ប្រភពពីវេបសាយ springnews
ដោយ សាវុឌ្ឍ
CNN បានឲ្យដឹងថា អ្នកការទូតរបស់សហរដ្ឋអាមេរិកក្នុងប្រទេសឥណ្ឌា បានឆ្លងកូវីដ-១៩ ចំនួនជាង ១០០នាក់កាលពីប៉ុន្មានសប្តាហ៍កន្លងទៅ ក្នុងនេះមានអ្នកធ្វើការឲ្យស្ថានទូតស្លាប់ ២ នាក់ ។ សហរដ្ឋអាមេរិកមានស្ថានទូតប្រចាំនៅទីក្រុងញូវដេលី និងមានស្ថានកុងស៊ុលចំនួន ៥ ទៀតនៅទូទាំងឥណ្ឌា ។
សហរដ្ឋអាមេរិកបានបញ្ជូនវ៉ាក់សាំងទៅឲ្យបុគ្គលិកការទូតនៅក្រៅបរទេស មានដូចជា ទីក្រុងកាប៊ុល ប្រទេសអាហ្វហ្គានីស្ថាន និងទីក្រុងបាដាត ប្រទេសអ៊ីរ៉ាក់ ជាដើម ។
រឿងនេះ លោក នឺត ហ្វ្រៃស៍ អ្នកនាំពាក្យក្រសួងការបរទេសសហរដ្ឋអាមេរិក បានបដិសេធចំពោះការរាតត្បាតមេរោគដល់អ្នកការទូតរបស់ខ្លួនក្នុងឥណ្ឌា ។
មុននេះ ក្រសួងការបរទេសសហរដ្ឋអាមេរិក បានយល់ព្រមឱ្យមានការជម្លៀសអ្នកការទូតអាមេរិក និងក្រុមគ្រួសាររបស់ពួកគេដែលកំពុងបម្រើនៅក្នុងប្រទេសនៅជុំវិញពិភពលោក នៅក្នុងករណីដែលមានហានិភ័យខ្ពស់នៃមេរោគកូវីដ-១៩ មុនពេលនយោបាយនោះត្រូវបានលុបចោល និងអនុវត្តដោយឈរលើមូលដ្ឋានបុគ្គលក្រសួងការបរទេសអាមេរិកបច្ចុប្បន្ន ការជម្លៀសបុគ្គលិកចេញពីប្រទេសឥណ្ឌាមិនទាន់ត្រូវបានអនុញ្ញាតទេ ។
ក្នុងន័យនេះស្ថានការណ៍កូវីដ-១៩ នៅក្នុងប្រទេសឥណ្ឌាកំពុងរាលដាលយ៉ាងកាចសាហាវ ដោយអង្គការសុខភាពពិភព (WHO) បញ្ជាក់ថា បានបញ្ជូនភ្នាក់ងារអង្គការសុខភាពពិភពលោកចំនួន ២.៦០០ នាក់ទៅជួយប្រទេសឥណ្ឌា ដែលចំនួនអ្នកឆ្លងប្រចាំថ្ងៃនៅក្នុងប្រទេសឥណ្ឌានៅតែកើនលើសចំនួន ៣០ ម៉ឺននាក់សម្រាប់ថ្ងៃទី ៦ ជាប់ៗគ្នា ខណៈដែលមន្ត្រីជាន់ខ្ពស់ពីររូបនៃក្រសួងសុខាភិបាលនៃប្រទេសឥណ្ឌាបានបានឆ្លងកូវីដ-១៩ ៕