ស្ថានទូតចិនប្រចាំប្រទេសថៃ ចេញសេចក្តីថ្លែងការណ៍ពីការបាញ់ប្រហារនៅ ស្យាម ផារ៉ាហ្គន បណ្តាលឲ្យជនជាតិចិនស្លាប់ និងរបួស

ព័ត៌មានសង្គមថ្ងៃពុធ ទី04 ខែតុលា ឆ្នាំ2023 ម៉ោង 7:21 នាទី ល្ងាច

ដោយ សាវុឌ្ឍ៖

នៅថ្ងៃទី៤ ខែតុលានេះ ស្ថានទូតចិនប្រចាំប្រទេសថៃ បានចេញសេចក្តីប្រកាសមួយបញ្ជាក់ថា នៅថ្ងៃទី៣ ខែតុលា ឆ្នាំ២០២៣ មានករណីបាញ់ប្រហារនៅផ្សារទំនើប Siam Paragon ដែលបណ្តាលឲ្យជនជាតិចិនម្នាក់បានស្លាប់ និងម្នាក់ទៀតរងរបួស ។

អ្នករបួសដែលជាជនជាតិចិន ត្រូវបានស្ថានទូតចិនធ្វើការជាមួយភាគីថៃ ដើម្បីស៊ើបអង្កេតពីស្ថានការណ៍នោះ ហើយបានទៅសួរសុខទុក្ខអ្នករបួសនៅមន្ទីរពេទ្យ និងស្គាល់អត្តសញ្ញាណអ្នកស្លាប់ និងអ្នករបួសកំពុងសម្រាកព្យាបាល ក្នុងនេះ លោក សេដ្ឋា ថាវីស៊ីន នាយករដ្ឋមន្ត្រីថៃ ក៏បានទៅសួរសុខទុក្ខជនជាតិចិនដែលរងរបួសនៅមន្ទីរពេទ្យ និងមានការបារម្ភពីសុវត្ថិភាពដល់ភ្ញៀវចិនផងដែរ ។

ភាគីថៃសន្យានឹងធ្វើការស៊ើបអង្កេត និងដោះស្រាយករណីនេះឲ្យបានឆាប់តាមច្បាប់ និងពង្រឹងការគ្រប់គ្រងសុវត្ថិភាពសាធារណៈ ដើម្បីផ្តល់ជូននូវបរិយាកាសដែលអាចទុកចិត្តបាន និងសុវត្ថិភាពសម្រាប់ប្រជាជនចិនដែលធ្វើដំណើរទៅកម្សាន្តនៅប្រទេសថៃ ។

សូមបញ្ជាក់ថា ប្រជាជនចិនបានសម្រុកមកកម្សាន្តនៅប្រទេសថៃ ក្នុងពេលឈប់សម្រាកវិស្សមកាលជាច្រើនថ្ងៃ ហើយត្រូវបាននាយករដ្ឋមន្ត្រីថៃ យកចិត្តទុកដាក់ទទួលស្វាគមន៍ដល់អាកាសយានដ្ឋាន ក្នុងន័យទាក់ទាញភ្ញៀវទេសចរណ៍ចិនឲ្យចូលមកកម្សាន្តក្នុងប្រទេសខ្លួន តែជារឿងស៊យ បានជួបនូវហេតុការណ៍បាញ់ប្រហារពីក្មេងប្រុសអាយុ ១៤ ឆ្នាំ ដែលរហូតមកដល់ពេលនេះ នៅមិនទាន់ដឹងពីមូលហេតុនៃការបាញ់នៅឡើយ ហេតុការណ៍នោះ ធ្វើឲ្យមនុស្សស្លាប់ ៣ នាក់ និងរបួស ៥ នាក់ ក្នុងនេះមានជនជាតិចិនផងដែរ ៕