អតីតនាយករដ្ឋមន្ត្រីម៉ាឡេស៊ី ណាហ្ស៊ីប រ៉ាសាក់ បានព្យាយាមនៅទឹកចុងក្រោយ ដើម្បីបង្អាក់ការកាត់ក្តីរឿងពុករលួយអំពីមូលធនប្រមាណ 1MDB ដែលបណ្តាលឲ្យគាត់ផុតពីតំណែង ។
អតីតនាយករដ្ឋមន្ត្រីម៉ាឡេស៊ី នឹងត្រូវកាត់ទោសនៅថ្ងៃទី ២៦ ខែសីហា ឆ្នាំ ២០២២ ដើម្បីស្តាប់បណ្តឹងឧទ្ធរណ៍របស់លោក ណាហ្ស៊ីប ក្នុងសំណុំរឿងព្រហ្មទណ្ឌដែលបានរំលោភលើសេចក្តីទុកចិត្ត ការបំពានអំណាច និងការលាងលុយកខ្វក់ ក្រោមការចោទប្រកាន់ថា គាត់បានលួចលុយពីមូលនិធិ ដែលត្រូវបានបង្កើតឡើងកាលពីគាត់ ណាហ្ស៊ីប ជានាយករដ្ឋមន្ត្រីក្នុងឆ្នាំ ២០០៩ ។
លោកព្រះរាជអាជ្ញាបញ្ជាក់ដូច្នេះថា ប្រាក់ពីមូលនិធិ 1MDB មានតម្លៃជាង 1 ពាន់លានដុល្លារ ត្រូវបានផ្ទេរទៅគណនីផ្ទាល់ខ្លួនរបស់លោក ណាហ្ស៊ីប ។ គាត់ត្រូវបានកាត់ទោសឱ្យជាប់ពន្ធនាគាររយៈពេល 12 ឆ្នាំ និងពិន័យជាប្រាក់ចំនួន 50 លានដុល្លារសម្រាប់ការទទួលប្រាក់ខុសច្បាប់ បានប្រហែល 10 លានដុល្លារពី SRC International ដែលជាផ្នែកមួយជារបស់មូលធម 1MDB ក្នុងខែកក្កដា ឆ្នាំ 2020 ក្នុងការកាត់ទោសបទល្មើសលើកដំបូង។
បន្ថែមពីលើការប្តឹងឧទ្ធរណ៍ប្រឆាំងនឹងករណីបែបនេះ នៅក្នុងឯកសារសម្រាប់ការកាត់ក្តីថ្ងៃទី 15 ខែសីហា លោក ណាហ្ស៊ីប ក៏បានស្នើឱ្យតុលាការសហព័ន្ធពិចារណាឡើងវិញនូវភស្តុតាង ដើម្បីធ្វើឲ្យការកាត់ក្តីនេះមិនមានសុពលភាព ដោយចោទប្រកាន់ចៅក្រមថាមានទំនាស់ផលប្រយោជន៍ ។
ការអំពាវនាវរបស់លោក ណាហ្ស៊ីប ធ្វើឡើងមុនការបោះឆ្នោតជាតិ ដែលត្រូវបានគេជឿថា នឹងធ្វើឡើងមុនខែកញ្ញា ឆ្នាំក្រោយ ព្រោះថាបើគាត់រួចទោសមែន គាត់ប្រហែលជាអាចរស់ឡើងវិញលើឆាកនយោបាយម្ដងទៀត ទោះបីជាលោក ណាហ្ស៊ីប នៅតែជាសមាជិកសភា ប៉ុន្តែគាត់ត្រូវបានហាមមិនឱ្យឈរឈ្មោះសម្រាប់មុខតំណែងថ្មី លុះត្រាតែសាលក្រមត្រូវបានដកហូត ឬលើកលែងទោស ៕