នាយឧត្តមសេនីយ៍ថៃ ផាណា បានចូលរួមរំលែកទុក្ខចំពោះទាហានកម្ពុជាដែលបានមរណភាពក្នុងឧបទ្ទវហេតុប៉ះទង្គិចគ្នា និងបានបញ្ជាក់ថា មិនឈ្លានពានអធិបតេយ្យភាពកម្ពុជាដាច់ខាត ស្របពេលដែលនាយឧត្តមសេនីយ៍ ម៉ៅ សុផាន់ អគ្គមេបញ្ជាការរងកងយោធពលខេមរភូមិន្ទកម្ពុជា និងជាមេបញ្ជាការកងទ័ពជើងគោក បានមានប្រសាសន៍ថា ប្រសិនបើនរណាម្នាក់បំពានលើកិច្ចព្រមព្រៀងរួមគ្នានៅថ្ងៃនេះ នឹងចល័តទ័ពចេញពីតំបន់នោះជាបន្ទាន់ ។ នេះជាការចរចាគ្នារវាងមេទ័ពទាំងពីរ នៅថ្ងៃទី 29 ឧសភា ឆ្នាំ 2025 ។

ថ្ងៃនេះជាជំនួបពិភាក្សាបន្ត បន្ទាប់ពីអគ្គមេបញ្ជាការនៃកងទ័ពភូមិន្ទថៃ និងអគ្គមេបញ្ជាការនៃកងយោធពលខេមរភូមិន្ទកម្ពុជាបានពិភាក្សាគ្នាតាមរយៈប្រព័ន្ធ VTC កាលពីម្សិលមិញ (28 ឧសភា 68)។ នាយឧត្តមសេនីយ៍ថៃ ផាណា បានសម្តែងការសោកស្ដាយ និងចូលរួមរំលែកទុក្ខចំពោះការបាត់បង់ពីការប៉ះទង្គិចគ្នា និងបានសង្កត់ធ្ងន់លើសារៈសំខាន់នៃចេតនារបស់រដ្ឋមន្ត្រីការពារជាតិនៃប្រទេសទាំងពីរ ដែលចង់ឱ្យមានការចរចាបញ្ចប់ជម្លោះ។ លោក​ក៏​បាន​សម្តែង​នូវ​ការ​គាំទ្រ​ចំពោះ​ការ​ចរចា​ដោយ​សន្តិវិធី​ដើម្បី​ស្វែងរក​កិច្ច​ព្រមព្រៀង​រួម។ លោក​បញ្ជាក់​ថា នឹង​មិន​មាន​ការ​ឈ្លាន​ពាន​អធិបតេយ្យភាព​របស់​កម្ពុជាដាច់ខាត ។ ការចរចានេះនឹងផ្តល់ផលប្រយោជន៍ដល់ប្រជាជននៃប្រទេសទាំងពីរ ជាពិសេសផ្នែកសេដ្ឋកិច្ច។

ក្នុង​ករណី​ជម្លោះ​នៅ​ចុង​បូក កងទ័ព​ថៃ និង​កម្ពុជា​បាន​ព្រមព្រៀង​គ្នា​ក្នុង​ការ​ប្រើប្រាស់​យន្តការ​គណៈកម្មាធិការ​ព្រំដែន​រួម (JBC) ដែល​ជា​យន្តការ​កម្រិត​រដ្ឋាភិបាល​ដើម្បី​ដោះស្រាយ​បញ្ហា​ជា​បន្ទាន់។ លទ្ធផលនៃកិច្ចប្រជុំ JBC ត្រូវបានគេរំពឹងថានឹងបញ្ចប់ក្នុងរយៈពេល 2 សប្តាហ៍ទៀត។ បច្ចុប្បន្ននេះ កងកម្លាំងពីភាគីទាំងសងខាងដែលបានប៉ះទង្គិចគ្នាបានរើចេញពីតំបន់តានតឹង ។ ភាគីទាំងពីរក៏បានយល់ព្រមប្រើប្រាស់យន្តការគណៈកម្មាធិការព្រំដែនក្នុងតំបន់ (RBC) ដើម្បីដោះស្រាយបញ្ហាដែលនៅសេសសល់ និងជំរុញយន្តការ JBC ឱ្យកាន់តែពេញលេញ។

លើសពីនេះ មេបញ្ជាការនៃភាគីទាំងសងខាងបានបញ្ជាក់ថា ពួកគេនឹងត្រួតពិនិត្យយ៉ាងតឹងរ៉ឹងលើកងទ័ពរបស់ខ្លួនក្នុងក្របខ័ណ្ឌនៃការចរចា។ អគ្គមេបញ្ជាការកងទ័ពជើងគោកកម្ពុជា បានសង្កត់ធ្ងន់ថា ប្រសិនបើនរណាម្នាក់បំពានលើកិច្ចព្រមព្រៀងដែលបានព្រមព្រៀងរួមគ្នានៅថ្ងៃនេះ នឹងចល័តទ័ពចេញពីតំបន់នោះជាបន្ទាន់។ លោក​ក៏​បាន​បញ្ជាក់​ដែរ​ថា ភាគី​កម្ពុជា​អាច​គ្រប់គ្រង និង​បញ្ជា​គ្រប់​អង្គភាព​យ៉ាង​ដាច់​ខាត។

ការ​ចរចា​រវាង​មេ​បញ្ជាការ​កងទ័ព​ថៃ និង​កម្ពុជា​លើក​នេះ​មាន​ភាព​ល្អ​ប្រសើរ។

ពីកាសែត naewna  

ដោយ សូរ្យរិទ្ធ