REUTERS/Valentyn Ogirenko/File Photo
អត្ថបទ សូរ្យរិទ្ធ៖
ប្រភពជាច្រើនបានប្រាប់ CNN ថា សហរដ្ឋអាមេរិកបានតាមដានសព្វាអាវុធ រួមទាំងមីស៊ីលប្រឆាំងរថក្រោះ មីស៊ីលប្រឆាំងយន្តហោះ បញ្ជូនទៅឲ្យអ៊ុយក្រែនតាមតែមធ្យោបាយមួយចំនួនប៉ុណ្ណោះ ព្រោះអាមេរិកមិនមានវត្តមានយោធានៅអ៊ុយក្រែនទេ ខណៈពេលដែលប្រព័ន្ធអាវុធធុនតូចៗ អាចចល័តបានស្រួលកំពុងបន្តហូរចូលអ៊ុយក្រែន។ អាមេរិកមើលឃើញថា ការផ្តល់សព្វាវុធរាប់រយលានដុល្លារវាមានសារសំខាន់ណាស់ចំពោះសមត្ថភាពរបស់អ៊ុយក្រែនក្នុងការប្រយុទ្ធនឹងការឈ្លានពានរបស់រុស្ស៊ី ។
ទាំងមន្ត្រីអាមេរិក និងអ្នកវិភាគការពារជាតិយល់ឃើញថា ហានិភ័យគឺរយៈពេលវែង សព្វាវុធទាំងនោះខ្លះអាចធ្លាក់ទៅក្នុងដៃយោធា និងកងកម្លាំងប្រដាប់អាវុធផ្សេងទៀត ដែលសហរដ្ឋអាមេរិកមិនមានបំណងបញ្ជូនអាវុធទៅឱ្យ ។ ប្រភពមួយដែលត្រូវបានគេរាយការណ៍អំពីការស៊ើបអង្កេតរបស់សហរដ្ឋអាមេរិកបានប្រាប់ CNN ថា៖ «យើងមានភាពស្មោះត្រង់មួយរយៈខ្លី ប៉ុន្តែនៅពេលដែលចូលទៅក្នុងពពកនៃសង្រ្គាម យើងស្ទើរតែមិនមានអ្វីទាំងអស់ វា (អាវុធ) បានធ្លាក់ចូលទៅក្នុងប្រហោងខ្មៅដ៏ធំមួយ អ្នកស្ទើរតែមិនដឹងអំពីវាទេ»។
CNN បាននិយាយយោងតាមមន្ត្រីការពារជាតិម្នាក់ថា៖ ក្នុងការសម្រេចចិត្តបញ្ជូនសព្វាវុធ និងឧបករណ៍តម្លៃរាប់ពាន់លានដុល្លារទៅឲ្យអ៊ុយក្រែន ខាងរដ្ឋបាលរបស់លោក ចូ បៃដេន បានចាត់ទុកថាជាហានិភ័យមួយ ដែលអាវុធមួយចំនួនអាចធ្លាក់នៅទីកន្លែងដែលមិននឹកស្មានដល់ ប៉ុន្តែបានចាត់ទុកថា ការផ្គត់ផ្គង់អាវុធមិនគ្រប់គ្រាន់ដល់អ៊ុយក្រែន គឺជាហានិភ័យធំជាង ព្រោះយោធាអាមេរិកមិននៅក្នុងប្រទេសអ៊ុយក្រែនទេ ដូច្នេះហើយ អាមេរិក និង NATO ពឹងផ្អែកជាចម្បងលើព័ត៌មានពីរដ្ឋាភិបាលអ៊ុយក្រែនដោយផ្ទាល់ ។ មន្ត្រីជាច្រើនបានដឹងថា អ៊ុយក្រែនត្រូវបានលើកទឹកចិត្តឱ្យផ្តល់ព័ត៌មានជាក់លាក់ដែលនឹងជួយគាំទ្រជំនួយ ដែលនឹងបានទទួលអាវុធ និងជំនួយការទូតបន្ថែមទៀត ។
CNN បាននិយាយទៀតថា ក្នុងរយៈពេលប៉ុន្មានខែកន្លងមកនេះ មន្ត្រីអាមេរិក និងលោកខាងលិចបានចែករំលែកព័ត៌មានអំពីប្រទេសរុស្ស៊ី ដែលដឹងថា តើឃ្លាំងអាវុធ, សក្តានុពលរបស់កងទ័ព ស្ថិតនៅកន្លែងណា និងប្រភេទអាវុធណាដែលរុស្ស៊ីប្រើជាមយយអ៊ុយក្រែន ប៉ុន្តែសម្រាប់កងទ័ពអ៊ុយក្រែន មន្ត្រីដឹងថាលោកខាងលិច រួមទាំងសហរដ្ឋអាមេរិកក៏នៅមានចន្លោះប្រហោងនៃព័ត៌មាននេះ ។
រដ្ឋាភិបាលអាមេរិក និងប្រទេសសមាជិកណាតូ បានផ្តល់អាវុធតាមការអំពាវនាវរបស់យោធាអ៊ុយក្រែន ទាំងមីស៊ីល Javelin ឬ Stinger ឬប្រព័ន្ធការពារដែនអាកាស S-300 របស់ស្លូវ៉ាគី ដែលត្រូវបានដាក់ពង្រាយកាលពីសប្តាហ៍មុន ។
ទូរទស្សន៍ CNN បាននិយាយថា ប្រភពជំនាញក្នុងរឿងនេះបាននិយាយថា៖ តាមធម្មជាតិ កាំជ្រួច Javelin និង Stinger និងកាំភ្លើងវែង រួមទាំងគ្រាប់រំសេវ គឺពិបាកតាមដានជាងអាវុធធំៗ ដូចជា S-300 ដែលដឹកជញ្ជូនតាមរថភ្លើង ប៉ុន្តែវាពិបាកក្នុងការតាមដានការចល័ត និងការប្រើប្រាស់ក្នុងពេលវេលាជាក់ស្តែង ។
កាលពីសប្តាហ៍មុន អាមេរិកទើបតែបញ្ជូនអាវុធធុនធ្ងន់ រួមទាំងឧទ្ធម្ភាគចក្រ Mi-17 ចំនួន ១១ គ្រឿង កាណុង Howitzer ១៨ 155mm និង 300 Switchblade យន្តហោះគ្មានមនុស្សបើកទៅឲ្យអ៊ុយក្រែន ប៉ុន្តែអាវុធទាំងនេះភាគច្រើនមិនទាន់ត្រូវបានប្រើប្រាស់នៅឡើយទេ ហើយយន្តហោះគ្មានមនុស្សបើក Switchblade គឺជាយន្តហោះបើកប្រើតែមួយដង ដែលធ្វើឱ្យពួកគេពិបាកក្នុងការតាមដាន ។
នេះបើតាមលោក ចន ខឺប៊ី (John Kirby) អ្នកនាំពាក្យក្រសួងការពារជាតិអាមេរិកនិយាយថា ក្រសួងការពារជាតិមិនបានបន្ទោសអ៊ុយក្រែនទេ ហើយរថយន្តដឹកសព្វាវុធដែលផ្តល់ដោយក្រសួងការពារជាតិអាមេរិកនឹងត្រូវទាហានអ៊ុយក្រែនទួលនៅប៉ូឡូញ ហើយបើកចូលអ៊ុយក្រែន ដូច្នេះ «បន្ទាប់មក វាអាស្រ័យទៅលើអ៊ុយក្រែន កន្លែងដែលត្រូវយកវាទុក និង របៀបបែងចែកវានៅក្នុងប្រទេស» ៕