អត្ថបទ សរ្យសែង៖
តួលេខអ្នកឆ្លងថ្ងៃនេះពិតជាគួរឲ្យរំភើប និងរីករាយណាស់ ដោយចំនួនឆ្លងកូវីដ-១៩ថ្មីមាន ៣៣៥នាក់ (សហគមន៍ ៣២៨នាក់ មកពីក្រៅ ៧នាក់) ហើយអ្នកជាសះស្បើយមានដល់ ៨៧៣ នាក់ និងគ្មានអ្នកស្លាប់ ។ នេះបើតាមរបាយការណ៍របស់ក្រសួងសុខាភិបាល នៅថ្ងៃទី១៥ ឧសភា ឆ្នាំ ២០២១ ។
អ្វីដែលគួរឲ្យសរសើរ គឺថ្វីដៃគ្រូពេទ្យខ្មែរទាំងអស់ ទាំងស៊ីល ទាំងកងទ័ព ដែលយកជំនាញ យកគុណធម៌ សីលធម៌វិជ្ជាជីវៈ និងចុងក្រោយយកបេះដូង មកព្យាបាលប្រជាជនអ្នកជំងឺ ។ ម្យ៉ាងការមានយកចិត្តទុកដាក់វិធានការយ៉ាងរហ័សរហួន របស់ក្រសួងសុខាភិបាល ក្រោមការដឹកនាំដ៏ឈ្លាសវៃ ចក្ខុវិស័យដ៏ត្រឹមត្រូវ របស់ប្រមុខរាជរដ្ឋាភិបាលកម្ពុជា គឺសម្តេចតេជោ ហ៊ុន សែន នាយករដ្ឋមន្ត្រី ដែលតាមដានសភាពការណ៍ការរាលដាលតាំងពីដំបូងៗយ៉ាងម៉ត់ចត់ និងមានវិធានការដ៏ប្រពៃដើម្បីការពារមេរោគកូវីដ-១៩ «៣ការពារ ៣កុំ» ។
មុននេះ យើងសង្កេតឃើញថា សន្ទុះនៃការឆ្លងក្នុងប្រទេសកម្ពុជា គ្រាន់តែរយ:ពេលជាង ១ ខែកម្ពុជាមានអ្នកឆ្លងសរុបរហូតជាង ២ ម៉ឺននាក់ ដែលខុសពីឆ្នាំ ២០២០ យើងមិនមានអ្នកឆ្លងលឿនដូច្នេះទេ ឯការស្លាប់តាំងពីមានការផ្ទុះមេរោគនេះមក រហូតដល់ឆ្នាំ ២០២០ ក៏គ្មានមនុស្សស្លាប់ម្នាក់ផងដែរ រហូតអង្គការសុខភាពពិភពលោក បានផ្តល់ចំណាត់ថ្នាក់ដល់កម្ពុជានៅគេ ក្នុងគ្រប់គ្រងមេរោគកូវីដ-១៩បានល្អ តែអកុសលមេរោគចង្រៃបានរាតត្បាតនៅចុងឆ្នាំ ២០២១ នេះ ព្រមជាមួយនឹងការបម្លែងមេរោគថ្មីពីប្រទេសឥណ្ឌាផង ។
មកទល់ពេលនេះ អ្នកឆ្លងសរុបមានចំនួន ២១.៨៣៤ នាក់ អ្នកជាសះស្បើយសរុបចំនួន ១០.៧៤០ នាក់, អ្នកឆ្លងក្នុង សហគមន៍ ចំនួន ២១.២១៩ នាក់, ចូលពីក្រៅប្រទេសចំនួន ៦២១ នាក់ និង អ្នកស្លាប់ ១៤៧ នាក់ ។
ប្រជាជនម៉្ងៃៗបន់ស្រន់ និងសង្ឃឹមថា មេរោគចង្រៃនេះនឹងរលាយសាបសូន្យពីទឹកដីកម្ពុជា នឹងអាលស្តារសេដ្ឋកិច្ចគ្រួសារ និងសេដ្ឋកិច្ចសង្គមឡើងវិញ ពីព្រោះដោយសារប្រជាជនគោរពតាមវិធានការ នៅផ្ទះ ឈ្នះកូវីដ ធ្វើឲ្យជីវភាពពួកគាត់ជួបការលំបាក ៕