មិនប្រកាសទ្រព្រសម្បត្តិ អតីតនាយករដ្ឋមន្ត្រីប៉ាគីស្ថាន ត្រូវជាប់ពន្ធនាគារ ៣ ឆ្នាំ
ដោយ សូរ្យសែង៖
កាលពីថ្ងៃទី៥ ខែសីហា អតីតនាយករដ្ឋមន្ត្រីវ័យ ៧០ឆ្នាំ លោក អ៊ីមរ៉ង់ ខាន់ (Imran Khan) ត្រូវបានកាត់ទោសឲ្យជាប់ពន្ធនាគារ ៣ ឆ្នាំពីបទពុករលួយ ក្រោយពីបានរកឃើញមានពិរុទ្ធពីការមិនព្រមប្រកាសទ្រព្យសម្បត្តិ ដែលបានពីការលក់ «អំណោយ» ក្នុងអំឡុងពេលកាន់តំណែងរបស់លោក ។
ទោះយ៉ាងណា លោក ខាន់ បានបដិសេធការចោទប្រកាន់នេះ ហើយបាននិយាយថា លោកនឹងបន្តប្តឹងទៅឧទ្ធរណ៍ មុនពេលត្រូវបានប៉ូលិសចាប់ខ្លួនពីផ្ទះរបស់គាត់ក្នុងទីក្រុង ឡាហ័រ ទៅកាន់ពន្ធនាគារក្នុងខេត្ត ប៉ុនចាបភ្លាមៗ ។
ក្រោយសាលក្រមរបស់តុលាការ សេចក្តីថ្លែងការណ៍ជាវីដេអូដែលបានរៀបចំទុកជាមុនរបស់អតីតនាយករដ្ឋមន្ត្រីប៉ាគីស្ថានត្រូវបានបញ្ចេញ លោក ខាន់ អំពាវនាវឲ្យអ្នកគាំទ្រដើរក្បួនទូទាំងប្រទេស ដើម្បីប្រឆាំងតវ៉ានឹងការសម្រេចចិត្តនេះ ។
លោក ខាន់ គឺជាអតីតកីឡាករ Cricket ដែលប្រែក្លាយអ្នកនយោបាយ ។ លោកបានឈ្នះការបោះឆ្នោតក្នុងឆ្នាំ ២០១៨ ប៉ុន្តែត្រូវបានដកចេញពីតំណែងនៅក្នុងការបោះឆ្នោតមិនទុកចិត្តកាលពីឆ្នាំមុន បន្ទាប់ពីធ្លាក់ចេញពីជួរយោធា ។ តាំងពីពេលនោះមក លោក ខាន់ ក៏កំពុងប្រឈមនឹងបណ្តឹងជាង ១០០ លើអ្វីដែលត្រូវបានគេមើលឃើញថាមានហេតុផលនយោបាយ ។
សាលក្រមរបស់តុលាការផ្តោតលើការបកស្រាយខុសរបស់ ខាន់ ចំពោះអំណោយដែលទទួលបានពីថ្នាក់ខ្ពស់នៅបរទេស និងប្រាក់ចំណូលដែលបានមកពីការលក់អំណោយ ។ អំណោយដែលត្រូវបានរាយការណ៍ថាបានលក់រួមមាន: នាឡិកាម៉ាក Rolex ចិញ្ចៀន និងក្រវិលមួយគូ តម្លៃសរុបជាង ៦៣ ម៉ឺនដុល្លារ ។ ជាលទ្ធផល សាលក្រម ក៏បានហាម ខាន់ មិនឱ្យធ្វើនយោបាយរយៈពេល៥ឆ្នាំផងដែរ ៕
ប្រភព AFP
អត្ថបទប្រហាក់ប្រហែល
ពាណិជ្ជកម្ម
អត្ថបទថ្មីៗ
អត្ថបទពេញនិយម