ដោយ សាវុឌ្ឍ៖
បើតាម AFP នៅថ្ងៃសៅរ៍ ទី១១ ខែវិច្ឆិកា ឆ្នាំ២០២៣ បានឱ្យដឹងថា ដោយសារភាពចលាចលក្នុងការតវ៉ារបស់កម្មករកាត់ដេរនៅប្រទេសបង់ក្លាដែស ធ្វើឲ្យប៉ូលីសបានប្រើគ្រាប់កាំភ្លើងជ័រ និងឧស្ម័នបង្ហូរទឹកភ្នែក បាញ់មកលើពួកគេ ដើម្បីបំបែកការតវ៉ា ដែលកាន់តែមានអំពើហិង្សា ។
ថ្មីៗនេះ រោងចក្រកាត់ដេរបង់ក្លាដែសបានបិទរោងចក្រចំនួន ១៥០ ដោយគ្មានកំណត់។ ប៉ូលិសបានដាក់ការចោទប្រកាន់លើកម្មករ ១១.០០០ នាក់ដែលជាប់ពាក់ព័ន្ធនឹងការតវ៉ាដោយហិង្សាទាមទារដំឡើងប្រាក់ខែអប្បបរមា។
បច្ចុប្បន្ន រោងចក្រកាត់ដេរចំនួន 3,500 របស់ប្រទេសបង់ក្លាដែស មានចំណែកប្រហែល 85% នៃចំនួនទឹកប្រាក់ 55 ពាន់លានដុល្លាររបស់ខ្លួនក្នុងការនាំចេញប្រចាំឆ្នាំ ដោយផ្គត់ផ្គង់ផលិតផលដល់ម៉ាកល្បីៗមួយចំនួនរបស់ពិភពលោករួមមាន Levi's, Zara និង H&M ជាដើម ។
ប៉ុន្តែប្រាក់ឈ្នួលរបស់កម្មករជាច្រើនក្នុងចំណោម ៤លាននាក់ក្នុងវិស័យនេះ ដែលភាគច្រើនជាស្ត្រី អាចរកប្រាក់ចំណូលបានក្នុងអត្រាទាបបំផុតជាមួយនឹងប្រាក់ខែចាប់ផ្តើមត្រឹមតែ 8,300 taka ស្មើ 75 ដុល្លារអាមេរិក។
ការតវ៉ាដោយហិង្សាទាមទារដំឡើងប្រាក់ឈ្នួលអប្បបរមាបានផ្ទុះឡើងកាលពីខែមុន។ យ៉ាងហោចណាស់មានកម្មករ៣នាក់បានស្លាប់ និងជាង ៧០រោងចក្រត្រូវបានរុះរើ ឬខូចខាតចាប់តាំងពីពេលនោះមក។
កាលពីសប្តាហ៍មុន រដ្ឋាភិបាលបានប្រកាសដំឡើងប្រាក់ឈ្នួល 56.25% ប្រមាណ 12,500 Taka ក្នុងមួយខែ ស្មើ 113$ សម្រាប់កម្មករកាត់ដេរចំនួន 4 លាននាក់របស់ប្រទេស ប៉ុន្តែក្រុមការងារចង់បានការដំឡើងដល់ ៣០០% ពីមូលដ្ឋានប្រាក់ឈ្នួលដើម ឬចាប់ផ្តើមពី 23,000 taka ក្នុងមួយខែ (208$) ហើយសហជីពដែលតំណាងឱ្យពួកគេបានច្រានចោលការប្រកាសរបស់គណៈកម្មាធិការអំពីការដំឡើងប្រាក់ឈ្នួល។
កម្មករ ១៥.០០០ នាក់បានប៉ះទង្គិចជាមួយប៉ូលិសនៅលើផ្លូវធំមួយ ហើយបានចូលលុកលុយ និងរឹបអូសរោងចក្រ Tusuka Group ដែលជារោងចក្រឈានមុខគេ រួមជាមួយនឹងរោងចក្រចំនួន ១២ផ្សេងទៀត។
អធិការប៉ូលិសបង់ក្លាដែស លោក Mosharraf Hossein បានប្រាប់ AFP ថា «ប៉ូលីសបានចោទប្រកាន់មនុស្សមិនស្គាល់អត្តសញ្ញាណចំនួន 11,000 នាក់ ជុំវិញការវាយប្រហាររោងចក្រកាត់ដេរ Tusuka» ។
មានសេចក្តីរាយការណ៍ថា រោងចក្រកាត់ដេរចំនួន 150 បានបិទទ្វារដោយគ្មានកំណត់នៅក្នុងទីក្រុងឧស្សាហកម្មសំខាន់ៗ ដូចជា Achulia និង Ghazipur ទាំងពីរនេះស្ថិតនៅភាគខាងជើងនៃទីក្រុងដាកា នេះដោយសារអ្នកផលិតបារម្ភថា កូដកម្មខុសច្បាប់មួយផ្សេងទៀតនឹងបង្កការខូចខាតច្រើនជាងការបញ្ឈប់ប្រតិបត្តិការ៕