អ្នកណាថារុស្ស៊ីមិនចេះព្រួយ ! ដល់ពេលរុស្ស៊ីរត់ទៅពឹងមិត្តចិនហើយ !
អត្ថបទ សូរ្យរិទ្ធ
រុស្ស៊ីបាននិយាយកាលពីថ្ងៃអាទិត្យ ទី ១៣ មីនាថា ខ្លួនកំពុងពឹងពាក់ទៅលើប្រទេសចិនដើម្បីជួយពួកគេទប់ទល់នឹងផលប៉ះពាល់សេដ្ឋកិច្ចនៃទណ្ឌកម្មរបស់លោកខាងលិច ដែលបានបង្កកមាស និងប្រាក់បម្រុងរូបិយប័ណ្ណបរទេសស្ទើរតែពាក់កណ្តាល។
លោក អាន់ទូន ស៊ីលូណូវ រដ្ឋមន្ត្រីក្រសួងហិរញ្ញវត្ថុរុស្ស៊ីមានប្រសាសន៍ថា «យើងមានទុនបម្រុងមាស និងប្តូររូបិយប័ណ្ណបរទេសមួយចំនួនជារូបិយប័ណ្ណ យាន់(ប្រាក់ចិន) ហើយយើងឃើញថា ប្រទេសលោកខាងលិចកំពុងរឹតសម្ពាធលើប្រទេសចិន ក្នុងការដាក់កម្រិតពាណិជ្ជកម្ម, ប្រាកដណាស់ថា មានសម្ពាធក្នុងការកម្រិតការចូលប្រើប្រាស់ទុនបម្រុងទាំងនោះ»។
«ប៉ុន្តែខ្ញុំគេគិតថា ភាពជាដៃគូរបស់យើងជាមួយប្រទេសចិនក៏នឹងជួយយើងរក្សាកិច្ចសហប្រតិបត្តិការដែលយើងទទួលបានផងដែរ មិនត្រឹមតែរក្សាទេ ប៉ុន្តែក៏កើនឡើងផងដែរ ខណៈទីផ្សារលោកខាងលិចកំពុងតែបិទ»។
ប្រទេសលោកខាងលិចបានដាក់ទណ្ឌកម្មដែលមិនធ្លាប់មានពីមុនមកលើប្រព័ន្ធសាជីវកម្ម និងហិរញ្ញវត្ថុរបស់រុស្ស៊ី ចាប់តាំងពីការលុកលុយចូលអ៊ុយក្រែនថ្ងៃទី ២៤ ខែកុម្ភៈ ឆ្នាំ ២០២២ ។
ការអត្ថាធិប្បាយរបស់លោក ស៊ីលូណូវ នៅក្នុងបទសម្ភាសន៍តាមទូរទស្សន៍ គឺជាសេចក្តីថ្លែងការណ៍ច្បាស់លាស់បំផុតពីទីក្រុងម៉ូស្គូ ដែលពួកគេនឹងស្វែងរកជំនួយពីប្រទេសចិន ដើម្បីកាត់បន្ថយផលប៉ះពាល់ ។
ប្រទេសទាំងពីរបានពង្រឹងកិច្ចសហប្រតិបត្តិការនាពេលថ្មីៗនេះ ក៏ព្រោះតែបានរងនូវសម្ពាធខ្លាំងពីលោកខាងលិចលើបញ្ហាសិទ្ធិមនុស្ស និងបញ្ហាផ្សេងៗ ។
កាលពីថ្ងៃទី៤ ខែកុម្ភៈ ឆ្នាំ ២០២២ ប្រធានាធិបតីរុស្ស៊ី លោក វ្ល៉ាឌីមៀរ ពូទីន និងប្រធានាធិបតីចិន លោក ហ្ស៊ី ជិនពីង បានជួបប្រជុំគ្នានៅទីក្រុងប៉េកាំង ហើយបានប្រកាសអំពីកិច្ចសហប្រតិបត្តិការយុទ្ធសាស្ត្រដែលពួកគេនិយាយថា មានគោលបំណងប្រឆាំងនឹងឥទ្ធិពលរបស់សហរដ្ឋអាមេរិក ហើយបាននិយាយថា «មិត្តភាពគឺគ្មានដែនកំណត់» ។
ការដាក់ទណ្ឌកម្មលើទុនបម្រុងរបស់រុស្ស៊ី បានក្លាយជាវិធានការដ៏ឈឺចាប់បំផុតមួយលើសេដ្ឋកិច្ចរុស្ស៊ី ។ កាលពីខែកន្លង មក ស៊ីលូណូវ និយាយថា រុស្ស៊ីអាចធននឹងទណ្ធកម្មបានដោយសារមានប្រាក់បម្រុងចំនួនច្រើនគួរសម ហើយនៅពិចារណាស្នើ Eurobonds ដល់វិនិយោគិនអន្តរជាតិ នៅពេលដែលការប្រែប្រួលទីផ្សារមានការថយចុះ ។
ថ្ងៃអាទិត្យ ទី ១៣ មីនាកន្លងមក លោកបាននិយាយថា ការដាក់ទណ្ឌកម្មបានបង្កកប្រាក់ប្រហែល ៣០០ ពាន់លានដុល្លារក្នុងចំនួន ៦៤០ ពាន់លានដុល្លារដែលរុស្ស៊ីមានជាមាស និងរូបិយប័ណ្ណបរទេស ។
លោក ស៊ីលូណូវ ក៏បាននិយាយផងដែរថា ប្រទេសរុស្ស៊ីនឹងបំពេញកាតព្វកិច្ចបំណុលរដ្ឋរបស់ខ្លួន ហើយនឹងទូទាត់ប្រាក់រូប្លិ៍ដល់ម្ចាស់បំណុលរបស់ខ្លួន រហូតដល់ទុនបម្រុងរបស់រដ្ឋមិនត្រូវបានព្យួរ ៕
អត្ថបទប្រហាក់ប្រហែល
ពាណិជ្ជកម្ម
អត្ថបទថ្មីៗ
អត្ថបទពេញនិយម