ដោយ សូរ្យរិទ្ធ៖
ការប្រឈមមុខដាក់គ្នាខាងភូមិសាស្ត្រនយោបាយ និងការប្រកួតប្រជែងរវាងចិន និងសហរដ្ឋអាមេរិក យក្សធំពីររបស់ពិភពលោក វាជាបញ្ហាសំខាន់មួយក្នុងកិច្ចការបរទេស ដែលពិភពលោកបាននិងកំពុងមើលក្នុងប៉ុន្មានឆ្នាំចុងក្រោយនេះ បើទោះបីជានៅចុងឆ្នាំមុន មានក្តីសង្ឃឹមយ៉ាងមុតមាំពីជំនួបរវាងប្រធានាធិបតីចិន ហ្ស៊ី ជិនពីង និងប្រធានាធិបតីអាមេរិក ចូ បៃដេន នៅក្នុងកិច្ចប្រជុំមេដឹកនាំសេដ្ឋកិច្ច APEC នៅសានហ្វ្រេនស៊ីស្កូ បានឆ្លុះបញ្ចាំងឱ្យឃើញថា មេដឹកនាំទាំងពីរទទួលស្គាល់សារសំខាន់ និងភាពចាំបាច់នៃកិច្ចសហប្រតិបត្តិការ ក៏បង្ហាញពីការចង់បញ្ឈប់ការធ្លាក់ចុះនៃទំនាក់ទំនងរវាងប្រទេសទាំងពីរផងដែរ ។
ឆ្នាំ 2024 នឹងមិនត្រឹមតែជាការសាកល្បងពីស្ថិរភាពនៃការចរចាចុងក្រោយរបស់មេដឹកនាំទាំងពីរនោះទេ ក្នុងពេលជាមួយគ្នានេះ វាក៏អាចនាំមកនូវភាពវឹកវរថ្មីផងដែរ ។
បញ្ហាឆ្លងច្រកសមុទ្រ
បញ្ហាដំបូងដែលអាចបណ្តាលឱ្យមានការផ្ទុះឡើងនូវភាពតានតឹងជាថ្មី រវាងចិន និងអាមេរិក គឺកាលនៅថ្ងៃទី ១៣ ខែមករា ឆ្នាំ ២០២៣ ក្នុងពេលបោះឆ្នោតប្រធានាធិបតី និងរដ្ឋសភារបស់តៃវ៉ាន់ ។ ចាំមើលមើល៍ ! ប្រតិកម្មរបស់ចិនចំពោះការបោះឆ្នោតតៃវ៉ាន់នាពេលខាងមុខ នឹងកំណត់ទំនាក់ទំនងចិន-អាមេរិកដោយជៀសមិនរួចឬយ៉ាងណា?
សហរដ្ឋអាមេរិកទទួលស្គាល់ថា តៃវ៉ាន់ជាបញ្ហារសើបសម្រាប់ចិន នេះអាចត្រូវបានគេមើលឃើញពីសម័យមុន ទោះបីជាសហរដ្ឋអាមេរិកនិយាយថា ខ្លួនប្រកាន់ខ្ជាប់នឹងគោលនយោបាយចិនតែមួយក៏ដោយ ប៉ុន្តែពួកគេគាំទ្រតៃវ៉ាន់ដោយចំហ និងយល់ព្រមលើការលក់អាវុធដែរឬទេ ។ ក្នុងដំណើរទស្សនកិច្ចទៅកាន់កោះតៃវ៉ាន់របស់លោកស្រី ណានស៊ី ផេឡូស៊ី (Nancy Pelosi) អតីតប្រធានសភាតំណាងរាស្រ្តអាមេរិក និងបន្តដំណើរទស្សនកិច្ចដោយសមាជិកសភាទៅកាន់សហរដ្ឋអាមេរិក ដើម្បីបង្ហាញការគាំទ្រដល់កោះតៃវ៉ាន់ ដែលភាគីទាំងអស់បានដឹងយ៉ាងច្បាស់ថា នេះគឺជាសកម្មភាពដែលបង្កើតការអាក់អន់ចិត្តសម្រាប់ប្រទេសចិន ដែលត្រូវបានចាត់ទុកថា តៃវ៉ាន់គឺជាផ្នែកមួយមិនអាចបំបែកបានរបស់ចិន កាលពីឆ្នាំមុន ។
