ដោយ សូរ្យសែង៖

AP រាយការណ៍ពីថ្ងៃទី ១៦ កុម្ភៈថា កម្ពុជា​នឹង​ចាប់​ផ្តើម​ដំឡើង​អន្ទាក់​កាមេរ៉ា​មើលសត្វ​ព្រៃ​រាប់រយ​ក្បាល និង​នាំ​ចូល​ខ្លា​ចំនួន ៤ ក្បាល​ពី​ប្រទេស​ឥណ្ឌា ដែលជាផ្នែកមួយនៃផែនការស្តារចំនួនសត្វខ្លាក្នុងប្រទេស។

សត្វខ្លាត្រូវបានប្រកាសថាផុតពូជនៅក្នុងព្រៃធម្មជាតិក្នុងប្រទេសកម្ពុជាក្នុងឆ្នាំ 2016 ដោយអង្គការមូលនិធិសត្វព្រៃពិភពលោក (WWF) ។ សត្វខ្លាចុងក្រោយដែលត្រូវបានគេឃើញនៅក្នុងប្រទេស គឺនៅឆ្នាំ 2007 នេះបើយោងតាមឧបករណ៍ចាប់កាមេរ៉ាដែលបានដំឡើងនៅក្នុងព្រៃខេត្តមណ្ឌលគិរី ។

បើ​តាម​ក្រសួង​បរិស្ថាន​កម្ពុជា ក្រសួង​គ្រោង​នឹង​ដំឡើង​កាមេរ៉ា​ចម្ងាយ​មួយ​គីឡូម៉ែត្រ​ពី​គ្នា​នៅ​ជួរ​ភ្នំក្រវាញ និងប្រើប្រាស់បានរយៈពេល 3ខែ គ្របដណ្តប់ទាំងរដូវក្តៅ និងរដូវវស្សា ដើម្បីតាមដានសត្វព្រៃ ជាពិសេស​សត្វ​ ​ខ្លា​ ក្តាន់ និង​ជ្រូកព្រៃ​។

Wildlife Alliance ដែលជាក្រុមអភិរក្សសត្វព្រៃ ធ្វើការជាមួយក្រសួងលើគម្រោងនេះបាននិយាយថា អន្ទាក់កាមេរ៉ាសរុបចំនួន 410 នឹងត្រូវបានដំឡើង ។

អ្នកនាំពាក្យក្រសួងបរិស្ថានបាននិយាយថា ការដំឡើងអន្ទាក់កាមេរ៉ានឹងចាប់ផ្តើមនៅចុងសប្តាហ៍នេះហើយ ។ សត្វខ្លាចំនួន 4 ក្បាល ញី 3 ក្បាល និងឈ្មោល 1 នឹងត្រូវបញ្ជូនពីប្រទេសឥណ្ឌានៅចុងឆ្នាំនេះ ហើយ​នឹង​ត្រូវ​ដាក់​នៅ​ក្នុង​តំបន់​អភិរក្ស​ទំហំ ៩០ ហិកតា ក្នុង​ដែន​ជម្រក​សត្វ​ព្រៃ​តាតៃ ក្នុង​ខេត្ត​កោះកុង និង​ខេត្ត​ពោធិ៍សាត់ តាម​កិច្ច​ព្រមព្រៀង​ជាមួយ​ប្រទេស​ឥណ្ឌា។ ប្រសិនជាដំណើរការ​ទៅ​ដោយ​រលូន ខ្លា​១២​ក្បាល​ទៀត​នឹង​ត្រូវ​នាំ​ចូល​ក្នុង​រយៈពេល​ ៥​ឆ្នាំ​ខាង​មុខ។

នៅឆ្នាំ២០២២ កម្ពុជា និងឥណ្ឌាបានចុះហត្ថលេខាលើអនុស្សរណៈយោគយល់គ្នាស្តីពីកិច្ចសហប្រតិបត្តិការក្នុងការអភិរក្សជីវៈចម្រុះ ការគ្រប់គ្រងសត្វព្រៃប្រកបដោយនិរន្តរភាព និងយុទ្ធសាស្រ្តសម្រាប់ការស្ដារសត្វខ្លា និងជម្រករបស់ពួកគេ។

តំបន់​ព្រៃ​ដែល​មិន​ទាន់​បាន​អភិវឌ្ឍ​របស់​ប្រទេស​កម្ពុជា​ជា​ជម្រក​សត្វព្រៃ​ដ៏​សម្បូរ​បែប ប៉ុន្តែ​ក្រោយ​ការ​គ្រប់គ្រង​ដ៏​ឃោរឃៅ​របស់​ខ្មែរក្រហម​ក្នុង​ទសវត្សរ៍​ឆ្នាំ ១៩៧០ សង្គម និង​សេដ្ឋកិច្ច​ត្រូវ​បាន​បំផ្លាញ អ្នក​ភូមិ​ក្រីក្រ​នៅ​ជនបទ ត្រូវ​ដើរ​ព្រៃ​រក​សត្វ​ព្រៃ ។

ខ្លា​ត្រូវ​បាន​ចាត់​ថ្នាក់​ជា​ប្រភេទ​ជិត​ផុត​ពូជ ។​ បើយោងតាមអង្គការ WWF មានសត្វខ្លាប្រហែល 3,200 ក្បាលនៅក្នុង 13 ប្រទេសជុំវិញពិភពលោក នេះ​បើ​ប្រៀបធៀប​ទៅ​នឹង​ប្រមាណ​១០​ម៉ឺន​ក្បាល​នៅ​ដើម​សតវត្សរ៍​ទី​២០ ៕

ពី mgronline