អង្គភាពប្រឆាំងអំពើពុករលួយ ហៅកាត់ អ.ប.ព. នឹងធ្វើជាម្ចាស់ផ្ទះ និងជាប្រធានកិច្ចប្រជុំលេខាធិការដ្ឋាននៃស្ថាប័នប្រឆាំងអំពើពុករលួយអាស៊ាន (អាស៊ាន-ផេក = ASEAN-PAC) លើកទី ១៩ ដែលនឹងប្រព្រឹត្តទៅនៅថ្ងៃទី១៦-១៧ ខែសីហា ឆ្នាំ២០២៣ នៅខេត្តសៀមរាប នៃព្រះរាជាណាចក្រកម្ពុជា ។
កិច្ចប្រជុំនេះនឹងពិនិត្យពិភាក្សា ទៅលើកិច្ចការដែលនៅសេសសល់កាលពីកិច្ចប្រជុំថ្នាក់ដឹកនាំអាស៊ាន-ផេកលើកទី១៨ នៅភ្នំពេញនាថ្ងៃទី២២-២៣ ខែវិច្ឆិកា ឆ្នាំ២០២២ ដែល អ.ប.ព.ជាម្ចាស់ផ្ទះ និងត្រៀមរៀបចំរបៀបវារៈសម្រាប់កិច្ចប្រជុំថ្នាក់ដឹកនាំអាស៊ាន-ផេកបន្ទាប់។ កិច្ចប្រជុំនេះ នឹងមានការគាំទ្រដល់សកម្មភាព និងជួយជំរុញឲ្យសម្រេចបាននូវពហុគោលបំណងរបស់អាស៊ាន-ផេក ស្របតាមឯកសារគោលរបស់អាស៊ាន-ផេក ដោយមានតំណាងនៃស្ថាប័នប្រឆាំងអំពើពុករលួយអាស៊ានទាំង ១០ និងតំណាងគណៈកម្មការប្រឆាំងអំពើពុករលួយនៃប្រទេសទីម័រទ្បេស្ត (CAC) ដែលជាភាគីសង្កេតការណ៍ចូលរួមផងដែរ ។
ឯកសារគោលរបស់អាស៊ាន-ផេក គឺជាឯកសារដែលចែងអំពីរបៀបរបបធ្វើការរបស់អាស៊ាន-ផេក ក្នុងនោះមានចែងអំពីតួនាទីរបស់ប្រធានអាស៊ាន-ផេក, របៀបរបបប្រជុំ ទាំងកិច្ចប្រជុំថ្នាក់ដឹកនាំ និងលេខាធិការដ្ឋាន និងភារកិច្ចរបស់លេខាធិការដ្ឋាននៃម្ចាស់ផ្ទះនីមួយៗ ក្នុងកិច្ចការគាំទ្រដល់កម្មវិធី និងជំរុញការអនុវត្តផែនការសកម្មភាពរបស់អាស៊ាន-ផេក ។
សូមរំលឹកផងដែរថាអាស៊ាន-ផេក (ASEAN-PAC) ដែលពីមុនមានឈ្មោះថាភាគីប្រឆាំងអំពើពុករលួយអាស៊ីអាគ្នេយ៍ (SEA-PAC) ត្រូវបានបង្កើតទ្បើងក្នុងឆ្នាំ២០០៤ និងត្រូវបានទទួលស្គាល់ជាអង្គភាពភ្ជាប់ខ្លួនជាមួយអាស៊ាន (Entity Associated with ASEAN) នៅក្នុងឆ្នាំ២០១៧ ។ ស៊ី-ផេក (SEA-PAC) បន្ទាប់មកបានប្តូរឈ្មោះទៅជាអាស៊ាន-ផេក (ASEAN-PAC) នៅឆ្នាំ ២០១៩ ដែលបច្ចុប្បន្នមានសមាជិកទាំងអស់ចំនួន ១០ គឺ អាស៊ាន ១០ប្រទេស។
អាស៊ាន-ផេក រៀបចំកិច្ចប្រជុំទៀងទាត់របស់ខ្លួនចំនួន ២លើក ក្នុងមួយឆ្នាំ គឺកិច្ចប្រជុំថ្នាក់ដឹកនាំអាស៊ាន-ផេក និង កិច្ចប្រជុំលេខាធិការដ្ឋានសម្រាប់ត្រៀមរៀបចំកិច្ចប្រជុំថ្នាក់ដឹកនាំ។ ជាមួយគ្នានេះអាស៊ាន-ផេកក៏មានរៀបចំជាសិក្ខាសាលាថ្នាក់តំបន់ ក្រោមកិច្ចសហការជាមួយដៃគូដែលបានព្រមព្រៀងដោយអាស៊ាន-ផេក ផងដែរ៕