លោកស្រី Crystal Lina Georgeva នាយកគ្រប់គ្រងមូលនិធិរូបិយវត្ថុអន្តរជាតិ 

ពីវេបសាយ matichon

ដោយ សូរ្យសែង៖

លោកស្រី Crystal Lina Georgeva នាយកគ្រប់គ្រងមូលនិធិរូបិយវត្ថុអន្តរជាតិ (International Monetary Fund= IMF) បានធ្វើសំណើមួយនៅឯកិច្ចប្រជុំកំពូលស្តីពីសុខភាព ដែលរៀបចំឡើងដោយគណៈកម្មការអឺរ៉ុប និងក្រុមប្រទេស G20 បានស្នើវិធីមួយដើម្បីបញ្ចប់ការរាតត្បាតកូវីដ-១៩ ជាសកល គឺត្រូវចំណាយថវិកាចំនួន ៥០.០០០ លានដុល្លារ ដើម្បីផ្តល់មូលនិធិសម្រាប់ការចាក់វ៉ាក់សាំងការពារឲ្យបានគ្រប់គ្រាន់ដល់ប្រជាជនគ្រប់ប្រទេសទូទាំងពិភពលោកចំនួន ៤០% នៃប្រទេសនីមួយៗក្នុងឆ្នាំ២០២១ និងបង្កើនវាយ៉ាងហោចណាស់ដល់ ៦០ ភាគរយនៅឆមាសទីមួយនៃឆ្នាំ២០២២ `។

ថវិកា ៥០.០០០ លានដុល្លារខាងលើ នឹងបានមកពីការគាំទ្ររបស់ប្រទេសអ្នកមាន និងពីការបរិច្ចាគផ្សេងៗ រួម ៣៥ លានដុល្លារ វានឹងជាសកម្មភាពរបស់រដ្ឋាភិបាលនៃប្រជាជាតិទាំងអស់ ដោយពឹងផ្អែកលើយន្តការកម្ចីការប្រាក់ទាបរបស់ធនាគារអភិវឌ្ឍន៍ផ្សេងៗ ។

នៅក្នុងសំណើរបស់ IMF បាននិយាយថា ការដំណើរការខាងលើមានតម្លៃស្មើនឹងការបញ្ចូលថវិកាទៅក្នុងប្រព័ន្ធសេដ្ឋកិច្ចពិភពលោកដល់ចំនួន ៩ លានលានដុល្លារនៅឆ្នាំ ២០២៥ ព្រោះវាបានជួយឲ្យសកម្មភាពសេដ្ឋកិច្ចពិភពលោកត្រឡប់មករកសភាវៈប្រក្រតីបានលឿនជាងមុន ដែលនឹងនាំឱ្យបណ្តាប្រទេសអ្នកមានបានទទួលប្រយោជន៍ច្រើនបំផុតផងដែរ ។

ផ្ទុយទៅវិញ ប្រសិនបើមិនដំណើរការបែបនេះទេ ការស្តារខ្លួនបែបមិនស្មើគ្នាពីបញ្ហារាតត្បាតនៃប្រទេសនីមួយៗ​ នឹងអូសបន្លាយដល់ឆ្នាំ ២០២២ ហើយនឹងបញ្ជូនផលឱ្យមានហានិភ័យធ្ងន់ធ្ងរដល់ពិភពលោកទាំងមូល ។

លោកស្រី Georgeva បាននិយាយថា បណ្តាប្រទេសសេដ្ឋកិច្ចជឿនលឿនទាំងឡាយ ដែលត្រូវសុំឱ្យរួមចំណែកជាថវិកាផ្នែកធំសម្រាប់កិច្ចការខាងលើនេះ នឹងបានទទួលប្រាក់ចំណូលខ្ពស់បំផុតមិនធ្លាប់មាននៅក្នុងប្រវត្តិសាស្ត្រនៃការវិនិយោគបែបទំនើបនេះ ដោយនឹងទទួលលទ្ធផលជំនួសមកវិញក្នុងរូបបែបនៃកំណើនផលិតផលក្នុងស្រុកសរុប (GDP) ខ្ពស់ឡើងដល់ ៤០ ភាគរយ និងចំណូលពន្ធប្រមាណ ១ លានលានដុល្លារ ៕