ក្រុម ភីថា ៨ នាក់ត្រូវដាក់ទោសម្នាក់ ៤ ខែ ព្យួរ ២ឆ្នាំ និងពិន័យ ១១.២០០ បាត ពីបទល្មើសជំនុំជាសាធារណៈ
អត្ថបទ សូរ្យសែង៖
កាសែត sanook របស់ថៃរាយការណ៍នៅថ្ងៃនេះ(5 កុម្ភៈ) ថា តុលាការប៉ាធុមវ៉ាន់ បានកោះហៅក្រុម ភីថា មកស្តាប់សាលក្រម ក្នុងសំណុំរឿងខ្មៅលេខ 767/2020 របស់ព្រះរាជអាជ្ញាអមសាលាដំបូងខណ្ឌ៦ (ប៉ាធុមវ៉ាន់) ជាដើមបណ្តឹង ប្តឹងលោកស្រី ណាតថា មហាត្ថាណា លោក ផារិទ្ធ ជីវ៉ារ៉ាក់ លោក ថាណាវ៉ាត់ វង្សឆៃ លោក ថាណាថន លោក ភីយ៉ាប៊ុត សែងកានុកគុណ លោកស្រី ផានិកា លោក ភីថា លីមចារើនរ៉ាត់ ប្រធានគណបក្សកាវក្លៃ និងលោក ផៃរ៉ាត់ថាឆូត ចាន់តារ៉ាក់ឆន ជាចុងចោទលេខ 1-8 ក្នុងកំហុសបទល្មើសតាមច្បាប់ស្ដីពីការជំនុំជាសាធារណៈ និងមិនជូនដំណឹងនៃការជួបជុំ មិនតិចជាង 24 ម៉ោងមុនពេលចាប់ផ្តើមការជួបជុំ, បានរួមគ្នារៀបចំការជួបជុំសាធារណៈក្នុងរង្វង់ 150 ម៉ែត្រពីព្រះបរមរាជវាំង, រួមគ្នារៀបចំការប្រជុំសាធារណៈដោយរារាំងផ្លូវចូល និងច្រកចេញ ឬរំខានដល់ប្រតិបត្តិការ ឬប្រើប្រាស់សេវាស្ថានីយរថភ្លើង, រួមគ្នារៀបចំការជួបជុំជាសាធារណៈដោយមិនថែរក្សា និងទទួលខុសត្រូវដល់ការរាំងស្ទះដល់ប្រជាពលរដ្ឋដែលប្រើប្រាស់ទីសាធារណៈ, រួមគ្នារៀបចំការជួបជុំសាធារណៈបង្កការរំខានដល់ប្រជាពលរដ្ឋដែលប្រើប្រាស់ទីសាធារណៈនៅកន្លែងប្រមូលផ្តុំ ឬធ្វើឱ្យអ្នកដទៃក្តៅក្រហាយលើសពីអ្វីដែលអាចរំពឹងទុក, ច្បាប់ស្តីពីការគ្រប់គ្រងការផ្សាយពាណិជ្ជកម្មដោយប្រើឧបករណ៍បំពងសំឡេង ។
ពីករណីដែលក្រុមចុងចោទបានចូលរួមក្នុងការប្រមូលផ្តុំជាក្រុមនៅតំបន់ Skywalk នៅផ្លូវបំបែកប៉ាធុមវ៉ាន់ នៅមុខមជ្ឈមណ្ឌលសិល្បៈ និងវប្បធម៌ទីក្រុងបាងកក កាលពីថ្ងៃទី១៤ ខែធ្នូ ឆ្នាំ២០១៩ នៅថ្ងៃនេះ ជនជាប់ចោទបានមកតុលាការជាមួយមេធាវី ។
តុលាការបានពិចារណាហើយរកឃើញថា ជនជាប់ចោទបានប្រព្រឹត្តបទល្មើសតាមបណ្តឹងរបស់ដើមបណ្តឹង និងបង្គាប់ឲ្យផ្តន្ទាទោសមនុស្ស ៨ នាក់ដាក់ពន្ធនាគារម្នាក់ៗ ៤ ខែ ព្យួររយៈពេល ២ ឆ្នាំ ចំណែកបទល្មើសតាមបទចោទប្រកាន់ព្រហ្មទណ្ឌ និងបទល្មើសចេតនាមិនជូនដំណឹងដល់ការប្រជុំ និងប្រើឧបករណ៍បំពងសំឡេងដោយគ្មានការអនុញ្ញាត ពិន័យជាប្រាក់សរុប ១១ ២០០បាត ។
ក្រោយពីមានរឿងអាស្រូវលើភាគហ៊ុន ITV លោក ភីថា ត្រូវបានគេរំពឹងថា នឹងជាប់រឿងក្តីមួយទៀត គឺការចង់ធ្វើ វិសោធនកម្មមាត្រា ១១២ ប៉ុន្តែថ្ងៃនេះ តុលាការបានត្រឹមចោទប្រកាន់ទៅលើរឿងការប្រមូលផ្តុំមនុស្សជាសាធារណៈ ៕
អត្ថបទប្រហាក់ប្រហែល
ពាណិជ្ជកម្ម
អត្ថបទថ្មីៗ
អត្ថបទពេញនិយម