ដោយ សូរ្យសែង៖
ដូចអ្នកដឹងស្រាប់ហើយការផ្ទុះឡើងនៃវីរុសកូរ៉ូណា ឬកូវីដ-១៩ បានផ្តើមឡើងនៅពីទីក្រុងវូហាន ប្រទេសចិន ដោយលើកដំបូងវាបានចាប់ផ្តើមនៅចុងឆ្នាំ ២០១៩ ហើយឥឡូវនេះវាមានរយៈពេលជិត ២ ឆ្នាំហើយនៅតែរាតត្បាតពាសពេកពិភព លោក ។
ប្រសិនបើនរណាម្នាក់តាមដានព័ត៌មានអំពីការផ្ទុះឡើងនេះ ពួកគេនឹងឃើញរូបភាពនៃទីក្រុងវូហានត្រូវបិទទ្វារមុនគេ ទីក្រុងស្ងាត់ជ្រងំ ប៉ុន្តែពេលវេលាកន្លងទៅ ស្ថានភាពបានវិលមករកភាពធម្មតាវិញ ដោយសារតែសប្តាហ៍មុននៅទីក្រុង វូហានមានមហោស្រពតន្ត្រី (Wuhan Strawberry Music Festival ដោយមានមនុស្សរាប់ម៉ឺននាក់ចូលរួម ហើយមិនចាំបាច់ពាក់ម៉ាសផង ។ នេះជាការប្រគុំតន្រ្តីលើកដំបូងចាប់តាំងពីមានការផ្ទុះឡើងនៃមេរោគឆ្លងថ្មី ។
«កាលពីឆ្នាំមុន យើងជនជាតិវូហានបានរងផលប៉ះពាល់យ៉ាងធ្ងន់ធ្ងរដោយសារវីរុសកូរ៉ូណា... វាមិនងាយស្រួលទេសម្រាប់ពួកយើងដើម្បីឈានដល់ចំណុចចនេះ ប្រជាជនដែលរស់នៅទីនេះត្រូវចំណាយច្រើនដើម្បីជាថ្នូរនឹងលទ្ធផល ហើយខ្ញុំពិត ជារំភើបណាស់ដែលបានមកនៅទីនេះ» ហ្គាវ យូចិន និស្សិតអាយុ ២៣ ឆ្នាំដែលអាស្រ័យនៅទីក្រុងវូហានពោល ។
មហោស្រពតន្រ្តីនេះនឹងត្រូវប្រារព្ធធ្វើឡើងរយៈពេល ២ ថ្ងៃជាប់គ្នា រួមជាមួយថ្ងៃឈប់សម្រាកជាតិគឺទិវាឧសភា (May Day) ដែលនាំសិល្បករមួយចំនួនធំមកចូលរួមក្នុងព្រឹត្តិការណ៍នេះ ។
តាមរបាយការណ៍ឲ្យដឹងថា បច្ចុប្បន្នគ្មានអ្នកឆ្លងមេរោគបន្ថែមថ្មីទៀតឡើយ ក្រោយពីវិធានការ LockDown យ៉ាងតឹងរឹងរយៈពេលមួយឆ្នាំកន្លងមក ។ ពីទិន្ន័យរបស់ផ្នែកសុខាភិបាលប្រទេសចិនឲ្យដឹងថា នៅទូទាំងប្រទេសចិន ផែនដីធំមានអ្នកឆ្លងកូវីដ-១៩ ទាំងអស់តែ ១៦ នាក់ប៉ុនណោះ ទាំងអស់នោះសុទ្ធតែជាអ្នកទេសចរណ៍មកពីបរទេសទាំងអស់ ។
ក៏មានរបាយការណ៍បន្ថែមទៀតផងដែរថា ឥឡូវនេះប្រជាជនចិនត្រូវបានចាក់វ៉ាក់សាំងប្រឆាំងនឹងកូវីដ-១៩ ករណីសរុបចំនួន ២៦៥ លាននាក់ ហើយនឹងកើនឡើងកាន់តែច្រើនឡើងៗ ៕