ដោយ សូរ្យសែង៖
វិទ្យុអាស៊ីសេរី ដែលត្រូវគាំទ្រដោយរដ្ឋាភិបាលសហរដ្ឋអាមេរិក និងជាប្រព័ន្ធផ្សព្វផ្សាយបរទេសដំបូងគេ ដែលឈប់ប្រតិបត្តិការនៅហុងកុង បន្ទាប់ពីការអនុម័តច្បាប់សន្តិសុខថ្មី ។
ទីភ្នាក់ងារសារព័ត៌មានបរទេសរាយការណ៍ពីតំបន់រដ្ឋបាលពិសេសហុងកុង ប្រទេសចិន នៅថ្ងៃទី៣០ ខែមីនាថា វិទ្យុអាស៊ីសេរី (RFA) ដែលជាប្រព័ន្ធផ្សព្វផ្សាយឯករាជ្យ បានទទួលជំនួយផ្នែកហិរញ្ញវត្ថុ ពីក្រសួងការបរទេសសហរដ្ឋអាមេរិក ចេញសេចក្តីថ្លែងការណ៍ទាក់ទងនឹងការបិទការិយាល័យនៅហុងកុង «សម្រាប់ហេតុផលសុវត្ថិភាព» ។
មិនទាន់មានសេចក្តីអធិប្បាយជាផ្លូវការលើបញ្ហានេះនៅឡើយទេ ប៉ុន្តែរដ្ឋមន្ត្រីក្រសួងសន្តិសុខហុងកុងលោក គ្រីស តាំង (Chris Tang) បាននិយាយថា ធ្លាប់ថ្កោលទោសវិទ្យុអាស៊ីសេរីថា «និយាយបង្កាច់បង្ខូច» ថាអាជ្ញាធរហុងកុងកំពុងទាញយកផលប្រយោជន៍ពីច្បាប់សន្តិសុខថ្មី ក្នុងគោលដៅគ្រប់គ្រងប្រព័ន្ធផ្សព្វផ្សាយ ហើយព្រមានប្រជាជនកុំឲ្យវង្វេងជាមួយ «ព័ត៌មានមិនពិត» ។
ខណៈពេលដែលលោក អេនថូនី ប្លីនខេន (Antony Blinken) រដ្ឋមន្ត្រីការបរទេសសហរដ្ឋអាមេរិក ធ្វើរបាយការណ៍ទៅសភាថា ប្រទេសចិនបាន«បន្តបំពានកិច្ចសន្យារបស់ខ្លួន»ក្នុងការផ្តល់ស្វ័យភាពហុងកុង បន្ទាប់ពីចក្រភពអង់គ្លេសប្រគល់ឲ្យក្នុងឆ្នាំ 1997 ហើយទីក្រុងប៉េកាំងអាចពឹងផ្អែកលើច្បាប់នេះ ។
RFA ត្រូវបានបង្កើតឡើងក្នុងឆ្នាំ 1996 ហើយមានជាប្រាំបួនភាសាអាស៊ី ជាប្រព័ន្ធផ្សព្វផ្សាយបរទេសដំបូងគេ ដែលបិទការិយាល័យនៅហុងកុង ចាប់តាំងពីច្បាប់សន្តិសុខថ្មីចូលជាធរមាន កាលពីសប្ដាហ៍មុន ។
ច្បាប់នេះត្រូវបានប្រជាជនហុងកុងស្គាល់ថាជា «ច្បាប់មាត្រា ២៣» ព្រោះក្រុមប្រឹក្សាប្រតិបត្តិហុងកុង ដែលយោងមាត្រានេះចែងថា «ហុងកុងគួរតែបង្កើតច្បាប់របស់ខ្លួន ដើម្បីទប់ស្កាត់សកម្មភាពណាមួយ ដែលជាការក្បត់ជាតិ ការបំបែកខ្លួន ការបះបោរ និងការចង់ផ្តួលរំលំរដ្ឋាភិបាលក្រុងប៉េកាំង ។
ច្បាប់នេះបែងចែកកំហុសប្រព្រឹត្តប្រាំប្រភេទ៖ ការបះបោរ ចារកម្ម ការលួចព័ត៌មានរដ្ឋ ការបំផ្លាញសន្តិសុខ និងការជ្រៀតជ្រែកពីខាងក្រៅ មានការពិន័យជាអតិបរមា និងដាក់ពន្ធនាគារអស់មួយជីវិត ដែលរួមដល់«ការបំផ្លិចបំផ្លាញប៉ះពាល់ដល់សន្តិសុខជាតិ» ការផ្តន្ទាទោសដាក់ពន្ធនាគារអតិបរមា 20 ឆ្នាំសម្រាប់ចារកម្ម និងផ្តន្ទាទោសដាក់ពន្ធនាគារ ១៤ ឆ្នាំ ពាក់ព័ន្ធនឹងការជ្រៀតជ្រែកពីខាងក្រៅ ៕