អត្ថបទ សូរ្យរិទ្ធ៖

គណៈកម្មាធិការប្រឆាំងអំពើពុករលួយមីយ៉ាន់ម៉ា ដែលចាត់តាំងដោយរដ្ឋាភិបាល បានធ្វើបទចោទប្រកាន់លោកស្រី អ៊ុង សានស៊ូឃ្យី ប្រធានគណបក្សសម្ព័ន្ធដើម្បីប្រជាធិបតេយ្យ (NLD) និងជាអតីតទីប្រឹក្សារដ្ឋមីយ៉ាន់ម៉ា និងអតីតមន្រ្តីផ្សេងទៀតពីបទពុករលួយ អំពីដីធ្លីរបស់មូលនិធិសប្បុរសធម៌ ដែលលោកស្រីបង្កើតឡើង មានឈ្មោះថា« ដូវ ខិន ជី (Daw Khin Kyi)» ។

ជាមួយគ្នានេះ លោកស្រី អ៊ុង សានស៊ូឃ្យី ក៏ប្រឈមនឹងការចោទប្រកាន់ពីបទពុករលួយមួយទៀត លើមូលដ្ឋាន ការទទួលសំណូកនៅពេលគាត់នៅជាទីប្រឹក្សារដ្ឋ ដោយមុននេះ ប៉ុស្តិ៍ទូរទស្សន៍ «Myawady» របស់កងទ័ពមីយ៉ាន់ម៉ា ធ្លាប់ចាក់ផ្សាយសេចក្តីថ្លែងការណ៍មួយរបស់លោក មួង វេក (Maung Weik) ពាណិជ្ជករមីយ៉ាន់ម៉ា ដែលបានសារភាពចំពោះមុខកាមេរ៉ាថា គាត់បានផ្តល់សំណូកដល់លោកស្រី អ៊ុង សានស៊ូជី សរុបចំនួន ៥៥ ម៉ឺនដុល្លារ រួមទាំងមាសផង ដើម្បីជាប្រយោជន៍ដល់ជំនួញរបស់គាត់ ។

លោកស្រីដែលត្រូវយោធាចាប់ឃុំខ្លួនចាប់តាំងពីរដ្ឋប្រហារថ្ងៃទី ១ ខែកុម្ភៈ ត្រូវបានកងទ័ពចោទប្រកាន់ជាច្រើនចំណុច ដូចជា បានញុះញង់, រំលោភច្បាប់នាំចូល-ចេញ, គ្រប់គ្រងឧបករណ៍ទំនាក់ទំនងខុសច្បាប់ និងរំលោភលើវិធានការណ៍សុវត្ថិភាពនៃកូវីដ-១៩ ។

លើសពីនេះទៀត នៅថ្ងៃទី 1 ខែមិថុនា រដ្ឋាភិបាលដែលបង្កើតឡើងដោយក្រុមប្រឆាំងនឹងរដ្ឋប្រហារមីយ៉ាន់ម៉ា ឬ «រដ្​ឋាភិបាលរួបរួមជាតិ (NUG)» បានចេញសេចក្តីថ្លែងការណ៍មួយថា៖ យោធាមីយ៉ាន់ម៉ាបានផ្លាស់«លោកស្រី អ៊ុង​សាន​ស៊ូឃ្យី» និង «វីន មីយិន»អតីតជាប្រធានាធិបតី ទៅកន្លែងសម្ងាត់ ហើយក្រុមមេធាវីនៅតែមិនអាចទាក់ទងបាន ៕