ដោយ សូរ្យរិទ្ធ៖
កាសែតបរទេសនិយាយថា នាងតូច គីម ជូ-អេ (Kim Joo-ae) កូនស្រីរបស់ គីម ជុង-អ៊ុន មេដឹកនាំកូរ៉េខាងជើង ដែលចាប់ផ្តើមបង្ហាញខ្លួនក្នុងកែវភ្នែកអ្នកសារព័ត៌មានឃើញ អាចជាទាយាទស្នងអំណាចរបស់គាត់ក្នុងអនាគត ។
«ស្លឹកឈើជ្រុះមិនឆ្ងាយពីគល់» ! អ្នកកាសែតយ៉ុនហាប់បានសរសេរថា លោក កូ យូ-ហាន ប្រធានស្ថាប័នកូរ៉េដើម្បីរួមរួមជាតិ ជាស្ថាប័នវិភាគអំពីកូរ៉េខាងជើងបានផ្តល់យោបល់នៅទីក្រុងសេអ៊ូលថា ផ្នែកចារកម្មរបស់កូរ៉េខាងត្បូងធ្លាប់បានជូនដំណឹងទៅរដ្ឋសភាកូរ៉េខាងត្បូងថា នាងតូច ជូ-អេ ជាកូនទីពីររបស់លោក គីម ជុង-អ៊ុន គាត់មានកូនបីនាក់ កូនច្បងជាប្រុស កូនទីពីរជាស្រី ឯកូនទីបីមិនដឹងថាភេទអ្វីនៅឡើយ ។ គាត់ថា ជូ-អេ ជាកូនទីពីរ ហើយចាប់ផ្តើមត្រៀមខ្លួនបន្តអំណាចពីឪពុក គីម ប៉ុន្តែនាងតូច ជាបេក្ខភាពម្នាក់ ក្នុងចំណោមច្រើននាក់ ដែលនឹងត្រូវធ្វើមេដឹកនាំកូរ៉េខាងជើងនាថ្ងៃអនាគត ។
ទីភ្នាក់ងារស៊ើបការណ៍សម្ងាត់ជឿថា ជូ-អេ ទើបមានអាយុ ១០ ឆ្នាំ បានបង្ហាញខ្លួនជាច្រើនដងជាមួយឪពុករបស់នាងនៅក្នុងព្រឹត្តិការណ៍ផ្សេងៗ បន្ទាប់ពីការបង្ហាញខ្លួនរបស់នាងជាលើកដំបូងកាលពីខែវិច្ឆិកាឆ្នាំមុន ក្នុងពេលនាងចូលរួមការធ្វើតេស្តមីស៊ីលអន្តរទ្វីប ។ ទោះបីជានាងបង្ហាញខ្លួនជាញឹកញាប់ក៏ដោយ អ្នកសង្កេតការណ៍នយោបាយជាច្រើនបានចាត់ទុកថា រូបនាងមានលទ្ធភាពតិចតួចក្នុងការស្នងមរតកនយោបាយ ដោយសារតែសង្គមកូរ៉េខាងជើងដែលគ្រប់គ្រងដោយបុរស និងពាក្យចចាមអារ៉ាមនោះ កូនប្រុសច្បងរបស់លោក គឹម គឺជាបុរស ៕