ដូច្នេះហើយ ទើបប្រធានាធិបតីអាមេរិក ចូ បៃដេន បាននិយាយនៅក្នុងបទសម្ភាសន៍ជាមួយទូរទស្សន៍ CBS 60 Minutes ក្នុងឆ្នាំ 2022 ថា យោធាអាមេរិកបានត្រៀមខ្លួនរួចជាស្រេច ដើម្បីជួយការពារកោះតៃវ៉ាន់ ប្រសិនបើចិនបញ្ជូនកងទ័ពទៅឈ្លានពាន ធ្វើឱ្យក្រសួងការបរទេសចិនឆ្លើយតបភ្លាមៗថា អាមេរិកផ្តល់សញ្ញាខុសយ៉ាងធ្ងន់ធ្ងរ ដែលចង់ឱ្យតៃវ៉ាន់ឯករាជ្យពីប្រទេសចិន ។ ពួកគេក៏បានសម្តែងការមិនពេញចិត្តយ៉ាងខ្លាំង និងប្រឆាំងនឹងការលើកឡើងរបស់លោក បៃដេន ។ យើងក៏រក្សាសិទ្ធិក្នុងការចាត់វិធានការផ្សេងៗផងដែរ ចាំបាច់ដើម្បីទប់ទល់នឹងការទាមទារឯករាជ្យនេះ ។
ស្របគ្នានឹងពេលនេះ តើនរណានាំមុខគេក្នុងការបោះឆ្នោតប្រធានាធិបតីតៃវ៉ាន់នាពេលខាងមុខ? វាហាក់ដូចជាផ្តោតលើអនុប្រធានាធិបតី ឆៃ ឈីង ឌេ និងលោកស្រី ហ្សាវ ប៊ី គីម អតីតតំណាងរបស់តៃវ៉ាន់ប្រចាំសហរដ្ឋអាមេរិក គូប្រជែងមកពីគណបក្សប្រជាធិបតេយ្យឈានមុខ (DPP) ដែលជាគណបក្សរដ្ឋាភិបាលបច្ចុប្បន្ន ដែលសង្កត់ធ្ងន់លើជំហរតឹងរ៉ឹងប្រឆាំងនឹងចិនដីគោក រហូតដល់ចិនបោះត្រាមុខថា មនុស្សមុខពីរ ដើម្បីញែកខ្លួនដើម្បីឯករាជ្យ ព្រមទាំងត្រៀមខ្លួនបដិសេធសំណើចរចារបស់លោក ឆៃ ផងដែរ។
នៅមុនការបោះឆ្នោតឆ្នាំ 1996 សហរដ្ឋអាមេរិកបានបញ្ជូនកងនាវាផ្ទុកយន្តហោះចូលទៅក្នុងច្រកសមុទ្រតៃវ៉ាន់ នៅពេលដែលចិនធ្វើសមយុទ្ធយោធា និងការបាញ់សាកល្បងមីស៊ីល មុនពេលបោះឆ្នោត ។ ក្នុងខណៈបោះឆ្នោតនេះចិនបានបន្តភាពតានតឹង ដោយបញ្ជាក់ថា ការបោះឆ្នោតបែបនេះគឺជាជម្រើសរវាង «សន្តិភាព និងសង្រ្គាម» ហើយបានហៅ DPP ជាក្រុមផ្តាច់ខ្លួនដ៏គ្រោះថ្នាក់ និងបានជំរុញប្រជាជនតៃវ៉ាន់ឱ្យធ្វើការជ្រើសរើសត្រឹមត្រូវ ។
លទ្ធផលបោះឆ្នោតរបស់តៃវ៉ាន់អាចនឹងនាំមកនូវភាពមិនច្បាស់លាស់ដ៏ធំធេង វាអាស្រ័យត្រង់ថា តើមេដឹកនាំថ្មីរបស់តៃវ៉ាន់ មានការយល់ដឹងអំពីស្ថានការណ៍បច្ចុប្បន្នរបស់តៃវ៉ាន់ ពីទស្សនៈរបស់សហរដ្ឋអាមេរិក ចិន ដែរឬទេ ។ ប្រសិនបើ DPP ឈ្នះការបោះឆ្នោតម្តងទៀត វាប្រាកដជានឹងបង្កក្តីបារម្ភដល់ប្រទេសចិន ដែលប្រហែលជាចង់សាកល្បងរដ្ឋាភិបាលថ្មីរបស់តៃវ៉ាន់ ហើយអាចជាជាហានិភ័យផងក៏មិនដឹង !
