ប្រភពពីវេបសាយ bangkokbiznews
ដោយ សាវុឌ្ឍ
តម្រួតនៅរដ្ឋធានីកាតម៉ាន់ឌូ ប្រទេសនេប៉ាល់ បានបង្ក្រាបដោយបាញ់ឧស្ម័នបង្ហូរទឹកភ្នែក និងកាំភ្លើងបាញ់ទឹក បំបែកហ្វូងអ្នកតវ៉ាជាច្រើនរយនាក់ ដែលប្រឆាំងនឹងគម្រោងការកម្មវិធីជំនួយហេដ្ឋារចនាសម្ព័ន្ធរបស់សហរដ្ឋអាមេរិក ដែលត្រូវបានអនុម័តកាលពីថ្ងៃទី ២០ ខែកុម្ភៈ ដោយធ្វើឱ្យបាតុករជាច្រើនរងរបួស ដែលភាគច្រើនជាអ្នកគាំទ្រគណបក្សកុម្មុយនិស្តដែលកំពុងកាន់អំណាចសំខាន់ពីររបស់ប្រទេសនេប៉ាល់ ។
ក្នុងឆ្នាំ ២០១៧ ទីភ្នាក់ងារសហរដ្ឋអាមេរិកសម្រាប់ជំនួយ (USAID) បានយល់ព្រមផ្តល់ជំនួយចំនួន ៥០០ លានដុល្លារសម្រាប់គម្រោងអភិវឌ្ឍផ្លូវថ្នល់ ៣០០ គីឡូម៉ែត្រ ដែលរដ្ឋាភិបាលនេប៉ាល់និយាយថា ជាថវិកាជំនួយគ្មានសំណង និងគ្មានលក្ខខណ្ឌ ប៉ុន្តែបក្សប្រឆាំងចាត់ទុកថាវាជាការរំលោភច្បាប់ និងអធិបតេយ្យភាពរបស់ប្រទេស វាជាការធ្វេសប្រហែសរបស់សមាជិកសភា ។
រដ្ឋមន្ត្រីក្រសួងទំនាក់ទំនង និងបច្ចេកវិទ្យាព័ត៌មានរបស់ប្រទេសនេប៉ាល់ បានយករឿងនេះទៅអនុម័តពីក្រុមប្រឹក្សា ដោយសារតែមើលឃើញថា វាជាអត្ថប្រយោជន៍ដល់ប្រជាជន យ៉ាងហោចណាស់ ២៤ លាននាក់ក្នុងចំណោមប្រជាជន ៣០ លាននាក់ ។
បើតាមស្ថានទូតអាមេរិកប្រចាំប្រទេសនេប៉ាល់បញ្ជាក់ថា ជំនួយនេះជាអំណោយរបស់ជនជាតិអាមេរិកក្នុងការជួយបង្កើតការងារ កែលម្អហេដ្ឋារចនាសម្ព័ន្ធ និងគុណភាពជីវិតរបស់ប្រជាជននេប៉ាល់ ហើយក៏ជាសំណើរបស់រដ្ឋាភិបាលនេប៉ាល់ ក្នុងការកាត់បន្ថយភាពក្រីក្រ និងបង្កើនសេដ្ឋកិច្ចផងដែរ ៕