Internet Explorer របស់ Microsoft នឹងបញ្ឈប់ដំណើរការពីថ្ងៃទី ១៥ ​ខែមិថុនា ឆ្នាំ ២០២២

បច្ចេកវិទ្យាថ្ងៃសុក្រ ទី21 ខែឩសភា ឆ្នាំ2021 ម៉ោង 10:38 នាទី ព្រឹក

 

កាលពីថ្ងៃទី ២០ ឧសភា BBC រាយការណ៍ថា អ៊ីនធើណេត អេចផ្ល័រើ (Internet Explorer) របស់ Microsoft នឹងត្រូវបានបញ្ឈប់ដំណើរការ បន្ទាប់ពីកម្មវិធីនេះបានដំណើរការអស់រយៈពេលជាង ២៦ ឆ្នាំ ។ Microsoft ជូនដំណឹងថា Internet Explorer 11 ដែលជា Version ចុងក្រោយ មិនប្រាកដថានៅក្នុង​ប្រព័ន្ធប្រតិបត្តិការ Windows 10 ក្រោយថ្ងៃទី ១៥ មិថុនា ឆ្នាំ ២០២២ តទៅទៀតនោះទេ ។

Internet Explorer បានបង្ហាញខ្លួនលើកដំបូងជាមួយប្រព័ន្ធប្រតិបត្តិការ Windows 95 ហើយទោះជា Microsoft បញ្ឈប់កម្មវិធីរុករក (Browser) ចាស់ជាច្រើនឆ្នាំមកច្រើនហើយក៏ដោយ ប៉ុន្តែចាំបាច់ត្រូវចេញ «Patch» ឬ កម្មវិធីដោះស្រាយបន្ទាន់ដោយហេតុផលសុវត្ថិភាពក្នុងឆ្នាំ ២០១៩ ដែលត្រូវបានប៉ាន់ប្រមាណថា ៨% នៃពិភពលោកនៅតែប្រើកម្មវិធីរុករកនេះ ។

ក្នុងចន្លោះឆ្នាំ ២០០០-២០០៥ Internet Explorer មានចំណែកទីផ្សារ ៩០% (Google Chrome គឺជា browser ដែលប្រើច្រើនបំផុតនាពេលបច្ចុប្បន្ននេះ) ប៉ុន្តែក្នុងឆ្នាំ ២០១៣ Microsoft ត្រូវពិន័យ ៥៦១ លានអឺរ៉ូដោយសារអ្នកប្រើប្រាស់ប្រព័ន្ធប្រតិបត្តិការ Windows មិនអាចជ្រើសរើសប្រើកម្មវិធី Browser ផ្សេងទៀតបាន ។

ក្នុងឆ្នាំ ២០១០ ក្រុមហ៊ុន Microsoft បានបន្ថែម pop-up ឡើងដើម្បីអនុញ្ញាតឱ្យអ្នកប្រើប្រាស់ជ្រើសរើស browser តាមសេចក្តីត្រូវការ ប៉ុន្តែគុណសម្បត្តិពិសេសនេះត្រូវបានដកចេញពី Windows បន្ទាប់ពី Version ក្រោយៗមក ដែលក្រុមហ៊ុន Microsoft បាននិយាយថា បណ្តាលមកពីកំហុសមួយចំនួន ។

នាពេលបច្ចុប្បន្ននេះ Microsoft Edge ដែលជា Browser ថ្មីរបស់ Windows មានរបៀបស្រដៀងគ្នាជាមួយ Internet Explorer ដែលនឹងបន្តដំណើរការ ។

លោក Lindersay  អ្នកគ្រប់គ្រងកម្មវិធី Microsoft Edge បានសរសេរក្នុងប្លុកថា កម្មវិធី Browser ជំនាន់ថ្មី ដូច Microsoft Edge ផ្តល់ជូនបទពិសោធន៍នៃការបើកគេហទំព័រលឿនជាង និងមានសុវត្ថិភាពជាង និងទំនើបជាងមុន ហើយឥឡូវនេះអាចគ្រប់គ្រង application ជំនាន់ចាស់ ធ្វើឱ្យប្រសើរឡើងផងដែរ ។

ទោះយ៉ាងណា ក្រុមហ៊ុន Microsoft បានបញ្ជាក់អំពីការលើកលែងមួយចំនួនចំពោះការប្រើប្រាស់ Internet Explorer ជាបន្ត ក្រោយពីថ្ងៃទី ១៥ ខែមិថុនាឆ្នាំ ២០២២ទៅ សម្រាប់អ្នកប្រើប្រាស់ទូទៅ អាចប្រើ Internet Explorer Mode នៅក្នុង Microsoft Edge ។

អ្នកជំនាញព័ត៌មានវិទ្យាផ្នែកពាណិជ្ជកម្មត្រូវបង្កើតតម្លៃ Internet Explorer Mode នៅក្នុង Microsoft Edge ដើម្បីអាចចូលដល់គេហទំព័រ និងកម្មវិធីដែលប្រើលើ Internet Explorer ដែលមានស្រាប់សម្រាប់អ្នកប្រើប្រាស់ផ្នែកពាណិជ្ជកម្ម ។

Internet Explorer Mode នឹងបានទទួលការគាំទ្ររហូតយ៉ាងហោចណាស់ដល់ឆ្នាំ ២០២៩ ហើយក្រុមហ៊ុន Microsoft នឹងជូនដំណឹងរយៈពេលមួយខែ មុនពេលបញ្ចប់កម្មវិធី Internet Explorer Mode ៕

បកប្រែពី khaosod

ដោយ សូរ្យសែង

 


ហាមធ្វើការចម្លងអត្ថបទ ដោយមិនមានការអនុញ្ញាត្តិ។

ភ្ជាប់ទំនាក់ទំនងជាមួយយើងឥឡូវនេះ

អត្ថបទប្រហាក់ប្រហែល


ពាណិជ្ជកម្ម

អត្ថបទថ្មីៗ

អត្ថបទពេញនិយម