ឆ្លើយតបតាមការអញ្ជើញរបស់ ឯកឧត្តម កិត្តិនីតិ កោសលបណ្ឌិត ទេសរដ្ឋមន្ត្រី ឱម យ៉ិនទៀងប្រធានអង្គភាពប្រឆាំងអំពើពុករលួយ (អ.ប.ព.) នៃព្រះរាជាណាចក្រកម្ពុជា ឯកឧត្តម បណ្ឌិត ខាំផាន់ ផុមម៉ះថាត់ (KHAMPHANH PHOMMATHATH) ប្រធាននៃអាជ្ញាធរអធិការកិច្ចរដ្ឋនៃសាធារណរដ្ឋប្រជាធិបតេយ្យប្រជាមានិតឡាវ (SIA ទ្បាវ) បានដឹកនាំសមាជិកគណៈប្រតិភូចំនួន ៦រូប មានតួនាទីជាអនុប្រធាន អគ្គនាយក អគ្គនាយករង លេខាធិការ និងមន្ត្រី មកបំពេញទស្សនកិច្ចផ្លូវការនៅអង្គភាពប្រឆាំងអំពើពុករលួយកម្ពុជាចាប់ពីថ្ងៃទី២០-២៣ ខែមិថុនា ឆ្នាំ២០២៣។ ដំណើរទស្សនកិច្ចផ្លូវការនេះមានគោលបំណងសំខាន់ចំនួន ២ គឺ៖
១. កិច្ចពិភាក្សាការងារទ្វេភាគីដើម្បីផ្លាស់ប្តូរ និងចែករំលែកបទពិសោធន៍ទៅវិញទៅមក ដើម្បីចូលរួមចំណែក លើកកម្ពស់កិច្ចសហការទ្វេភាគីនិងបង្កើនការអនុវត្តការងារប្រឆាំងអំពើពុករលួយរបស់ភាគីនីមួយៗឲ្យកាន់តែមានប្រសិទ្ធភាព។
២. ចុះអនុស្សារណៈនៃការយោគយល់គ្នា (MoU) វាងភាគីទាំង២ សម្រាប់៥ឆ្នាំបន្តទៀត (២០២៣-២០២៨) ក្នុងគោលបំណងលើកស្ទួយ និងបង្កើនកិច្ចសហប្រតិបត្តិការក្នុងការប្រយុទ្ធប្រឆាំងអំពើពុករលួយ តាមរយៈការផ្លាស់ប្តូរដំណើរទស្សនកិច្ចផ្លូវការរវាងស្ថាប័នទាំងពីរ និងការផ្លាស់ប្តូរព័ត៌មាន ចំណេះដឹង និងបទពិសោធន៍ លើមូលដ្ឋាន នៃសមភាពការគោរពគ្នា និងផលប្រយោជន៍ទៅវិញទៅមក។
អ.ប.ព. កម្ពុជា និង SIA ឡាវ បានចុះហត្ថលេខាលើ MoU ស្តីពីការប្រយុទ្ធប្រឆាំងអំពើពុករលួយនៅក្នុងឆ្នាំ ២០១៣ នៅទីក្រុងវៀងច័ន្ទ នៃសាធារណរដ្ឋប្រជាធិបតេយ្យ ប្រជាមានិតឡាវ ហើយឆ្នាំ ២០២៣ នេះ ជាលើកទី៣ ដែល SIA ឡាវ បានបំពេញទស្សនកិច្ចផ្លូវការមកកាន់ អ.ប.ព.កម្ពុជា (លើកទី១ នៅឆ្នាំ២០១៤, លើកទី២ នៅឆ្នាំ ២០១៨) ។ ជាមួយគ្នានេះ អ.ប.ព. កម្ពុជា ក៏បានបំពេញទស្សនកិច្ចផ្លូវការទៅកាន់ SIA ទ្បាវកាលពីឆ្នាំ ២០១៦ ផងដែរ ។
