អត្ថបទ សូរ្យសែង៖

ជារឿយៗ ពលករកម្ពុជាបានវិលត្រឡប់ទៅផ្ទះវិញ បន្ទាប់ពីកន្លែងប្រមូលផ្តុំត្រូវបានបិទ ដោយមានទាំងពលករថៃ និងខ្មែរផង ត្រូវថៅកែដឹកយកមកទម្លាក់នៅតាមចិញ្ចើមថ្នល់នៅតំបន់កាបឈឺង ដើម្បីឲ្យឆ្លងទៅប្រទេសវិញតាមច្រកចម ពីព្រោះវិធានការត្រូវប្រមូលផ្តុំឲ្យនៅមួយកន្លែង ដើម្បីទប់ស្កាត់ការរីករាលដាលនៃការឆ្លងនៅក្នុងតំបន់ ។

ថ្ងៃទី ២៧ ខែមិថុនានេះ បន្ទាប់ពីនាយករដ្ឋមន្រ្តីថៃ ចេញសេចក្តីប្រកាសមួយ បិទជំរុំសាងសង់ នាទីក្រុងបាងកក និងតំបន់ជុំវិញ ដែលនឹងចាប់ផ្តើមពីថ្ងៃច័ន្ទ ទី ២៨ ខែមិថុនានេះតទៅ ដោយអនុលោមតាមវិធានការណ៍តឹងរ៉ឹងដើម្បីគ្រប់គ្រងការរីករាលដាលនៃមេរោគកូវីដ-១៩ ដោយមានបទបញ្ជាមួយថា«មិនឲ្យមានសកម្មភាពរបស់កម្មកររយៈពេល ៣០ ថ្ងៃ» ។

សេចក្តីរាយការណ៍ព័ត៌មានរបស់កាសែតក្នុងស្រុកថៃឲ្យដឹងថា នៅឯស្រុកកាបឈឺង ខេត្តសុរិន្ទ កំណាត់ផ្លូវទៅកាន់ច្រកចម មានថៅកែបាននាំពលករខ្មែរទៅទម្លាក់នៅចិញ្ចើមផ្លូវទល់មុខផ្សារអូថប ឃុំដាន ស្រុកកាបឈឺង ខេត្តសុរិន្ទ និងកន្លែងជាច្រើនទៀត ដែលបណ្តាលឱ្យជនអន្តោប្រវេសន៍ចំណាកស្រុកជនជាតិកម្ពុជា ដែលត្រូវថៅកែរបស់ខ្លួនបង្ខំ និងពន្លឿនឱ្យនាំយកមកទុកនៅកន្លែងប្រមូលផ្តុំ ក្បែរការិយាល័យអន្តោប្រវេសន៍ ដោយសារមានការព្រួយបារម្ភថានឹងមានពលករឆ្លងមេរោគកូវីដ-១៩ ដល់អ្នកស្រុក ។

មន្ត្រីម្នាក់បាននិយាយថា ថ្ងៃនេះ (២៧ មិថុនា) ជាថ្ងៃដំបូងដែលឃើញពលករកម្ពុជាជាច្រើន ធ្វើដំណើរត្រឡប់ទៅប្រទេសវិញ ប្រមាណ ២០០ នាក់ ភាគច្រើនជាកម្មករសំណង់ ដែលអាជ្ញាធរថៃរឹតបន្តឹងការគ្រប់គ្រងពលករបរទេសឲ្យនៅដាច់ដោយឡែក រួចបញ្ជូនត្រឡប់មកប្រទេសវិញ ៕