រដ្ឋាភិបាលចិន នៅថ្ងៃទី ៥ មិថុនានេះ ឲ្យដឹងថា លោក យិន វើយទុង CEO របស់ក្រុមហ៊ុនស៊ីណូវ៉ាក់ បាយអូថិក (Sinovac Biotech) ជាក្រុមហ៊ុនផលិតឱសថដ៏ធំនៅប្រទេសចិនពោលថា វ៉ាក់សាំងការពារកូវីដ-១៩ របស់ Sinovac ដែលមានឈ្មោះថា «កូរ៉ូណាវ៉ាក់ (CoronaVac) » ត្រូវបានអនុម័តជាករណីបន្ទាន់ ពីភ្នាក់ងារឱសថផ្នែកសុខភាពជាតិ ក្នុងទីក្រុងប៉េកាំង ឲ្យប្រើជាមួយមនុស្សពី ៣ - ១៧ ឆ្នាំ ។
លទ្ធផលនៃការសាកល្បងព្យាបាលដំបូង និងលើកទី ២ បានបង្ហាញថា វ៉ាក់សាំងស៊ីណូវ៉ាក់អាចជួយបង្កើនភាពស៊ាំប្រឆាំងនឹងកូវីដ-១៩ ពីសំណាក់ក្មេងអាយុពី ៣-១៧ ឆ្នាំ ទោះបីអ្នកទទួលវ៉ាក់សាំងខ្លះមានប្រតិកម្មមិនល្អក៏ដោយ ក៏លោកវេជ្ជបណ្ឌិត យិន បានបញ្ជាក់ថា វាមិនធ្ងន់ធ្ងរទេ ហើយអាចព្យាបាលបានតាមនីតិវិធីវេជ្ជសាស្ត្រមូលដ្ឋាន ។
ចំណែកវ៉ាក់សាំងចាក់តែមួយម្ជុលរបស់ Cansino ដែលប្រើបច្ចេកវិទ្យា virus vector ផ្សេងពីស៊ីណូវ៉ាក់ និង ស៊ីណូហ្វាម កំពុងសាកល្បងខាងគ្លីនិកដំណាក់កាលទី ២ ជាមួយក្រុមកុមារពីអាយុ ៦-១៧ ឆ្នាំ ។
បច្ចុប្បន្ននេះរដ្ឋាភិបាលចិនអនុញ្ញាតឱ្យចាក់វ៉ាក់សាំងប្រឆាំងនឹងកូវីដ-១៩ សម្រាប់តែមនុស្សដែលមានអាយុ ១៨ ឆ្នាំប៉ុនណោះ និងស្ថិតិរហូតដល់ថ្ងៃទី ៣ ខែមិថុនាបង្ហាញថា ប្រទេសចិនបានចាក់វ៉ាក់សាំងជាមួយមនុស្សចំនួន ៧២៣,៥ លានដូសហើយ ៕
រូបភាពពី GETTY IMAGES
ដោយ សាវុឌ្ឍ