ដោយ សូរ្យសែង៖
នៅរសៀលម៉ោង ១៤.០០ ថ្ងៃនេះ (២៦ កក្កដា) សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងសារពិសេសតាមទូរទស្សន៍ស្តីពីដំណើរការរៀបចំគណៈរដ្ឋមន្រ្តីនៅអាណត្តិថ្មី ។
សារសម្តេចតេជោថ្លែងថា «សម្តេចមិនទទួលតំណែងជានាយករដ្ឋមន្ត្រីក្នុងរដ្ឋាភិបាលថ្មីតទៅទៀតទេ ដោយប្រគល់តំណែងនេះទៅឲ្យនាយឧត្តមសេនីយ៍ ហ៊ុន ម៉ាណែត កូនប្រុសច្បងនៅថ្ងៃទី ២២ សីហា ខាងមុខនេះ ។ សារសម្តេចតេជោបន្តថា ការប្រគល់តំណែងដល់ឯកឧត្តម ហ៊ុន ម៉ាណែត ធ្វើឡើងស្របច្បាប់ ព្រោះគាត់ជាសមាជិកសភា ។ ប៉ុន្តែសម្តេចនៅជាប្រធានគណបក្សប្រជាជនកម្ពុជាដដែល ហើយព្រះមហាក្សត្រព្រះរាជានុញ្ញាតឲ្យសម្តេចជាប្រធានឧត្តមក្រុមប្រឹក្សារបស់ព្រះមហាក្សត្រទៀតផង ។
សម្តេចតេជោថ្លែងថា៖ «ចាប់តាំងពីខ្ញុំចូលកាន់តំណែងនៅថ្ងៃទី ១៤ ខែ មករា ឆ្នាំ ១៩៨៥ រហូតដល់ថ្ងៃទី ២២ ខែ សីហា ឆ្នាំ ២០២៣ ខ្ញុំបានកាន់តំណែងរយៈពេល ១៤ ០៩៩ ថ្ងៃ ឬ ២ ០១៤ សប្តាហ៍ ឬ ៤៦៣ ខែ ឬ ៣៨ ឆ្នាំ ៧ ខែ ៨ ថ្ងៃ»។
សម្តេចបន្តថា «ដូច្នេះខ្ញុំនៅតែមានឱកាសបម្រើប្រជាជន និងជួយរដ្ឋាភិបាលក្នុងការរក្សាសណ្តាប់ធ្នាប់ ស្ថិរភាព រួមទាំងការអភិវឌ្ឍន៍ប្រទេស ក៏ដូចជាការជួយព្រះមហាក្សត្រពេលទ្រង់មិននៅក្នុងប្រទេសនោះ» ។ សម្តេចនឹងមិនជ្រៀតជ្រែកក្នុងបញ្ហានាយករដ្ឋមន្ត្រីថ្មី ឬរដ្ឋាភិបាលថ្មីឡើយ ព្រោះមានការបែងចែកច្បាស់លាស់រវាងស្ថាប័ននីតិប្បញ្ញត្តិ និងនីតិប្រតិបត្តិ។
សម្តេចសូមស្នើដល់បណ្តារដ្ឋមន្ត្រីទាំងឡាយ ដែលមិនបានបន្តតំណែងក្នុងគណៈរដ្ឋមន្ត្រី អាណត្តិថ្មី សូមមេត្តាយោគយល់ ហើយត្រូវមានការលះបង់ ដើម្បីការរីកចម្រើនរបស់ប្រទេសជាតិ ។ សម្តេចតេជោបញ្ជាក់ថា រដ្ឋមន្ត្រីដែលមិនទទួលបានតំណែងក្នុងគណៈរដ្ឋមន្ត្រី អាចនឹងត្រូវធ្វើជាសមាជិករដ្ឋសភា ព្រឹទ្ធសភា ហើយខ្លះក៏អាចត្រូវតែងតាំងជាទីប្រឹក្សារាជរដ្ឋាភិបាលផងដែរ ។
«ខ្ញុំស្នើដល់បងប្អូនជារដ្ឋមន្ត្រីទាំងឡាយ ដែលមិនបន្តតំណែងក្នុងគណៈរដ្ឋមន្ត្រីតទៅទៀត សុំមេត្តាយោគយល់ យើងត្រូវតែមានការលះបង់មួយ ហើយអ្នកដែលលះបង់ធំជាងគេ គឺខ្លួនខ្ញុំ បើទោះបីជាកូនរបស់ខ្ញុំបន្តវេនក៏ដោយ ក៏ប៉ុន្តែអ្នកដែលធ្លាប់មានអំណាចបញ្ជា គឺអត់មានអំណាចបញ្ជា នោះគឺជាការលះបង់ហើយ ដូច្នេះសុំឱ្យរដ្ឋមន្ត្រីនានា ដែលមិនទទួលតំណែងជារដ្ឋមន្ត្រីតទៅទៀត អង្គុយនៅក្នុងសភាជាតំណាងរាស្ត្រ ព្រោះពួកយើងចាស់ៗណាស់ហើយ មួយចំនួនទៀតក៏អាចតែងតាំងជាទីប្រឹក្សារាជរដ្ឋាភិបាល និងមួយចំនួនទៀតក៏អាចក្លាយជាសមាជិកព្រឹទ្ធសភា នៅពេលខាងមុខផងដែរ ដែលយើងនឹងពិនិត្យមើលនៅពេលក្រោយ ព្រោះរដ្ឋមន្ត្រីមួយចំនួន មិនចូលកាន់ការជារដ្ឋមន្ត្រីតទៅទៀតទេ យើងអាចឈរឈ្មោះជាសមាជិកព្រឹទ្ធសភា ព្រោះសមាជិកព្រឹទ្ធសភារបស់យើងមានអាយុ៨០ឆ្នាំ ឬក៏គៀកនឹង៨០ឆ្នាំ ក៏ល្មមនឹងការចាកចេញផងដែរ»៕