បេក្ខជន ដូណាល់ ត្រាំ
ការបោះឆ្នោតប្រធានាធិបតីអាមេរិកនៅឆ្នាំនេះ វាអាចមានឥទ្ធិពលខ្លាំងលើទំនាក់ទំនងអាមេរិក និងចិន ជាងការបោះឆ្នោតនៅតៃវ៉ាន់។ លុះត្រាតែមានអ្វីដែលមិននឹកស្មានដល់កើតឡើងនៅនាទីចុងក្រោយ វានឹងក្លាយជាការប្រកួតឡើងវិញរវាងប្រធានាធិបតី ចូ បៃដេន និងអតីតប្រធានាធិបតី ដូណាល់ ត្រាំ ។
វាប្រាកដជានឹងមានវោហាសាស្ត្រដ៏ខ្លាំងក្លាអំពីប្រទេសចិនពីគណបក្សនយោបាយធំៗរបស់សហរដ្ឋអាមេរិក នៅក្នុងយុទ្ធនាការនេះ ប៉ុន្តែលោកប្រធានាធិបតី ហ្ស៊ី ទំនងជានឹងផ្តោតលើសំណួរមួយថា៖ «តើ ត្រាំ នឹងត្រលប់មកវិញឬទេ?» ។
ងាកទៅក្រោយបន្តិច ទំនាក់ទំនងដ៏តានតឹងរវាងសហរដ្ឋអាមេរិក និងចិន ក្រោមការដឹកនាំរបស់អតីតប្រធានាធិបតី បារ៉ាក់ អូបាម៉ា បានផ្តល់ផ្លូវដល់លោក ត្រាំ ជាអ្នកស្នងតំណែងដឹកនាំសហរដ្ឋអាមេរិក ដែលបានប្រកាសសង្គ្រាមពាណិជ្ជកម្មពេញលេញជាមួយចិន និងការចោទប្រកាន់ចិនជុំវិញប្រភពដើមនៃជំងឺកូវីដ-១៩ រួមទាំងភាពតានតឹងថ្មីជុំវិញស្ថានការណ៍របស់តៃវ៉ាន់ ។
ម៉្យាងវិញទៀត ការវិលត្រឡប់របស់លោក ត្រាំ អាចជាផលប្រយោជន៍ភូមិសាស្ត្រនយោបាយសម្រាប់ប្រទេសចិន ក្រោយពីលោក បៃដេន បានបង្កើនសម្ពាធលើប្រទេសចិនដោយរក្សាពន្ធគយសម័យ ត្រាំ បន្ថែមការគ្រប់គ្រងការនាំចេញថ្មីៗ និងពង្រឹងសម្ព័ន្ធភាពរបស់សហរដ្ឋអាមេរិក ប៉ុន្តែសភាវគតិឯកោរបស់ ត្រាំ អាចនាំឱ្យគាត់ដឹកនាំសហរដ្ឋអាមេរិកឱ្យឆ្ងាយពីសម្ព័ន្ធមិត្តរបស់ខ្លួន នោះជាប្រយោជន៍សម្រាប់ប្រទេសចិន ដែលមានអារម្មណ៍ក្តុកក្តួលដោយមហាអំណាចអាមេរិក ។
ជម្លោះពាក់ព័ន្ធនឹង «ឈីប»
ការត្រួតពិនិត្យការនាំចេញរបស់សហរដ្ឋអាមេរិក ដើម្បីការពារមិនឲ្យចិនចូលទៅកាន់ឧបករណ៍អេឡិចត្រូនិកទំនើបបំផុត ទំនងជានឹងកាន់តែខ្លាំងនៅឆ្នាំ 2024 នេះ បន្ទាប់ពីនៅក្នុងខែតុលាឆ្នាំ 2023 រដ្ឋមន្ត្រីក្រសួងពាណិជ្ជកម្មអាមេរិក លោក Gina Raimondo បានរឹតបន្តឹងដែនកំណត់ផ្សេងៗ ដោយបន្ថែមបន្ទះសៀគ្វី (high-end chips) កម្រិតខ្ពស់មួយចំនួន និងបិទចន្លោះប្រហោងផ្សេងៗ ត្រៀមខ្លួនរួចជាស្រេចដើម្បីប្រកាសថា បញ្ហាទាំងនេះនឹងត្រូវបានពិនិត្យឡើងវិញយ៉ាងហោចណាស់ម្តងក្នុងមួយឆ្នាំ ។
