យុគសេដ្ឋកិច្ចឌីជីថល កម្ពុជាត្រូវពង្រឹងធនធានយុវជន

បច្ចេកវិទ្យាថ្ងៃសុក្រ ទី13 ខែវិច្ឆិការ ឆ្នាំ2020 ម៉ោង 10:27 នាទី ព្រឹក

ថ្វីត្បិតតែប្រទេសកម្ពុជាបានទទួលសេដ្ឋកិច្ចឌីជីថលបណ្តើរៗហើយក៏ដោយ ក៏មនុស្សរបស់កម្ពុជា ពិសេសយុវជន​កម្ពុជា​នៅ​ខ្វះ​ជំនាញ​ជា​ច្រើន​ រួម​ទាំងភាសា​បរទេស​ ការ​ដោះ​ស្រាយ​បញ្ហា​ទំនាក់​ទំនង​ផ្ទាល់​មាត់ ​ការ​វិភាគ​ផ្សេងៗ​ និង​ការ​គ្រប់គ្រង​ព័ត៌មាន​លើ​ប្រព័ន្ធ​អនឡាញ​ជាដើម ​ដើម្បី​ត្រៀម​ខ្លួន​ទទួលយក​សេដ្ឋកិច្ច​ឌីជីថល ។ ​នេះ​បើ​តាម​ការ​អះអាង​របស់​អ្នក​ជំនាញ​ផ្នែក​សេដ្ឋកិច្ច​ឌីជីថល ។​

ដូច្នេះ​ យុវ​ជនយើង​ចាំបាច់ត្រូវ​ប្រឹង​ប្រែង​រៀន​សូត្រ​ជំនាញ​ និង​ចំណេះ​ដឹង​ថ្មីៗ​ឲ្យ​បាន​ច្រើន​ដោយ​ខ្លួន​ឯង​ ដោយ​មិន​បាច់​ចាំ​មាន​ការ​ជួយ​ពី​ក្រុម​ហ៊ុន​ណា​មួយ​ ឬ​រដ្ឋាភិបាល​នោះ​ឡើយ ។​

លោក អូនព័ន្ធ មុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ ក្នុងសិក្ខាសាលាស្តីពីគោលនយោបាយ និងទិសដៅស្ពីពីសេដ្ឋកិច្ចឌីជីថលរបស់ប្រទេសកម្ពុជា កាលពីខែមីនា ឆ្នាំ ២០១៩ (Photo Phnom Penh Post)

អ្នកជំនាញម្នាក់បានលើកឡើងថា «ការ​យល់​ច្រឡំ​ថា​ ទាល់​តែ​អ្នក​ចង់​ធ្វើ​ផ្នែក​ IT​ (ព័ត៌មាន​វិទ្យា)​ ​បាន​ទៅ​រៀន​ឌីជីថលកើត​ ឥឡូវ​អ្នក​រៀន​កសិកម្ម​ក៏​ដោយ ​ក៏​ត្រូវ​រៀន​ឌីជីថល​ហ្នឹង​ដែរ​ ព្រោះ​អី​គេ​អាច​ប្រើ​បច្ចេកវិទ្យា ដើម្បី​ពង្រឹង​វិស័យ​កសិកម្ម​ឲ្យ​មានផលិតភាពខ្ពស់​ ដូច្នេះ​វិស័យ​អី​ក៏ដោយក៏​ត្រូវ​រៀន​ផ្នែក​ហ្នឹង​ដែរ»។

ប៉ុន្តែរាជ​រដ្ឋាភិបាល​កម្ពុជា គួរ​ផ្តោត​បន្ថែម​លើ​ការ​អភិវឌ្ឍន៍​ធនធាន​មនុស្ស​ ក្នុង​វិស័យ​សេដ្ឋកិច្ច​ឌីជីថល ធ្វើ​ការ​ស្រាវជ្រាវ ​និង​អភិវឌ្ឍ​ការ​គ្រប់គ្រង​ធុរកិច្ច​តាម​បែប​ឌីជីថល​ និង​បង្កើត​យុទ្ធ​សាស្ត្រ​ក្នុង​ការ​អភិវឌ្ឍន៍​លើ​វិស័យ​នានា​ដែល​ពាក់ព័ន្ធ​នេះ ។

