ដោយ សូរ្យសែង៖
នេះជាលទ្ធផលជាក់ស្តែងមួយ នៃប្រទេសដែលគ្មានសន្តិភាព គ្មានសន្តិសុខ បង្កចលាចលធ្វើឲ្យប្រទេសធ្លាក់ក្នុងជម្លោះ ឈ្លោះដណ្តើមអំណាច និងការបង្ហូរឈាម ។
នៅប្រទេសអេក្វាឌ័រ តាមមន្ត្រីជាន់ខ្ពស់អេក្វាឌ័រនិយាយថា លោក ហ្វែរណង់ដូ វីលឡាវីសេនស៊ីអូ (Fernando Villavicencio) បេក្ខជនប្រធានាធិបតីអេក្វាឌ័រ ត្រូវបាញ់សម្លាប់ ក្នុងយុទ្ធនាការឃោសនាបោះឆ្នោតក្នុងទីក្រុងគីតូ ។
ទីភ្នាក់ងារសារព័ត៌មាន AFP រាយការណ៍ពីទីក្រុងគីតូ ប្រទេសអេក្វាឌ័រ នៅថ្ងៃទី១០ ខែសីហា នេះថា លោក ហ្គីឡឺម៉ូ ឡាស្សូ (Guillermo Lasso) ប្រធានាធិបតីស្តីទីអេក្វាឌ័រ Tweet បានបញ្ជាក់ពីការស្លាប់របស់លោក ឡាវីសេនស៊ីអូ ហើយបានប្រកាសថា ជនល្មើសនឹងមិនរត់រួចឡើយ ។
ប្រព័ន្ធផ្សព្វផ្សាយក្នុងស្រុកអេក្វាឌ័រផ្សាយថា របាយការណ៍នេះបានដកស្រង់សម្តីរដ្ឋមន្ត្រីមហាផ្ទៃអេក្វាឌ័រ ជួន ហ្សាប៉ាតា គេបាញ់សម្លាប់ក្នុងពេលត្រឡប់មកពីយុទ្ធនាការឃោសនាបោះឆ្នោត ។
លោក វីសេនស៊ីអូ ដែលជាអ្នកនយោបាយដើរខ្សែកណ្តាល អាយុ 59 ឆ្នាំ គឺជាបេក្ខជនម្នាក់ក្នុងចំណោមបេក្ខជនប្រាំបីនាក់នៅក្នុងជុំទីមួយនៃការបោះឆ្នោតប្រធានាធិបតីអេក្វាឌ័រ ដែលគ្រោងនឹងធ្វើឡើងនៅថ្ងៃទី២០ ខែសីហា ឆ្នាំ ២០២៣ ខាងមុខនេះ ។
លោក ឡាស្សូ បាននិយាយថា លោកបានកោះហៅមន្ត្រីសន្តិសុខជាន់ខ្ពស់បើកកិច្ចប្រជុំបន្ទាន់មួយ អំពីព្រឹត្តិការណ៍ដែលបានធ្វើឱ្យមានការភ្ញាក់ផ្អើលពេញប្រទេស ហើយច្បាប់នឹងត្រូវអនុវត្តយ៉ាងពេញលេញប្រឆាំងនឹងជនល្មើស ៕
រូបភាព AFP