ពី prachachat ដោយ សូរ្យសែង ៖
កូរ៉េខាងត្បូងមានឱនភាពពាណិជ្ជកម្មជាមួយប្រទេសចិនជាលើកដំបូងក្នុងរយៈពេល 31 ឆ្នាំ ដោយសារតែបាននាំចេញទៅកាន់ប្រទេសចិនតិចជាងមុន ។
ទីភ្នាក់ងារសារព័ត៌មាន Nikkei Asia បានរាយការណ៍កាលពីថ្ងៃទី 1 ខែមករា ឆ្នាំ 2024 ថា ផលិតផលចិនកំពុងឈានជើងចូលទីផ្សារជាច្រើននៅចុងឆ្នាំ 2023 រីឯប្រទេសកូរ៉េខាងត្បូងមានឱនភាពពាណិជ្ជកម្មជាមួយប្រទេសចិនចំនួន 18 ពាន់លានដុល្លារក្នុងឆ្នាំ 2023 ដែលជាការកត់សម្គាល់ឱនភាពលើកដំបូងរបស់កូរ៉េខាងត្បូងក្នុងរយៈពេល 31 ឆ្នាំ។
ការនាំចេញរបស់កូរ៉េខាងត្បូងទៅកាន់ប្រទេសចិនក្នុងឆ្នាំ 2023 មានតម្លៃ 124.8 ពាន់លានដុល្លារ ធ្លាក់ចុះ 20% ពី 155.7 ពាន់លានដុល្លារក្នុងឆ្នាំ 2022 ខណៈដែលការនាំចូលពីប្រទេសចិនមានតម្លៃ 142.8 ពាន់លានដុល្លារ ធ្លាក់ចុះ 8% ពី 154.5 ពាន់លានដុល្លារនៅឆ្នាំ 2022 ។ ការធ្លាក់ចុះយ៉ាងខ្លាំងនៃការនាំចេញនេះ នឹងធ្វើឱ្យកូរ៉េខាងត្បូង មានឱនភាពពាណិជ្ជកម្មជាមួយចិន ពីអតិរេក (ច្រើនក្រៃ ច្រើនលើស ដែលលើសពីកំណត់ ដែលហួសពីចំនួន) ចំនួន 1.2 ពាន់លានដុល្លារកាលពីឆ្នាំមុន។
ផ្ទុយទៅវិញ ការនាំចេញរបស់កូរ៉េខាងត្បូងទៅកាន់សហរដ្ឋអាមេរិកក្នុងឆ្នាំ 2023 បានកើនឡើង 5% និងមួយខែធ្នូ 2023 ដែលការនាំចេញប្រចាំខែទៅកាន់សហរដ្ឋអាមេរិក គឺខ្ពស់ជាងការនាំចេញប្រចាំខែទៅប្រទេសចិន ជាលើកដំបូងក្នុងរយៈពេល 20 ឆ្នាំ ដោយការលក់យ៉ាងមមាញឹកនៅក្នុងប្រភេទរថយន្ត គ្រឿងបន្លាស់រថយន្ត និងអាគុយរថយន្ត ។
ការនាំចេញទៅកាន់សហរដ្ឋអាមេរិកបានកើនឡើងនេះ គឺស្របតាមការទូតរបស់ប្រធានាធិបតីកូរ៉េខាងត្បូង Yoon Suk Yeol ដែលមានទំនាក់ទំនងជិតស្និទ្ធជាមួយរដ្ឋាភិបាលអាមេរិក និងគាំទ្រគោលជំហរនយោបាយផងដែរ ។ ក្រុមហ៊ុនកូរ៉េខាងត្បូង មានដូចជា Samsung, Hyundai Motor, LG, SK និង Lotte បានបង្កើនការវិនិយោគរបស់ពួកគេនៅសហរដ្ឋអាមេរិកក្នុងអំឡុងឆ្នាំកន្លងទៅ ។
ការនាំចេញសរុបរបស់កូរ៉េខាងត្បូងក្នុងឆ្នាំ 2023 មានតម្លៃ 632.7 ពាន់លានដុល្លារ ធ្លាក់ចុះ 7% ធៀបនឹងឆ្នាំមុន ដោយសារការនាំចេញបានធ្លាក់ចុះជាលើកដំបូងក្នុងរយៈពេលបីឆ្នាំ ចំណែកការនាំចូលក៏ធ្លាក់ចុះផងដែរ ដោយធ្លាក់ចុះ 12% មកនៅត្រឹម 642.7 ពាន់លានដុល្លារ។
ចំពោះសមតុល្យពាណិជ្ជកម្មរួម ប្រទេសកូរ៉េខាងត្បូងមានឱនភាពពាណិជ្ជកម្មចំនួន 10 ពាន់លានដុល្លារ ដែលជាឆ្នាំទីពីរជាប់ៗគ្នានៃឱនភាពពាណិជ្ជកម្ម ទោះបីជាឱនភាពនេះធ្លាក់ចុះពីឆ្នាំ2022 ចំនួន 47.8 ពាន់លានដុល្លារក៏ដោយ ៕