​ទីក្រុងមួយរបស់ប្រទេសប្រេស៊ីល អ្នកស្លាប់ដោយសារមេរោគកូវីដ-១៩ បានថយចុះ ៩៥% និងប្រើជីវិតប្រក្រតី ក្រោយពីប្រជាជនបានចាក់វ៉ាក់សាំង ស៊ីណូវ៉ាក់ (Sinovac) រួច ។ ប្រេស៊ីលជាប្រទេសមួយនៅក្នុងអាមេរិកឡាទីន ឬ អាមេរិកខាងត្បូង ដែលមាន ១១ ប្រទេស តែឥឡូវបន្ថែមមួយទៀត ឈ្មោះ ស៊ូរីណាម ទាំងអស់ ១២ ។

អ្នកកាសែត BBC រាយការណ៍ថា វិទ្យាស្ថាន ប៊ូតាន់តាន់ (Butantan) របស់ប្រេស៊ីល បានសាកល្បងគ្រប់គ្រងការរាតត្បាតនៃមេរោគកូវីដ-១៩ នៅទីក្រុង សេរ៉ាណា ក្នុងរដ្ឋសៅប៉ាវឡូ  តាំងពីខែដើមខែកុម្ភៈ ដល់ខែមេសាកន្លងមក ដោយប្រើវ៉ាក់សាំង កូរ៉ូណាវ៉ាក់ (CoronaVac) ដែលជាឈ្មោះផ្លូវការរបស់វ៉ាក់សាំងប្រឆាំងកូវីដ ផលិតដោយក្រុមហ៊ុន Sinovac ។

ទីក្រុងសេរ៉ាណា មានប្រជាជនប្រមាណ ៤៥.០០០ នាក់ ត្រូវបែងចេញជា ៤ ផ្នែក ដើម្បីជួយគ្រប់គ្រងការរាតត្បាតមេរោគ លទ្ធផលតំបន់ ៣ ផ្នែក  ឬ ៧៥% នៃប្រជាជនដែលមានអាយុចាក់ ៩៥% បានទទួលវ៉ាក់សាំងគ្រប់ ២ ដូស លទ្ធផលបង្ហាញថា អត្រាការស្លាប់ក្នុងទីក្រុងបានថយចុះ ៩៥%, អត្រាចូលទៅព្យាបាលនៅមន្ទីរពេទ្យថយបាន ៨៦% និង អត្រាឆ្លងថយចុះបាន ៨០% ។

លោក រីខារដូ ប៉ាឡាស៊ិអូស នាយកផ្នែកស្រាវជ្រាវរបស់ ប៊ូតាន់តាន់ និយាយថា «កូនសោសំខាន់គឺការចាក់វ៉ាក់សាំងឲ្យប្រជាជនបានត្រឹម ៧៥% យើងអាចគ្រប់គ្រងការរាតត្បាតបានហើយ» ។ លោក រីខារដូ បញ្ជាក់ថា វ៉ាក់សាំងកូរ៉ូណាវ៉ាក់ មានប្រសិទ្ធភាពក្នុងការការពារកូវីដ-១៩ បម្លែងថ្មី P.1 ឬ កូវីដហ្កាមម៉ា (gamma) ដែលជួបលើកដំបូងនៅក្នុងប្រទេសប្រេស៊ីល ។

ទោះយ៉ាងណា នៅទីក្រុងដទៃទៀត នៅមានការរាតត្បាតខ្លាំងនៅឡើយ ដែលមកទល់នឹងពេលនេះ អ្នកស្លាប់មានដល់ ៤៦៣.០០០ នាក់ អ្នកឆ្លងសរុប ១៦.៥ លាននាក់ លំដាប់ទី ៣ របស់ពិភពលោក  ៕

ដោយ សូរ្យសែង