នៅរសៀលថ្ងៃទី ២៣ ខែមីនា ឆ្នាំ ២០២១ ឯកឧត្តម ទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ បានទទួលអំណោយមួយចំនួន មានជា ថ្នាំពេទ្យ ម៉ាស និងកន្សែងជូតសម្លាប់មេរោគ ពីលោកស្រី វេជ្ជបណ្ឌិត ហ៊ី សូរ្យាភា ប្រធានមន្ទីរពេទ្យ«សូរិយា (SORYA)» និងលោក ហោ សេរីវឌ្ឍន៍ អភិបាលក្រុមហ៊ុន Soriya Hospital និងជាអនុប្រធានសភាមុខរបរ និងមីក្រូសហគ្រាស នៅអង្គភាពអង្គភាពប្រឆាំងអំពើពុករលួយ ។
ក្នុងដំណាក់កាលដែលសកលលោក ពិសេសប្រទេសកម្ពុជាជួបវិបត្តិមេរោគកូវីដ-១៩រាតត្បាត លោកស្រីវេជ្ជបណ្ឌិត ហ៊ី សូរ្យាភា បានមានប្រសាសន៍ថា កន្លងមកមន្ទីរពេទ្យបានចែករំលែកនូវសម្ភារ ជូនទៅស្ថាប័នមួយចំនួន ដើម្បីចូលរួមជាមួយរាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន នាយករដ្ឋមន្ត្រីដឹកនាំ និងគ្រប់គ្រងដ៏ឈ្លាសវៃ និងអនុវត្តតាមវិធានការរបស់ក្រសួងសុខាភិបាល ដើម្បីទប់ស្កាត់មេរោគដ៏កាចសាហាវ រាតត្បាតមិនឈប់ឈរ ពិសេសព្រឹត្តិការណ៍ឆ្លងសហគមន៍ ២០ កុម្ភៈដែលមានរយៈពេលមួយខែមកនេះ ។
លោក ហោ សេរីវឌ្ឍន៍ ក៏បានជូនពរឯកឧត្តម ទេសរដ្ឋមន្ត្រី និងក្រុមគ្រួសារ ព្រមទាំងថ្នាក់ដឹកនាំ មន្ត្រី អង្គភាពទាំងអស់ ទទួលបាននូវសុខភាពល្អ និងសូមទទួលនូវការគោរពដ៏ខ្ពង់ខ្ពស់ពីខ្ញុំបាទ!
ឯកឧត្តម ទេសរដ្ឋមន្ត្រី ក៏បានមានប្រសាសន៍ ជួសមុខឲ្យថ្នាក់ដឹកនាំ និងមន្ត្រីអង្គភាព សូមជូនពរលោកស្រីវេជ្ជបណ្ឌិត និងសហការីទាំងអស់មានសុខភាពល្អបរិបូណ៌ ក្នុងដំណាក់កាលនៃការរាតត្បាតជំងឺកូវីដ-១៩នេះ និងបានចូលរួមចំណែកដ៏សកម្មជាមួយរដ្ឋាភិបាលក្នុងការទប់ស្កាត់មេរោគរាតត្បាតដ៏កាចសាហាវនេះ ៕
អត្ថបទ សូរ្យសែង