Admin សូរ្យរិទ្ធ៖
ក្រោយបានទទួលសារសំឡេងពិសេសបន្ទាន់ របស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា ដែលសែរពីតៗគ្នានៅរសៀលថ្ងៃទី ១៤ ខែមេសានេះ និងរង់ចាំចេញសេចក្តីប្រកាសរបស់រាជរដ្ឋាភិបាលទាំងយប់ជ្រៅ យើងក៏សម្រេចចេញព័ត៌មាននៅព្រឹកថ្ងៃទី ១៥ មេសា ទោះចេញក្រោយរាងយូរបន្តិច ក៏មិនជាបញ្ហាអ្វី អ្វីដែលសំខាន់គឺនៅបិទខ្ទប់១៣ថ្ងៃទៀត ដូច្នេះសូមអានសេចក្តីប្រកាសទាំងស្រុងនៅខាងក្រោមដែលមាន ៧ ទំព័រ ។
ក្រោយបានទទួលការចែកចាយសារនេះភ្លាមៗ តាមបណ្តាញសង្គមសែរពី Telegram មួយទៅមួយ ប្រជាជនក៏ចេញទៅរកកន្លែងលក់ដូរ ទីផ្សារតូច ធំ ផ្សារតាមថ្នល់ ហើយចាប់ផ្តើមជ្រួលជ្រើមទៅរកទិញគ្រឿងឧបភោគ បរិភោគ បន្លែ សាច់ គ្រឿងទេស អង្ករ ស៊ុតមាន់ ស៊ុតទាដាច់ជាងគេ ម្នាក់ៗ ២០-៣០-៥០គ្រាប់ ហើយមានការប្រជ្រៀតឡើងណែន សឹងភ្លេចពាក្យ «៣ការពារ ៣កុំ» ឯអ្នកលក់សប្បាយលក់ណាស់ ទំនិញខ្លះមានតម្លៃនឹង ខ្លះក៏ឡើង តែកាលថ្ងៃសែនទីមួយសម្រុកទិញផ្លែឈើ កម្រងផ្កា សែនថ្វាយទេវតា ឡើងថ្លៃគួរសម តែបន្ទាប់មកត្រូវបានមន្ត្រីជាន់ខ្ពស់ក្រសួងសុខាភិបាល សូមឲ្យរក្សាភាពស្ងៀមស្ងាត់ ។
ក្រោយមកបន្តិច លោកជំទាវ ឱ វណ្ណឌីន អ្នកនាំពាក្យក្រសួងសុខាភិបាល និងជារដ្ឋលេខាធិការក្រសួងសុខាភិបាល ផ្ញើសារសំណេរដោយផ្ទាល់ថា «ខ្ញុំសូមអំពាវនាវជូនដល់បងប្អូនប្រជាពលរដ្ឋទាំងអស់ សុំរក្សាភាពស្ងប់ស្ងៀម ជាជាងសម្រុកទៅផ្សារដែលបង្កើតបានជាភាពកកកុញមនុស្សច្រើន ជម្រុញនូវហានិភ័យកាន់តែខ្ពស់ឡើងថែមទៀតដល់បងប្អូនក្នុងការឆ្លងវីរុសកូវីដ-១៩ ។ បងប្អូនអាចនឹងឆ្លងជំងឺកូវីដ-១៩ បានគ្រប់ពេលនៅពេលដែលនៅកន្លែងប្រជ្រៀតគ្នាខ្លាំងពេកនោះ ឬកន្លែងដែលមិនមានគម្លាតគ្នាពីមួយម៉ែត្រកន្លះឡើង ហើយមិនមានពាក់ម៉ាស់ និងលាងដៃញឹកញាប់ទេនោះ ។ សូមត្រូវចងចាំថា វីរុសកូវីដ-១៩ សប្បាយចិត្តខ្លាំង ចូលចិត្តខ្លាំង និងពេញចិត្តជាទីបំផុត ក្នុងការដើរចម្លងពីបុគ្គលម្នាក់ទៅម្នាក់ទៀត បានយ៉ាងងាយស្រួលដោយមិនមានរបាំងហាមឃាត់ ឬសម្លាប់វីរុសដ៏សាហាវនេះនោះ ។ សុំជឿជាក់លើវិធានការរបស់រាជរដ្ឋភិបាល ដែលមានការគិតគូរត្រឹមត្រូវ នឹងមិនបិទជិតឈឹងមិនឱ្យមានវិធីក្នុងការរកម្ហូបអាហារទទួលទាននោះឡើយ ។ សូមចូលរួមអនុវត្តវិធានការ ៣ការពារ + ៣កុំ + ចាក់វ៉ាក់សាំងការពារកូវីដ-១៩ + ចូលឆ្នាំនៅផ្ទះ ដើម្បីឈ្នះការវ៉ៃលុកកូវីដ-១៩ ដោយបុគ្គលមានការទទួលខុសត្រូវខ្ពស់សម្រាប់សុខភាពផ្ទាល់ខ្លួន សុខភាពគ្រួសារខ្លួន និងដើម្បីសហគមន៍យើង ៕