផ្ទះ ដែលខិតខំរៀបចំសាងនូវកីឡាសន្តិភាព មិត្តភាពជាមួយគ្នាក្នុងតំបន់ តែបែរជាចេញចរិតច្រឡោងខាម ហាក់មើលស្រាលដល់ម្ចាស់ផ្ទះ និងស្ថាប័នកីឡាអន្តរជាតិផ្សេងទៀតមិនមែនជាអ្នកកីឡា ។
យើងមិនទាន់ដឹងថា មានការដាក់ទណ្ឌកម្ម និងពិន័យចំពោះកូនក្រុមបាល់ទាត់ថៃបែបណានោះទេ ហើយម្យ៉ាងទៀត ២ឆ្នាំក្រោយ ស៊ីហ្គេមលើកទី ៣៣ ថៃធ្វើជាម្ចាស់ផ្ទះ នឹងទៅជាយ៉ាងណា ក្នុងពេលដែលការមកប្រកួតនៅទឹកដីប្រទេសផ្សេង កីឡាករមានចរិតចចកកាចបែបនេះទៅហើយ ចុះទម្រាំខ្លួនធ្វើជាម្ចាស់ផ្ទះទៀត នឹងធ្វើព្យុះ ធ្វើភ្លៀងយ៉ាងណា?
នេះជាគំរូមួយយ៉ាងអាក្រក់ ចរិតរបស់កីឡាករដែលទម្លាប់លេងកាច និងដើរខ្សែលើមិនមានការអត់ឱនឲ្យឡើយ គួរសហព័ន្ធនៃប្រទេសនោះដាក់ពិន័យ ។ ក្នុងនាមជាគ្រូបង្វឹក ឬក៏ស្ថាប័នដឹកនាំ មិនគួរពន្យុះឲ្យកូនក្រុមលេងធាក់គ្នា ឬក៏វ៉ៃគ្នានោះទេ ហើយក៏មិនត្រូវចូលខ្លួនមកឡូកឡំប្រតាយប្រតប់នឹងគេនោះដែរ ។
ម្យ៉ាងទៀត ក្នុងនាមជាកីឡាករបម្រុងមិនមានសិទ្ធិចូលទៅក្នុងទីលាន និងដេញវ៉ៃគេនោះដែរ ហើយក្នុងនាមជាអ្នកគាំទ្រអង្គុយមើល សូមកុំពន្យុះឲ្យកីឡាករវ៉ៃគ្នា ចោលរបស់របរចូលក្នុងទីលាន ឬក៏ខ្លួនរត់ចូលទីលានប្រកួតឲ្យប្រសាច ៕
ទស្សនាវីដេអូខាងក្រោម៖