ដោយ សូរ្យសែង៖
អ្នកនាំពាក្យកងកម្លាំងការពារអ៊ីស្រាអែល (IDF) លោក ចូណាថាន ខនរីខឺស (Jonathan Conricus) បាននិយាយថា អ៊ីស្រាអែលនឹងបញ្ចប់សង្គ្រាមរបស់ខ្លួននៅតំបន់ហ្គាហ្សា លុះត្រាតែក្រុមហាម៉ាស់សុំចុះចាញ់ទាំងស្រុង រួមជាមួយនឹងការ ដោះលែងចំណាប់ខ្មាំងអ៊ីស្រាអែលផងដែរ ។
អ្នកនាំពាក្យកងកម្លាំងការពារអ៊ីស្រាអែល (IDF) លោក ចូណាថាន ខនរីខឺស (Jonathan Conricus)
«ប្រសិនបើក្រុមហាម៉ាស់ចាកចេញពីកន្លែងលាក់ខ្លួននៅក្រោមផ្ទះប្រជាជន ហើយបានយល់ព្រមដោះលែងចំណាប់ខ្មាំងរបស់យើងទាំង ២១២ នាក់ ចុះចាញ់ដោយគ្មានលក្ខខណ្ឌ សង្គ្រាមនឹងបញ្ចប់ ប៉ុន្តែប្រសិនបើពួកគេមិនធ្វើតាម យើងនឹងត្រូវចូលទៅ ហើយធ្វើទាល់តែទទួលបានជោគជ័យ»។ លោក Conricus បាននិយាយ។
យោធាអ៊ីស្រាអែលបានចេញសេចក្តីថ្លែងការណ៍មួយដោយបញ្ជាក់ដូច្នេះថា កងកម្លាំងជើងគោករបស់អ៊ីស្រាអែលបានបើកការវាយលុកកម្រិតជ្រៅចូលក្នុងតំបន់ហ្គាហ្សាកាលពីយប់មិញ ។
«ទ័ពថ្មើរជើង និងរថក្រោះរបស់យើងបានបើកការវាយប្រហារយ៉ាងជ្រៅទៅក្នុងតំបន់ហ្គាហ្សាកាលពីយប់មិញ។ ប្រតិបត្តិការ និងការវាយប្រហារតាមអាកាសបែបនេះ គឺជាផ្នែកមួយនៃការត្រៀមខ្លួនសម្រាប់ដំណាក់កាលបន្ទាប់នៃសង្គ្រាម»។
ដោយ ទីភ្នាក់ងារព័ត៌មាន InfoQuest (២៣ តុលា ២៣)