ក្នុងឱកាសនេះដែរ គណៈប្រតិភូទ្បាវនឹងស្វែងយល់ពីការងារសំខាន់ៗរបស់ អ.ប.ព. មានដូចជា ការងារស៊ើបអង្កេត ការអប់រំបង្ការទប់ស្កាត់ ការងារថវិការបស់ អ.ប.ព. និងទស្សនាមូលដ្ឋានវប្បធម៌ (ព្រះបរមរាជវាំង សារមន្ទីរជាតិ) មូលដ្ឋានសេដ្ឋកិច្ច (ខេត្តព្រះសីហនុ កំពង់ផែស្វ័យយ័ត ក្រុងព្រះសីហនុ សារមន្ទីរព្រះស្រីឦសានវរ្ម័ន និងអាកាសយាន្តដ្ឋានអន្តរជាតិភ្នំពេញ ។
បន្ទាប់មក គណៈប្រតិភូនឹងចូលជួបសម្ដែងការគួរសមជាមួយ សម្ដេចកិត្តិសង្គហបណ្ឌិត ម៉ែន សំអន ឧបនាយករដ្ឋមន្ដ្រី រដ្ឋមន្ដ្រី ក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច (ទ.រ.ព.អ) និងជាអនុប្រធានក្រុមប្រឹក្សាជាតិប្រឆាំងអំពើពុករលួយផងដែរ ។
សូមបញ្ជាក់ថា SIA ឡាវ បានចូលរួមជាភាគីសង្កេតការណ៍នៅក្នុងកិច្ចប្រជុំថ្នាក់ដឹកនាំនៃភាគីអាស៊ីអាគ្នេយ៍ប្រឆាំងអំពើពុករលួយ (SEA-PAC) ចាប់តាំងពីថ្ងៃទី ១១ ខែ កញ្ញា ឆ្នាំ ២០០៧ និងបានចូលជាសមាជិក SEA-PAC (បច្ចុប្បន្ននេះហៅថា អង្គភាពប្រឆាំងអំពើពុករលួយអាស៊ាន (ASEAN-PAC)) នៅថ្ងៃទី៤-៦ ខែវិច្ឆិកា ឆ្នាំ២០១០ ដែល អ.ប.ព. កម្ពុជាធ្វើជាម្ចាស់ផ្ទះ (លើកទី១) នៃកិច្ចប្រជុំថ្នាក់ដឹកនាំ SEA-PAC លើកទី៦ នៅខេត្តសៀមរាប ហើយនៅថ្ងៃទី២២-២៣ ខែវិច្ឆិកា ឆ្នាំ២០២២ កន្លងទៅទីនេះ អ.ប.ព. កម្ពុជាក៏បានទទួលធ្វើជាម្ចាស់ផ្ទះ និងជាប្រធានបន្តវេនរបស់អាស៊ាន-ផេក (ASEAN-PAC) ជាលើកទី២ នៃកិច្ចប្រជុំថ្នាក់ដឹកនាំអាស៊ាន-ផេក លើកទី១៨ បន្ទាប់ពីភាគីប្រ៊ុយណេ ហើយនៅចុងឆ្នាំ២០២៣ នេះ SIA ទ្បាវ នឹងទទួលធ្វើជាម្ចាស់ផ្ទះ និងជាប្រធានបន្តវេនរបស់អាស៊ាន-ផេក បន្ទាប់ពី អ.ប.ព. កម្ពុជា ។
ASEAN-PAC ក៏ជាអង្គភាពភ្ជាប់ខ្លួនជាមួយអាស៊ាន ដែលបច្ចុប្បន្នមានភាគីជាសមាជិកចំនួន១០ ប្រទេសមកពីស្ថាប័នប្រឆាំងអំពើពុករលួយរបស់ប្រទេសអាស៊ានទាំង ១០ ។ នៅខែវិច្ឆិកា ឆ្នាំ២០២២ ប្រទេស ទីម័រ ទ្បេស្ត បានទទួលឋានៈប្រទេសសង្កេតការណ៍អាស៊ាន ហើយគណៈកម្មការប្រឆាំងអំពើពុករលួយរបស់ប្រទេស ទីម័រ ទ្បេស្ត នឹងត្រូវបានអញ្ជើញឲ្យចូលរួមនៅក្នុងកិច្ចប្រជុំ និងកម្មវិធី បណ្តុះបណ្តាលសមត្ថភាពរបស់អាស៊ាន-ផេក ក្នុងឋានៈជាភាគីសង្កេតការណ៍ ៕