ដោយ សូរ្យសែង៖
កងទ័ពជើងទឹកអាមេរិក និងចិនបញ្ជូន បានបញ្ជូននាវាចម្បាំងទៅចូលរួមសមយុទ្ធ ដែលរៀបចំដោយប្រទេសឥណ្ឌូនេស៊ី ។
ទីភ្នាក់ងារសារព័ត៌មានបរទេសរាយការណ៍ពីទីក្រុងហ្សាការតា ប្រទេសឥណ្ឌូណេស៊ី នៅថ្ងៃទី៥ ខែមិថុនានេះថា កងទ័ពជើងទឹកអាមេរិក និងកងទ័ពជើងទឹករំដោះប្រជាជនចិន (PLA) បានបញ្ជូននាវាចម្បាំងទៅចូលរួមក្នុងសមយុទ្ធពហុភាគីលើកទី៤ មានឈ្មោះ «Komodo» នៅឯឆ្នេរសមុទ្រនៃកោះស៊ូឡាវេស៊ី (Sulawesi) ប្រទេសឥណ្ឌូនេស៊ីដែលស្ថិតនៅភាគខាងកើតនៃប្រទេស សមយុទ្ធនេះ ធ្វើឡើងពីថ្ងៃចន្ទ ទី ៥-៨ មិថុនា ។
ស្ថានទូតអាមេរិកនៅទីក្រុងហ្សាការតា បានចេញសេចក្ដីថ្លែងការណ៍ថា កងទ័ពជើងទឹកអាមេរិកបញ្ជូននាវាការពារដែនសមុទ្រល្បឿនលឿន ទៅចូលរួមនៅក្នុងសមយុទ្ធនេះ ខណៈដែលក្រសួងការពារជាតិចិនបានចេញសេចក្តីថ្លែងការណ៍មួយដែរ អំពីការត្រៀមបញ្ជូននាវាពិឃាដ និងនាវាចម្បាំងចូលរួមសមយុទ្ធផងដែរ ។
លើសពីនេះទៅទៀត ប្រភពពីកងទ័ពឥណ្ឌូណេស៊ីផ្តល់ព័ត៌មានបន្ថែមទៀតថា កងទ័ពជើងទឹកនៃប្រទេសជាច្រើន រួមទាំងរុស្ស៊ី និងអូស្ត្រាលី បញ្ជូននាវាចម្បាំងទៅចូលរួមក្នុងសមយុទ្ធនេះផងដែរ ដោយការហ្វឹកហ្វឺនសមរភូមិនេះ ផ្តោតទៅលើការពង្រឹងកិច្ចសហប្រតិបត្តិការរវាងកងទ័ពជើងទឹករបស់ឥណ្ឌូនេស៊ី ជាមួយដៃគូសំខាន់ៗ ។
រូបភាព GETTY IMAGES