ខេត្តភាគខាងត្បូងរបស់ថៃនៅតែវឹកវរ! គ្រាប់បែក២០គីឡូក្រាម បង្កចលាចលនៅខេត្តប៉ាតានី

ព័ត៌មានអន្តរជាតិថ្ងៃអង្គារ៍ ទី10 ខែមិថុនា ឆ្នាំ2025 ម៉ោង 7:35 នាទី ល្ងាច

ជនដៃដល់ម្នាក់បានទម្លាក់គ្រាប់បែកនៅក្រុងប៉ាតានី ថ្ងៃទី៩ ខែមិថុនា ឆ្នាំ២០២៥ ទីតាំងទម្លាក់គ្រាប់បែកស្ថិតនៅក្នុងធុងសំរាមក្បែរស្លាកសញ្ញាផ្សាររាត្រី ទល់មុខហាងមាស ខេត្តប៉ាតានី ភាគខាងត្បូងប្រទេសថៃដែលជាង ២០ឆ្នាំមកហើយ មិនដែលមានសន្តិសុខ ដោយសារក្រុមឥស្លាមចង់ផ្តាច់ខ្លួន។

កម្លាំងជាតិផ្ទុះខ្លាំងពេក ធុងសំរាមប្លាស្ទិកខ្ទេចខ្ទីអស់ ខូចខាតម៉ូតូ២គ្រឿង ។ ក្រោយមកមានសេចក្តីរាយការណ៍មកថា ជាតិផ្ទុះមួយគ្រាប់ទៀតមិនទាន់ផ្ទុះ ត្រូវបានគេរកឃើញលាក់ទុកនៅចំណុចប្រសព្វសាន់ទិស៊ុក លើផ្លូវម៉ាគុតក្នុងក្រុង។ គេបានរកឃើញថា ជាគ្រាប់បែកកំណត់ពេលវេលា ទម្ងន់ប្រមាណ ២០គីឡូក្រាម គ្រោងនឹងផ្ទុះនៅម៉ោងប្រហែល៨យប់ ប៉ុន្តែមិនផ្ទុះឡើយ ។

ឃ្លីបនេះគឺជាកាមេរ៉ាឃ្លាំមើលរបស់អ្នកភូមិម្នាក់ដែលថតវីដេអូនៅពេលយប់។ តាមរយៈវីដេអូឃ្លីប គេអាចមើលឃើញយ៉ាងច្បាស់ថា ជនដៃដល់ទាំង២នាក់ បានធ្វើដំណើរតាមម៉ូតូ ដោយគ្មានញញើតឡើយ មុននឹងឆ្លៀតឱកាសដាក់អីវ៉ាន់នៅក្រោមតុ តាមបណ្តោយផ្លូវម៉ាក្រូ ស្ថិតក្នុងក្រុង។ បន្ទាប់មកពួកគេបានជិះម៉ូតូចេញទៅបាត់ដោយស្ងប់ស្ងាត់។

ពាក់ព័ន្ធនឹងបញ្ហានេះ អាជ្ញាធរសន្មត់ថា ការបំផ្ទុះគ្រាប់បែកនេះ គឺជាការប៉ុនប៉ងបង្កឲ្យមានឧបទ្ទវហេតុកើតឡើងដដែលៗនៅក្នុងទីក្រុងប៉ាតានី ដោយផ្តោតលើសហគមន៍ជាគោលដៅ៕