សំណួរនេះ ត្រូវបាន អង្គភាពប្រឆាំងអំពើពុករលួយ(អ.ប.ព.) ឬ ACU បកស្រាយបំភ្លឺយ៉ាងច្បាស់នៅលើលិខិតជូនដំណឹងមួយ នាថ្ងៃទី ២២ កញ្ញា ឆ្នាំ ២០២៣ ។
ការប្រកាសទ្រព្យសម្បត្តិ និងបំណុល មានចែងក្នុងជំពូកទី ៤ មាត្រា ១៧ ស្តីអំពីសមាសភាពបុគ្គលដែលត្រូវប្រកាសទ្រព្យសម្បត្តិ និងបំណុល (ទំព័រ ១១ នៃច្បាប់ប្រឆាំងអំពើពុករលួយ) ចែងថា «ក្នុងពេលចូលកាន់មុខតំណែង បុគ្គលដូចខាងក្រោម (មាន ៧ ប្រភេទ) ត្រូវប្រកាសទ្រព្យសម្បត្តិរបស់ខ្លួនជាលាយលក្ខណ៍អក្សរ ឬ ជាទម្រង់អេឡិចត្រូនិក ទោះជាទ្រព្យសម្បត្តិនោះនៅក្រៅប្រទេសក្តី ឬក្នុងប្រទេសក្តី រួមទាំងបំណុលផង ហើយដាក់ជូនអង្គភាពប្រឆាំងអំពើពុករលួយដោយសាមីខ្លួនផ្ទាល់» ។
ក្នុងនេះចំណុចទី ៤ ចែងថា មន្ត្រីរាជការស៊ីវិល យោធា នគរបាល និងអ្នករាជការសាធារណៈផ្សេងទៀត ដែលត្រូវតែងតាំងដោយព្រះរាជក្រឹត្យ ឬអនុក្រឹត្យ ត្រូវប្រកាសទ្រព្យសម្បត្តិ និងបំណុល ។
ការប្រកាសនេះ មិនឲ្យលើសពី៣០ ថ្ងៃបន្ទាប់ពីទទួលបានការតែងតាំង ។ ក្នុងករណីលាលែង វិញ ក៏ត្រូវប្រកាសទ្រព្យសម្បត្តិ និងបំណុល ក្នុងរយៈពេល ៣០ ថ្ងៃយ៉ាងយូរដូចគ្នា ក្រោយមានព្រះរាជក្រឹត្យ ឬអនុក្រឹត្យ បញ្ចប់ភារកិច្ច ។
នៅក្នុងលិខិតបានបកស្រាយបំភ្លឺទៀតថា សម្រាប់ការលាលែងក្នុងរយៈពេល ៣០ ថ្ងៃ បន្ទាប់ពីទទួលបានការតែងតាំងដោយព្រះរាជក្រឹត្យ ឬអនុក្រឹត្យ អង្គភាពប្រឆាំងអំពើពុករលួយយល់ឃើញថា ឲ្យប្រកាសមួយលើកជាការស្រេច ដោយចាត់ទុកជាការប្រកាសលើកទី១ និងចុងក្រោយ មិនតម្រូវឲ្យប្រកាសតាមរបប ២ឆ្នាំទេ ៕