ប្រភព mgronline
ដោយ ម៉ារ៉ា៖
ប្រជាជន និងអ្នកតស៊ូខាងភាគីប្រឆាំងរដ្ឋាភិបាលយោធាមីយ៉ាន់ម៉ា បានចោទកងកម្លាំងទាហានដុតផ្ទះប្រជាជនរាប់រយខ្នងនៅភាគពាយ័ព្យប្រទេស ក្នុងពេលដែលរដ្ឋាភិបាលយោធាព្យាយាមកម្ទេចការប្រឆាំងការគ្រប់គ្រងរសប់ខ្លួន។
ដោយសារមានការតវ៉ាជាច្រើនរបស់អ្នកមិនពេញចិត្តរបបយោធា ចំពោះការបង្ក្រាបយ៉ាងឃោរឃៅ ធ្វើឲ្យពួកទាំងនោះបង្កើតកងកម្លាំងការពារប្រជាជន (PDF) ដើម្បីវាយបកទៅរដ្ឋាភិបាលវិញ ។
អ្នកនៅតំបន់ប៊ិន ក្នុងភូមិសាកាញ (Sagiang) ដែលបានឃើញការដុតភូមិលំនៅបាននិយាយថា កងកម្លាំងទាហានបានចូលមកក្នុងភូមិអ្នកស្រុក ពួកគេបានបាញ់កាំភ្លើងធំ និងកាំភ្លើងដៃ មុនចូលមកដល់ ពេលនោះអ្នកភូមិបានរត់គេចខ្លួន បន្ទាប់មកពួកគេបានដុតផ្ទះអស់ ២០០ ខ្នង ។
«យើងមិនអាចយកអ្វីមកជាប់ខ្លួនបាន មានតែក្រណាត់រុំខ្លួន» អ្នកភូមិនិយាយ ។
មិនតែប៉ុនណោះ ភូមិអ៊ីន ម៉ា ថេ (Inn Ma Hte) ដែលនៅជិតនោះ ក៏ត្រូវបានដុត ហើយបំទ្រព្យសម្បត្តិ យានយន្ត និងរទេះក៏ត្រូវបំផ្លាញ ។ តាមអ្នកតស៊ូ PDF ម្នាក់បាននិយាយថា ផ្ទះប្រមាណ ៦០០ ត្រូវបានដុត ក្រោយកម្លាំង PDF ប៉ះទង្គិចជាមួយទាហានរដ្ឋាភិបាល ។
ចំណែកស្ថានីយទូរទស្សន៍របស់រដ្ឋ បានចោទថា ក្រុម PDF ជាអ្នកដុតភូមិ ដើម្បីផ្សព្វផ្សាយថាជាអំពើភេរវកម្មរបស់ពួកគេ ។
តំបន់សាកាញ មានការប៉ះទង្គិចយ៉ាងបង្ហូរឈាមជាប់ជាប្រចាំ កាលពីពាក់កណ្តាលខែធ្នូ ឆ្នាំ ២០២១ កន្លងទៅ ។ សហរដ្ឋអាមេរិក និងអង្គការសហប្រជាជាតិ បានថ្កោលទោសរដ្ឋាភិបាលយោធា ចំពោះអ្វីដែលក្រុងវ័រស៊ីនតុនអធិប្បាយថា វាជារបាយការណ៍គួរឱ្យទុកចិត្ត និងគួរឱ្យព្រួយបារម្ភនៃការសម្លាប់អ្នកភូមិ ១១ នាក់ រួមទាំងកុមារនៅក្នុងតំបន់ សាកាញ ៕