ដោយ ម៉ារ៉ា៖
លោក យ៉ូអាហ្វ ក័នឡាន់ រដ្ឋមន្ត្រីក្រសួងការពារអ៊ីស្រាអែល បានប្រកាសនៅម៉ោង ១៦.៣០ នាទីថ្ងៃនេះ(៩ តុលា) ថា កងទ័ពអ៊ីស្រាអែលបានឡោមព័ទ្ធជ្រោយកាហ្សា គ្រប់ផ្លូវចេញ-ចូលហើយ ។
រដ្ឋមន្ត្រីអ៊ីស្រាអែលក៏បានប្រាប់ដែរថា បានកាត់ផ្តាច់ចរន្តអគ្គិសនី ហើយបានបញ្ឈប់ទាំងស្រុងនូវការផ្តល់ស្បៀងអាហារ និងឥន្ធនៈចូលទៅក្នុងទឹកដីជ្រោយកាហ្សា ស្ទ្រីបទាំងស្រុង ។
លោក ក័នឡាន់ បានបញ្ជាក់ទៀតថា ផែនការនេះនឹងក្លាយជាផ្នែកមួយនៃសង្រ្គាមដើម្បីប្រយុទ្ធជាមួយ «ក្រុមមនុស្សឃោរឃៅ» ។
Gaza Strip គឺជាផ្នែកមួយនៃប៉ាឡេស្ទីន ស្ថិតក្រោមការគ្រប់គ្រងរបស់ក្រុមប្រដាប់អាវុធហាម៉ាស។ មួយទៀតគឺ វេសបេង (West Bank) ឬច្រាំងខាងលិចនៃទន្លេហ្សកដង់ (Jordan) ត្រូវបានគ្រប់គ្រងដោយរដ្ឋាភិបាលប៉ាឡេស្ទីន ប៉ុន្តែតំបន់នេះមានប្រជាជនរស់នៅដោយអ្នកតាំងទីលំនៅជាជនជាតិអ៊ីស្រាអែលភាគច្រើន។
ក្រុមហាម៉ាស់បានបើកការវាយលុកចុងក្រោយបំផុតរបស់ខ្លួនប្រឆាំងនឹងអ៊ីស្រាអែលដោយមិនឲ្យឱកាសអ៊ីស្រាអែលត្រៀមខ្លួនមុនកាលពីថ្ងៃសៅរ៍ ជាមួយនឹងការបាញ់រ៉ុក្កែតចំនួន 5,000 គ្រាប់ចូលទៅក្នុងទឹកដីអ៊ីស្រាអែល ដីគោក សមុទ្រ និងផ្លូវអាកាស ដែលបានបាញ់ទៅឆ្ងាយដល់ទីក្រុងតេវអាវីវ (Tel Aviv) របស់អ៊ីស្រាអែល ដែលមានចម្ងាយប្រហែល 70 គីឡូម៉ែត្រពី កាហ្សា ស្ទ្រីប ។មិនត្រឹមតែប៉ុណ្ណោះទេ សមាជិកក្រុមហាម៉ាស បានចូលក្នុងទឹកដីអ៊ីស្រាអែល សម្លាប់ និងចាប់មនុស្សផងដែរ។
តំណាងក្រុមហាម៉ាស់បាននិយាយថា៖ ប្រតិបត្តិការនេះជាការឆ្លើយតបទៅនឹងការគាបសង្កត់របស់អ៊ីស្រាអែលរាប់ទសវត្សរ៍មកហើយ មកលើប្រជាជនប៉ាឡេស្ទីន និងចង់រំដោះប៉ាឡេស្ទីនចេញពីការកាន់កាប់ទឹកដីរបស់ពួកគេ ។ ដូច្នេះ ខ្ញុំសូមអំពាវនាវដល់អ្នករាល់គ្នា មិនមែនតែនៅហ្គាហ្សា ស្ទ្រីប ទេ ទាំងនៅវេសបេង និងប្រជាជាតិអារ៉ាប់ផ្សេងទៀត ចូរក្រោកឡើងប្រយុទ្ធនឹងអ៊ីស្រាអែល ៕