អត្ថបទ: លោកស្រី សុកាន + សូរ្យសែង៖

ថ្ងៃទី ១៧ ឧសភា រដ្ឋាភិបាលយោធាភូមា បានចេញច្បាប់ចាប់បវរកញ្ញាចក្រវាឡ Miss Universe 2020 លើកទី 69^th នៅរដ្ឋផ្លរីដា សហរដ្ឋអាមេរិក ឈ្មោះ ធូហ្សារ វិន ល្វិន (Thurzar wint Lwin) ដោយសារនាងបានលើកស្លាកមានសរសេរអក្សរថា «Pray for Myanma» និង បាននិយាយអំពីវិបត្តិនយោបាយនៅក្នុងប្រទេសរបស់ខ្លួន ខណៈពេលដែលនាងជាបេក្ខនារីនៃការប្រកួតសម្រស់ពិភពលោក ។

នាង ធូហ្សារ វិន ល្វិន បានលើកស្លាក ដើម្បីសម្តែងឆន្ទៈក្នុងឈុតប្រចាំជាតិ ហើយបានទទួលចំណាត់ថ្នាក់ផ្នែកឈុតប្រចាំជាតិទៀតផង ។ សម្លៀកបំពាក់នាង ត្រូវបានរចនាឡើងដោយផ្អែកលើសម្លៀកបំពាក់ប្រពៃណីរបស់ជនជាតិឈិន នៅភាគពាយព្យប្រទេសមីយ៉ាន់ម៉ា ដែលជាទីតាំងនៃការប្រយុទ្ធគ្នារវាងកងទ័ពមីយ៉ាន់ម៉ា និងក្រុមបះបោរប្រឆាំងនឹងរដ្ឋាភិបាលយោធាក្នុងប៉ុន្មានថ្ងៃថ្មីៗនេះ។

នាងនិយាយថា «ខ្ញុំចង់អំពាវនាវឱ្យអ្នករាល់គ្នានិយាយអំពីប្រទេសមីយ៉ាន់ម៉ា ។ ក្នុងនាមជាបវរកញ្ញាចក្រវាឡមីយ៉ាន់ម៉ា ចាប់តាំងពីរដ្ឋប្រហារមក ខ្ញុំបាននិយាយឱ្យអស់ពីសមត្ថភាពហើយ» ។

ធូហ្សារ អាយុ ២៤ ឆ្នាំ គឺជាឆ្នាំចុងក្រោយនៃមុខជំនាញភាសាអង់គ្លេស ។ នាងកើតនៅទីក្រុងយ៉ាំងហ្គោនដែលជាកន្លែងនៃការប៉ះទង្គិចគ្នារវាងកងកម្លាំងយោធា និងក្រុមបាតុករ ។  មុនពេលចូលរួមប្រកួតបវរកញ្ញាចក្រវាឡនៅសហរដ្ ឋអាមេរិក នាងបាននិយាយប្រឆាំងនឹងរដ្ឋប្រហារយោធានៅតាមដងផ្លូវ ។ នាងក៏មិនមែនជាបវរកញ្ញាមីយ៉ាន់ម៉ាដំបូងដែលនាំសារនយោបាយទៅកាន់សង្វៀនសម្រស់អន្តរជាតិដែរ ។ នៅក្នុងរាត្រីចុងក្រោយនៃបវរកញ្ញាអន្តរជាតិ នៅប្រទេស ថៃនៅល្ងាចថ្ងៃទី ២៧ ខែមីនា កញ្ញា ហានឡាយ តំណាងឱ្យប្រទេសមីយ៉ាន់ម៉ា បានស្រក់ទឹកភ្នែកនៅពេលដែលនាងបានចែករំលែកអំពីស្ថានភាពរបស់ប្រទេស និងស្វែងរកការគាំទ្រពីសហគមន៍អន្តរជាតិសម្រាប់ភាពជោគជ័យរបស់មីយ៉ាន់ ម៉ា។  ហានឡាយក្រោយមកត្រូវបានរដ្ឋាភិបាលយោធាចេញច្បាប់ចាប់ ៕