ដោយ សូរ្យរិទ្ធ៖
រឿងមាត្រា ១១២ នៃក្រមព្រហ្មទណ្ឌថៃ នៅតែជារឿងស្មុគស្មាញ និងអូសបន្លាយជាយូរមកហើយ ក្នុងអាណត្តិរបស់ឧត្តមសេនីយ៍ ប្រាយុទ្ធ ច័ន្ទអូឆា កាន់តំណែង ។ គណបក្សប្រឆាំងទាំងតូច ទាំងធំ ក្នុងប្រទេសថៃ ទាមទារលុប ឬធ្វើវិសោធនកម្មរដ្ឋធម្មនុញ្ញទៅលើមាត្រា ១១២ នេះ ។
មកដល់ពេលនេះ ក្រោយបោះឆ្នោតសកលកាលពីថ្ងៃទី ១៤ ខែឧសភា ឆ្នាំ ២០២៣ គណបក្សប្រឆាំងធំៗ ដូចជា គណបក្សកាវក្លៃ របស់ ភិថាន លីមចារើនរ៉ាត់ ឈ្នះអសនៈសភា ១៥១ ភឿថៃបាន ១៤១ អសនៈ របស់កូន ថាក់ស៊ីន និងគណបក្សទី ៣ ភូមិចៃថៃ ៧១ ធ្វើឲ្យគណបក្សធំទាំងពីរខាងលើ មិនអាចបង្កើតរដ្ឋាភិបាលបាន ត្រូវស្វែងរកដៃគូចម្រុះដើម្បីចាត់តាំងរដ្ឋាភិបាលក្នុងរយៈពេល ៦០ ថ្ងៃ ។
មានរូបមន្តខ្លះដែលត្រូវគិតភ្លាមៗ តែមិនទទួលបានសម្រេចការ ទោះគណបក្សប្រឆាំងធំទាំងពីរ និងតូចៗប្រមាណ ៦ បូកចូលគ្នាបាន ៣១៣ សម្លេង (MOU នៅថ្ងៃទី ២៤ ឧសភា) នៅមិនគ្រប់គ្រប់ ៣៧៦ សម្លេង ។ គេត្រូវការចាំបាច់ ប្រសិនអសនៈ ៧១ របស់គណបក្សភូមិចៃថៃមកចូលរួម ប៉ុន្តែនៅត្រង់ថា បើគណបក្សធំទាំងពីរមិនលុបចោល ឬធ្វើវិសោធនកម្មមាត្រា១១២ នោះទេ ភូមិចៃថៃនឹងអាចចូលរួមបង្កើតរដ្ឋាភិបាលជាមួយ ។ នេះយើងទុកមួយឡែក មិននិយាយអំពីសមាជិកព្រឹទ្ធសភា ២៥០ ដែលជាកូនសោសំខាន់ក្នុងការរើសនាយករដ្ឋមន្ត្រីថ្មី ។
ប្រទេសថៃគ្រប់គ្រងដោយរបបរាជានិយមអាស្រ័យរដ្ឋធម្មនុញ្ញ ប៉ុន្តែព្រះមហាក្សត្រ មហា វ៉ាជីរ៉ាឡុងកន ដែលមានព្រះជន្មជាង ៧០ ព្រះវស្សា មានឥទ្ធិពលនយោបាយ និងសេដ្ឋកិច្ចយ៉ាងទូលំទូលាយ ។
ក្រុមអ្នករិះគន់និយាយថា អំណាចទាំងនោះមិនអាចយកមកជជែកវែកញែកបានទេ ដោយសារតែច្បាប់បរិហារកេរ្តិ៍ព្រះមហាក្សត្រ នៅមាត្រា១១២ នៃក្រមព្រហ្មទណ្ឌថៃ ផ្តន្ទាទោសដាក់ពន្ធនាគារពី ៣ ទៅ ១៥ ឆ្នាំចំពោះជនណាម្នាក់ដែលត្រូវបានចាត់ទុកថាមានទោសពីបទបរិហារកេរ្តិ៍ ប្រមាថ ឬការគំរាមកំហែងសមាជិករាជវង្សានុវង្សសំខាន់ៗ ។
កន្លងមក មនុស្សរាប់សិបនាក់ រួមទាំងយុវជនជំទង់ៗ ត្រូវបានចោទប្រកាន់ក្រោមច្បាប់នេះ ចាប់តាំងពីការតវ៉ាដ៏ធំដែលដឹកនាំដោយយុវជនបានផ្ទុះឡើងក្នុងឆ្នាំ២០២០ ។ បាតុកម្មទាំងនោះមានការអំពាវនាវជាសាធារណៈដែលមិនធ្លាប់មានពីមុនមកឲ្យធ្វើកំណែទម្រង់របបរាជានិយម និងការលុបចោលមាត្រា ១១២ រហូតត្រូវចាប់ឃុំខ្លួនយុវជនជាច្រើននាក់ និងទាមទារឲ្យដោះលែងអ្នកនយោបាយទាំងនោះ ។
របបរាជានិយមរបស់ប្រទេសថៃត្រូវបានគាំទ្រដោយកងទ័ពរាជានិយម ដែលបានបំបែកកិច្ចប្រឹងប្រែងដើម្បីកសាងលទ្ធិប្រជាធិបតេយ្យពេញលេញដោយធ្វើរដ្ឋប្រហារជោគជ័យចំនួន ១៣ដង ចាប់តាំងពីឆ្នាំ១៩៣២មក ។
គណបក្សភឿថៃ របស់លោកស្រី ផេតថងថាន ស៊ីនណាវ៉ាត់ ជាបេក្ខភាពនាយករដ្ឋមន្ត្រីដែលអាចប្រើឈ្មោះគ្រួសារដើម្បីទទួលបានសន្លឹកឆ្នោត។ ផ្ទុយទៅវិញ ការទទួលខុសត្រូវលើការកែទម្រង់ច្បាប់បានធ្លាក់ទៅលើគណបក្សកាវក្លៃ (Move Forward ឈានមុខ ឬចលនាឆ្ពោះទៅមុខ) ដែលជាគណបក្សចម្រើននិយម និងផ្តោតលើយុវជនជាកម្លាំង ។
ជាដំបូងគណបក្សចង់ឱ្យការផ្តន្ទាទោសតាមច្បាប់ ត្រូវបានកាត់បន្ថយមកត្រឹមរយៈពេលអតិបរមាមួយឆ្នាំ ប៉ុន្តែមេដឹកនាំគណបក្សនិយាយថា រហូតមកដល់ពេលនេះ ប្រធានសភាបានរារាំងសំណើនេះមិនឱ្យយកមកជជែកគ្នានៅក្នុងសភាទេ។
សមាជិកសភាគណបក្សកាវក្លៃមួយរូបថ្លែងថា «ដរាបណាយើងនៅតែមានច្បាប់ ១១២ នេះ ប្រទេសថៃគ្មានផ្លូវអាចក្លាយជាប្រទេសប្រជាធិបតេយ្យបានទេ, តើយើងអាចហៅខ្លួនយើងថា ជាប្រជាធិបតេយ្យដោយរបៀបណា នៅពេលដែលយើងមានច្បាប់ដែលហាមប្រាមមនុស្សមិនឲ្យនិយាយ ឬបញ្ចេញមតិដោយសេរីនោះ?» ៕