ពី thaipost; ដោយ សូរ្យរិទ្ធ៖

រសជាតិលើកដំបូងនៃការជួបគ្នារវាងមហាអំណាចទាំងពីរ គឺប្រធានាធិបតីរុស្ស៊ី វ៉្លា ឌីមៀរ ពូទីន និងប្រធានាធិបតីសហរដ្ឋាអាមេរិក ចូ បៃដេន បានឯកភាពមិននឹកស្មានដល់ ចំពោះការពូនចំណងមិត្កភាពការទូតជាមួយគ្នាឡើងវិញ ដោយបញ្ជូនអគ្គរដ្ឋទូតទាំងសងខាងទៅកាន់កន្លែងដើមវិញ ក្រោយពីមានស្នាមរបួសដោយសារ បៃដេន ហៅ ពូទីន ថាជា «ឃាតក» ។

ការប្រជុំកំពូល (Summit) រវាង ពូទីន និង បៃដេន នៅទីក្រុងជេនីវ៉ា ប្រទេសស្វីស កាលពីថ្ងៃពុធ ទី ១៦ ខែមិថុនា ឆ្នាំ ២០២១ ជាការភ្លក្សរសជាតិនៃការចរចាលើកដំបូងរវាងមេដឹកនាំមហាយក្សទាំងពីរ ប៉ុន្តែការប្រឹក្សាគ្នាត្រូវប្រើពេលមិនដល់ ៤ ម៉ោង បើតាមការកំណត់មានដល់ ៥ ម៉ោងឯណោះ ។ ក្រោយមក មេដឹកនាំទាំងពីរ បានញែកចេញពីគ្នា ធ្វើសន្និសីទកាសែតរៀងៗខ្លួន ដែលខុសពីការប្រជុំកំពូលរវាង ពូទីន និង ដូណាល់ ត្រាំ កាលពីឆ្នាំ ២០១៨ ដែលគូផ្ទឹមគ្នា សម្តែងភាពជិតស្និទ្ធ ក្នុងបរិយាកាសសហភាតរៈ ។

កាលណោះជំនួបត្រូវបានធ្វើនៅទីក្រុងហ៊ែលស៊ិនគី (Helsinki) ប្រទេសហ្វាំងឡង់ ។ មានពេលមួយ ពួកគាត់ទាំងពីរបានសន្ទនាឯកជនមួយ ដែលមានតែអ្នកបកប្រែផ្ទាល់ រៀងខ្លួនប៉ុនណោះ ប៉ុន្តែជំនួបកំពូលរវាងលោក ពូទីន និងលោក បៃដេន មិនជួបជាលក្ខណៈឯកជនទេ ។

របាយការណ៍ REUTERS បានដកស្រង់សម្តីមន្ត្រីនិយាយថា កិច្ចពិភាក្សាជុំទី ១ ដែលក្រៅពី បៃដិន និង ពូទីន ក៏មានរដ្ឋមន្រ្តីការបរទេសអាមេរិកលោក អេនថូនី ប្លីនខេន  (Anthony Blinken) និងរដ្ឋមន្ត្រីការបរទេសរុស្ស៊ី លោក សឺហ្គេ ឡាវរ៉ូវ (Sergei Lavrov) បានចំណាយពេលជិត ២ ម៉ោង មុនពេលឈប់សម្រាក ។

ទំនាក់ទំនងរវាងប្រទេសរុស្ស៊ី និងសហរដ្ឋអាមេរិក កាន់តែយ៉ាប់យឺននាប៉ុន្មានឆ្នាំថ្មីៗនេះ ជាពិសេសបន្ទាប់ពីប្រទេសរុស្ស៊ីបានបញ្ចូលតំបន់គ្រីមៀរបស់អ៊ុយក្រែនទៅជារបស់ខ្លួនក្នុងឆ្នាំ ២០១៤, ការជ្រៀតជ្រែករបស់រុស្ស៊ីនៅក្នុងជម្លោះស៊ីរីនៅឆ្នាំ ២០១៥ និងការចោទប្រកាន់របស់អាមេរិកចំពោះការជ្រៀតជ្រែករបស់រុស្ស៊ីនៅក្នុងការបោះឆ្នោតឆ្នាំ ២០១៦ ដែលជួយឱ្យ លោក ត្រាំ ឈ្នះ ។ បន្ទាប់មកទំនាក់ទំនងរវាងរដ្ឋាភិបាលទាំងពីរកាន់តែយ៉ាប់យ៉ឺនថែមទៀតនៅក្នុងខែមីនាកន្លងទៅ នៅពេលលោក បៃដេន គ្រលាស់អណ្តាតហៅលោក ពូទីន ថាជា «ឃាតករ» ដែលជំរុញឱ្យប្រទេសរុស្ស៊ីកោះហៅឯកអគ្គរដ្ឋទូតពីក្រុងវ៉ាស៊ីនតោនត្រឡប់មកប្រទេសយ៉ាងប្រញាប់ ជាការតបវិញ សហរដ្ឋអាមេរិកក៏បានកោះហៅឯកអគ្គរដ្ឋទូតរបស់ខ្លួនពីទីក្រុងម៉ួស្គូវិញដែរកាលពីខែមេសា ។

នៅក្នុងសន្និសីទកាសែតបន្ទាប់ពីកិច្ចប្រជុំ ប្រធានាធិបតី ពូទីន បាននិយាយថា ការប្រជុំលើកនេះមានលក្ខណៈស្ថាបនា គ្មានអរិភាព ហើយបានបង្ហាញពីបំណងប្រាថ្នារបស់យើងទាំងពីរក្នុងការស្វែងយល់ពីគ្នា ។ ភាគីទាំងពីរបានឯកភាពគ្នាថា ឯកអគ្គរដ្ឋទូតគួរតែត្រូវបានបញ្ជូនទៅរដ្ឋធានីរបស់ប្រទេសមួយទៀត ។

លោក ពូទីន ពោលថា រុស្ស៊ី និងអាមេរិក មានការទទួលខុសត្រូវរួមមួយចំពោះស្ថិរភាពនុយក្លេអ៊ែរ ហើយនឹងពិភាក្សាពីលទ្ធភាពនៃការផ្លាស់ប្តូរសន្ធិសញ្ញា New Start ដើម្បីកំណត់អាវុធនុយក្លេអ៊ែរ ដែលត្រូវបានពង្រីកនាពេលថ្មីៗនេះ ៕