គណៈកម្មការគ្រប់គ្រងការប្រកួតប្រជែងពាណិជ្ជកម្មអូស្ត្រាលី បាននិយាយនៅថ្ងៃចន្ទ ទី ១៧ មករានេះថា មានក្តីបារម្ភយ៉ាងខ្លាំងលើរបាយការណ៍ឡើងថ្ងៃឧបករណ៍តេស្តអង់ទីហ្សែន (Antigen Test Kit) ហើយកំពុងស្វែងរកព័ត៌មានពីអ្នកផ្គត់ផ្គង់ អ្នកលក់រាយ និងបណ្តាញឱសថស្ថាន ដែលដំឡើងថ្លៃប្រមាណ ៥០ ដង ។
ប្រទេសអូស្ត្រាលីកំពុងប្រឈមមុខនឹងការខ្វះឧបករណ៍តេស្តអង់ទីហ្សែនបន្ទាន់ដោយខ្លួនឯង បន្ទាប់ពីមន្ត្រីបានណែនាំអ្នកទាំងនោះដែលមិនមានរោគសញ្ញា ជៀសវាងឲ្យមជ្ឈមណ្ឌលធ្វើតេស្តរកកូវីដ ដែលទទួលបានការគាំទ្រពីរដ្ឋាភិបាល ហើយធ្វើការពិនិត្យដោយខ្លួនឯងជំនួសវិញ ។
លោក រ៉ដ ស៊ីម (Rod Sims) ប្រធានគណៈកម្មការប្រកួតប្រជែង និងការពារអ្នកបរិភោគអូស្ត្រាលី បាននិយាយថា «ចំពេលមានការរីករាលដាលនៃជំងឺរាតត្បាតកូវីដ១៩ តម្លៃខ្ពស់ហួសហេតុនៃឧបករណ៍តេស្តអង់ទីហ្សែនបែបបន្ទាន់ គឺចាំបាច់សម្រាប់ការធ្វើរោគវិនិច្ឆ័យ និងការការពារសាធារណជនផ្សេងៗ ជារឿងគួរព្រួយបារម្ភយ៉ាងខ្លាំង»។
លោក ស៊ីម បានផ្តល់ទិន្នន័យថា មានព័ត៌មានថា តម្លៃឧបករណ៍តេស្តបានឡើងថ្លៃដល់ ៥០០ ដុល្លារអូស្ត្រាលី ឬប្រមាណ ៣៦០ ដុល្លារអាមេរិក មានលក់តាមអនឡាញ និង ៧០ ដុល្លារអូស្ត្រាលី ឬប្រមាណ ៥០ ដុល្លារអាមេរិកក្នុងតម្លៃលក់តាមហាងផ្សេងៗ ។ កាលពីសប្តាហ៍មុន តាមហាងផ្សេងៗមានតម្លៃត្រឹម ១០ ដុល្លារអូស្ត្រាលី ឬប្រមាណ ៧ ដុល្លារអាមេរិកប៉ុនណោះ ។
ក្រោយពីបានជោគជ័យក្នុងការគ្រប់គ្រងមេរោគកូវីដនៅគ្រាដំបូងៗនៃជំងឺរាតត្បាត ប្រទេសអូស្ត្រាលីបានរាយការណ៍អំពីករណីឆ្លងវីរុសនេះជិត ១,៣ លានករណីក្នុងរយៈពេលពីរសប្តាហ៍ចុងក្រោយនេះ ។ នាំឱ្យស្ថានភាពអ្នកជំងឺលើសចំណុះនៅក្នុងមន្ទីរពេទ្យ និងគ្លីនិក ចំពេលមានសេចក្តីរាយការណ៍ថា ឧបករណ៍ពិនិត្យតេស្តដោយខ្លួនឯងត្រូវបានស្តុកទុក ៕
ប្រភព REUTERS
ដោយ សាវុឌ្ឍ