មានការជជែកវែកញែកអំពីថា តើការគ្រប់គ្រងការនាំចេញប៉ុន្មាននឹងជួយការពារមិនឲ្យចិនចូលដល់បច្ចេកវិទ្យាផលិតបន្ទះឈីប (សៀគ្វី)កម្រិតខ្ពស់បាន ហើយចិនកំពុងព្យាយាមទប់ទល់នឹងការរឹតបន្តឹងនេះ ប៉ុន្តែការសងសឹកដែលដាក់គោលដៅលើអាជីវកម្មអាមេរិក ក៏អាចបង្អាក់ការវិនិយោគបរទេសបន្ថែមទៀតពីការចូលមកប្រទេសចិនផងដែរ។ ទោះយ៉ាងណាក៏ដោយ ចំពេលតម្រូវការថវិកាទាំងនេះ ដើម្បីគាំទ្រដល់កំណើនសេដ្ឋកិច្ចរបស់ប្រទេសចិន ដែលមានភាពយឺតយ៉ាវ អ្វីដែលលេចធ្លោនោះគឺភាពជាម្ចាស់របស់ប្រទេសចិនចំពោះរ៉ែកម្រដែលចាំបាច់សម្រាប់ផលិតបន្ទះឈីប ។
ភាពតានតឹងលើគោលនយោបាយរបស់សហរដ្ឋអាមេរិក ក៏បានកើនឡើងផងដែរ បន្ទាប់ពីរដ្ឋបាល បៃដេន បានចាប់ផ្តើមក្រុមការងារនៅឆ្នាំ 2023 ដើម្បីប្រឆាំងនឹងកិច្ចខិតខំប្រឹងប្រែងដើម្បីទទួលបានដោយខុសច្បាប់នូវបច្ចេកវិទ្យារសើបរបស់សហរដ្ឋអាមេរិក ហើយមានការស៊ើបអង្កេតដែលកំពុងបន្តលើការរំលោភ ទាក់ទងនឹងការនាំចេញបច្ចេកវិទ្យាទៅកាន់ប្រទេសចិន ។ លោក Matthew S. Axelrod ជំនួយការលេខាធិការពាណិជ្ជកម្ម ទទួលបន្ទុកលើការអនុវត្តការនាំចេញរំពឹងថា វានឹងឈានដល់ការអនុវត្តច្បាប់នាំចេញធំៗនៅឆ្នាំ២០២៤ នេះ។
ក្នុងចំណោមកត្តាជាច្រើនដែលអាចធ្វើឱ្យទំនាក់ទំនងចិន-អាមេរិកកាន់តែអាក្រក់ អ្នកជំនាញចិនដែលធ្វើការក្នុងវិស័យនេះជឿដូច្នេះថា បញ្ហាសេដ្ឋកិច្ចរបស់ប្រទេសចិនអាចនឹងធ្វើឱ្យប្រទេសចិនមានការអត់ធ្មត់កាន់តែខ្លាំង។ ក្រោមកិច្ចខិតខំប្រឹងប្រែងដើម្បីទាក់ទាញការវិនិយោគពីបរទេស បានបញ្ជូនសញ្ញាវិជ្ជមាន ដូចជាការយល់ព្រមពី Mastercard ដើម្បីដំណើរការប័ណ្ណឥណពន្ធនៅក្នុងប្រទេសចិន ។
ទោះជាយ៉ាងណាក៏ដោយ សេដ្ឋកិច្ចចិននៅតែមិនបង្ហាញសញ្ញាល្អនៃការងើបឡើងវិញ បូកនឹងហានិភ័យភូមិសាស្ត្រនយោបាយនៅតែមានកម្រិតខ្ពស់ ហើយក៏នឹងកាត់បន្ថយឱកាសសម្រាប់ក្រុមហ៊ុនបរទេសក្នុងការបណ្តាក់ទុននៅក្នុងប្រទេសចិនផងដែរ ។ ក្រុមហ៊ុនជាច្រើននឹងជៀសមិនរួចងាកទៅវិនិយោគនៅកន្លែងផ្សេងដើម្បីសុវត្ថិភាព។
តើនៅទីបញ្ចប់ ការប្រជែងគ្នាខាងភូមិសាស្ត្រនយោបាយរវាងចិន និងអាមេរិកនឹងធូរស្រាល ឬភាពតានតឹងឡើងដល់កម្រិតណា? យើងត្រូវតែរង់ចាំមើលពេញមួយឆ្នាំនាគនេះ ៕