ងាកទៅក្រោយ កាលពីចុងខែមីនា ឆ្នាំ ២០១៩ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានចូលរួមសន្និសីទថ្នាក់ជាតិមួយ ស្តីពីចក្ខុវិស័យប្រទេសកម្ពុជា «ឧស្សាហកម្ម​ ៤.០» ដែល​ជា​និន្នាការ​ស្វ័យប្រវត្តិ​កម្ម​ និង​ការ​ផ្លាស់ប្ដូរ​ទិន្នន័យ​នៅ​ក្នុង​បច្ចេកវិទ្យា​ផលិតកម្ម​ ​ឬ​ការ​ផ្លាស់​ប្តូរ​របៀប​នៃ​ការ​ផលិត​ ដោយ​ពឹង​ផ្អែក​ខ្លាំង​លើ​បច្ចេកវិទ្យា​ ជាជាង​កម្លាំង​មនុស្ស​ផ្ទាល់ ក្នុងនេះសម្តេចបាន​លើក​ពី​ផល​ប្រយោជន៍ ​និង​ផល​ប៉ះពាល់​ផ្សេងៗ​ ដែល​នឹង​កើត​មាន​ក្នុង​ការ​វិវឌ្ឍ​ទៅ​រក​សេដ្ឋកិច្ច​ឌីជីថល​នេះ» ។​

សម្តេចតេជោបាន​ថ្លែងថា ««វា​មាន​គុណសម្បត្តិ​របស់​វា​ ប៉ុន្តែ​យើង​មិន​ត្រូវ​ភ្លេច​គុណវិបត្តិ​ដែល​ជា​បញ្ហា​ប្រឈមនៅ​ក្នុង​យុគ​សម័យ​ថ្មី​របស់​យើង​នេះ​ទេ បើ​អ្វី​ៗ​ត្រូវ​បាន​ធ្វើ​ជំនួស​ដោយ​គ្រឿង​យន្ត​ទៅ​ហើយ​នោះ ។​ តើ​បញ្ហា​ការបាត់​បង់​ការងារ​ធ្វើ​របស់​មនុស្ស​វា​នឹង​ទៅ​ជា​អ្វី?»​

បច្ចុប្បន្ន​នេះ ​ក្រុម​ហ៊ុន​នៅ​ប្រទេស​កម្ពុជា​បាន​ពឹង​លើ​បច្ចេក​វិទ្យា​កាន់​តែ​ខ្លាំង​ឡើងៗ​ដើម្បី​សម្រួល​ប្រតិបត្តិការ​អាជីវកម្ម​របស់​ខ្លួន​ ខណៈ​ដែល​ប្រទេស​នេះ​នៅមាន​ចំនួន​និស្សិត​តិច​តួច​ ដែល​សិក្សា​ជំនាញ​វិទ្យាសាស្រ្ត​ បច្ចេកវិទ្យា​ វិស្វកម្ម​ និង​កសិកម្ម។​ នេះ​បើ​យោង​តាម​ការ​ស្រាវជ្រាវ​។

អ្នក​ជំនាញ​ផ្នែក​នយោបាយ​ឌីជីថលមក​ពី​ប្រទេស​អាល្លឺម៉ង់​បានលើកឡើងថា ប្រទេស​កម្ពុជា​កំពុង​ដើរ​លើ​ផ្លូវ​ត្រឹម​ត្រូវ​ហើយ​ ប៉ុន្តែ​កម្ពុជា​ត្រូវ​ប្រឹងប្រែង​បន្ថែម​ក្នុង​ការ​ពង្រឹង​ជំនាញ​បច្ចេក​វិទ្យា​ដល់យុវជន។​

ដូច្នេះអ្វីដែលយើងចង់និយាយពេលនេះ គឺការ​បណ្តុះបណ្តាលធនធានមនុស្សទៅលើវិស័យសេដ្ឋកិច្ចឌីជីថលនៅក​ម្ពុជា ៕


ហាមធ្វើការចម្លងអត្ថបទ ដោយមិនមានការអនុញ្ញាត្តិ។

ភ្ជាប់ទំនាក់ទំនងជាមួយយើងឥឡូវនេះ

អត្ថបទប្រហាក់ប្រហែល


ពាណិជ្ជកម្ម

អត្ថបទថ្មីៗ

អត្ថបទពេញនិយម