ដោយ សូរ្យសែង ៖
«ខ្ញុំសូមណែនាំដល់ក្រសួង និងស្ថាប័នពាក់ព័ន្ធទាំងអស់ ត្រូវតែរួមគ្នាដើម្បីទប់ស្កាត់ការនាំចូលសាច់បង្កក ការធ្វើនេះគឺដើម្បីលើកកម្ពស់ការចិញ្ចឹមជ្រូកក្នុងស្រុក»។ សម្តេចធិបតីមានប្រសាសន៍បែបនេះ ក្នុងឱកាសអញ្ជើញជាអធិបតី «បិទសន្និបាតបូកសរុបការងារឆ្នាំ២០២៣ និងលើកទិសដៅការងារបន្ត ឆ្នាំ២០២៤ របស់ក្រសួងកសិកម្ម រុក្ខាប្រមាញ់ និងនេសាទ នារសៀល ថ្ងៃអង្គារ ទី៣០ ខែមករា ឆ្នាំ២០២៤។
សម្ដេចធិបតី បានជំរុញឱ្យបង្វែរអ្នកទិញសាច់បង្កកទៅផ្សារភ្ជាប់ ជាមួយប្រជាពលរដ្ឋចិញ្ចឹមសត្វវិញ និងណែនាំដល់ក្រសួងកសិកម្មជួយកសិករឱ្យផលិតដែលចំណាយថ្លៃដើមទាប ហើយរក្សាស្ថេរភាពលក់នៅលើទីផ្សារ និងត្រូវពង្រឹងទីផ្សារចាស់ គុណភាព និងតម្លៃ។ ជាមួយគ្នានេះ សម្តេចធិបតី ហ៊ុន ម៉ាណែត ចង់ឃើញការពង្រឹងការវិនិយោគក្នុងស្រុកលើវិស័យកសិកម្ម ដើម្បីធ្វើការនាំចេញទៅក្រៅប្រទេស។
ប្រសាសន៍សម្តេចធិបតីបែបនេះ ពិតជាគាប់ចិត្តរបស់ប្រជាពលរដ្ឋ ដែលចង់បានជាយូរមកហើយ ដើម្បីឲ្យសាច់សត្វគ្រប់ប្រភេទដែលខ្លួនប្រឹងចិញ្ចឹមអស់ដើមច្រើន តែទីផ្សារចង្អៀត ហើយតម្លៃថោក ក្នុងពេលដែលមានការេនាំចូលពីប្រទេសជិតខាងយ៉ាងសន្ធឹក ៕